«Калі Ўкраіна сапраўды вырашыла атакаваць структуру тылавога забесьпячэньня расейскай арміі, гэта было б законна з пункту гледжаньня міжнароднага права», — заявіў Бэн Уолес у эфіры BBC.
Раней падобнае меркаваньне выказаў дзяржаўны сакратар ЗША Энтані Блінкен у часе сустрэчы з чальцамі аднаго з камітэтаў Сэнату ЗША.
«Украіна мусіць сама вырашаць, ці наносіць удары па расейскіх вайсковых аб‘ектах, заявіў дзяржсакратар Блінкен», — напісаў з гэтай нагоды ў Twitter дарадца Офісу прэзыдэнта Ўкраіны, прадстаўнік украінскага боку на перамовах з Расеяй Міхаіл Падаляк.
«Расея напала на Ўкраіну і забівае мірных грамадзян. Украіна будзе абараняць сябе любым чынам, у тым ліку ўдарамі па складах і базах расейскіх забойцаў. Сьвет гэтае права прызнае», — дадаў Міхаіл Падаляк.
Расея адказала на гэтыя заявы новымі пагрозамі.
«Хацелася б, каб у Кіеве і заходніх сталіцах сур’ёзна ўспрынялі заявы Міністэрства абароны Расеі аб тым, што далейшае правакаваньне Ўкраіны на ўдары па расейскіх аб’ектах абавязкова прывядзе да жорсткага адказу з боку Расеі», — заявіла прадстаўніца Міністэрства замежных спраў Расеі Марыя Захарава на брыфінгу 28 красавіка.
27 красавіка адразу тры расейскія губэрнатары заявілі аб атаках на свае рэгіёны — Варонескую, Курскую і Белгародзкую вобласьці.
У лютым у Растоўскай вобласьці паблізу з украінскай мяжой дзьве ракеты пацэлілі ў вайсковы аэрадром. Пазьней аналягічныя «абстрэлы» адбыліся ў Белгародзкай, Растоўскай і Курскай абласьцях. 25 красавіка стала вядома пра пажар на дзьвюх нафтабазах у Бранску.
Белгародзкая вобласьць Расеі мяжуе з Харкаўскай і Сумскай абласьцямі Ўкраіны. Ад Бранску найбліжэйшы пункт Сумскай вобласьці Ўкраіны за 123 кілямэтры. Растоўская вобласьць мяжуе з Данецкай і Луганскай абласьцямі Ўкраіны.
З 11 красавіка Расея ўвяла ў памежных з Украінай абласьцях Расеі «жоўты» (высокі) узровень тэрарыстычнай пагрозы. Ён дзейнічае ў Курскай, Белгародзкай, Бранскай абласьцях, двух раёнах Варонескай вобласьці, двух раёнах Краснадарскага краю, што мяжуюць з Украінай па моры, а таксама на поўначы акупаванага Расеяй Крыму.
Украінскі бок пакуль не камэнтуе абвінавачаньняў у абстрэлах, але раней афіцыйны Кіеў папярэджваў, што Расея можа пачаць абстрэл сваёй тэрыторыі, каб «апраўдаць абстрэлы тэрыторыі Ўкраіны».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
