Паводле ацэнак ЗША, у вайне ва Ўкраіне расейскі бок страціў больш за 10 тысяч вайскоўцаў. Пра гэта ў этэры «Настоящего Времени» заявіла намесьніца дзяржаўнага сакратара ЗША Вікторыя Нуланд. Гэтая лічба ў некалькі разоў большая за афіцыйныя зьвесткі Міністэрства абароны РФ. 25 сакавіка ведамства апублікавала справаздачу пра гібель 1351 вайскоўца.
У адказе на пытаньне журналіста «Настоящего Времени», ці магчымае замірэньне паміж Расеяй і Ўкраінай у бліжэйшыя тыдні, намесьніца дзяржаўнага сакратара адзначыла, што «гэтага і дамагаюцца ўкраінцы і іх хаўрусьнікі», але «Расея пакуль не да канца зразумела, наколькі моцнае ўкраінскае войска».
«Расейскі бок нясе неймаверныя страты. Паводле нашых ацэнак, забітыя больш за 10 тысяч расейцаў. Але пакуль ня будзе сапраўднага замірэньня — ня будзе сур’ёзных перамоваў», — сказала Нуланд у інтэрвію.
З самага пачатку вайны Расея паведамляла пра страты двойчы. 2 сакавіка ведамства апублікавала справаздачу пра гібель 498 вайскоўцаў, 1597 параненыя. 25 сакавіка Міністэрства абароны РФ паведаміла пра гібель 1351 вайскоўца падчас ваенных дзеяньняў ва Ўкраіне, 3825 вайскоўцаў параненыя.
Аднак за час вайны паступалі розныя ацэнкі стратаў сярод расейскага войска: Генэральны штаб Узброеных сілаў Украіны кажа пра больш як 17-тысячныя страты (уключаюць і загінулых, і параненых). Паводле ацэнак NATO, за час ваенных дзеяньняў маглі быць забітыя ад 7 да 15 тысяч расейскіх вайскоўцаў, паведаміла выданьне Time 24 сакавіка.
Ва ўмовах ваеннага часу рэдакцыя ня можа незалежна праверыць дадзеныя аб стратах абодвух бакоў канфлікту.
Адзін з найважнейшых вынікаў праведзеных 29 сакавіка перамоваў у Стамбуле — заява расейскага Міністэрства абароны аб «кардынальным скарачэньні ваеннай актыўнасьці» на кіеўскім і чарнігаўскім напрамках.
Аднак кіраўнік Чарнігаўскай абласной ваеннай адміністрацыі Вячаслаў Чавус раніцай расказаў, што расейскія войскі ня зьнізілі інтэнсіўнасьць абстрэлаў нягледзячы на дамоўленасьці ў Стамбуле.
«Зноў зьнішчаныя аб’екты цывільнай інфраструктуры. Зьнішчаныя бібліятэкі, гандлёвы цэнтар, шмат дамоў», — сказаў Чавус.
Афіцыйны прадстаўнік Пэнтагону Джон Кэрбі заявіў, што пэўнае адступленьне ад Кіева назіраецца. Але ў Пэнтагоне лічаць, што «гэта перадысьлякацыя, а не сапраўднае адступленьне».
«Мы ўсе павінны быць гатовыя і чакаць вялікага наступу ў іншых раёнах Украіны. Гэта ня значыць, што пагроза Кіеву зьнікла», — падкрэсьліў Кэрбі.
Паведамлялася, што былі чутныя гукі выбухаў у Кіеве, але якіх-небудзь дакладных пацьверджаньняў пакуль няма. У Кіеве раніцай зноў была паветраная трывога.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.