Пра гэта паведамляе DW.
У Расеі 19 лютага пад кіраўніцтвам прэзыдэнта Расеі Ўладзіміра Пуціна пройдзе «плянавае вучэньне сіл стратэгічнага стрымліваньня», паведаміла ў пятніцу, 18 лютага, Міністэрства абароны РФ. Падчас гэтых манэўраў «будуць выкананыя пускі балістычных і крылатых ракет». «Да вучэньня прыцягнуты сілы і сродкі Паветрана-касьмічных сіл, Паўднёвай вайсковай акругі, Ракетных войскаў стратэгічнага прызначэньня, Паўночнага і Чарнаморскага флётаў», — гаворыцца далей у паведамленьні.
Пуцін падчас вучэньняў будзе знаходзіцца ў сытуацыйным цэнтры Мінабароны РФ. «Падобныя нават трэніровачныя пускі немагчымыя без кіраўніка дзяржавы. Вы ведаеце пра знакаміты „чорны чамаданчык“, „чырвоную кнопку“ і да таго падобнае», — растлумачыў журналістам прэс-сакратар Пуціна Дзьмітрый Пяскоў. Ён ня выключыў, што разам з прэзыдэнтам Расеі за вучэньнямі будзе назіраць і кіраўнік Беларусі Аляксандар Лукашэнка, які прыбыў зь візытам у Маскву.
Міністэрства абароны РФ падкрэсьліла, што гэтыя вучэньні былі «сплянаваныя загадзя для праверкі гатоўнасьці органаў вайсковага кіраваньня, баявых разьлікаў пуску, экіпажаў баявых караблёў і стратэгічных ракетаносцаў да выкананьня пастаўленых задач, а таксама для праверкі надзейнасьці ўзбраеньня стратэгічных ядзерных і няядзерных сіл».
РФ заяўляе аб вяртаньні войскаў пасьля вучэньняў каля Ўкраіны.
Напярэдадні афіцыйны прадстаўнік Міністэрства абароны РФ Ігар Канашэнкаў заявіў, што першыя падразьдзяленьні расейскай арміі, якія былі задзейнічаны ў вучэньнях побач з Украінай, прыбываюць у воінскія гарнізоны. Паводле яго слоў, у пункты пастаяннай дысьлякацыі вяртаюцца часткі, якія правялі вучэньні на палігонах у Курскай і Бранскай абласьцях і ў Крыме. Паведамляецца таксама, што ў Расею вернуцца падразьдзяленьні, якія ўдзельнічаюць у манэўрах на тэрыторыі Беларусі.
Тым часам у NATO па-ранейшаму ня бачаць прыкмет адводу войскаў РФ ад межаў Украіны. «Нягледзячы на сьцьвярджэньні Масквы, мы пакуль ня ўбачылі прыкмет адвядзеньня войскаў або дээскаляцыі. Наадварот, гэта выглядае так, што Расея працягвае нарошчваньне», — заявіў генэральны сакратар альянсу Енс Столтэнбэрг на прэс-канфэрэнцыі па выніках паседжаньня міністраў абароны краін NATO 16–17 лютага ў Брусэлі.
Манэўры праходзяць на фоне абвастрэньня адносін Расеі і краін Захаду, якія апасаюцца расейскага ўварваньня ва Ўкраіну ў сувязі з канцэнтрацыяй расейскіх войскаў каля ўкраінскай мяжы. У другой палове 2021 году і пачатку 2022-га РФ перакінула ў анэксаваны Крым і да мяжы з Украінай больш за 100 тысяч вайскоўцаў. Крэмль адмаўляе пляны вайсковай агрэсіі.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.