Суды і выракі 9 ліпеня: 1 год калёніі за зьнявагу Лукашэнкі, 3 гады «хатняй хіміі» за абразу сілавікоў

Яшчэ адзін вырак за абразу Лукашэнкі

38-гадовы Павал Гулідаў ноччу тэлефанаваў у міліцыю і рэзка выказваўся пра Лукашэнку. Даставалася і міліцыянту, які прымаў паведамленьне. Мужчыну прысудзілі 1 год калёніі агульнага рэжыму і 870 рублёў штрафу.

Гулідава ўзялі пад варту ў зале суду Ленінскага раёну Магілёва і будуць утрымліваць у турме нумар 4. Прысуд яму ўступіць у сілу праз 10 дзён, калі ён не абскардзіць. Яму далі 30 дзён на выплату штрафу.

Гулідава суд Ленінскага раёну Магілёва прызнаў вінаватым у «публічнай зьнявазе прэзыдэнта» (ч. 1 арт. 368 КК) і «незаконным продажы маёмасьці, прызнанай рэчавым доказам ды перададзенай на адказнае захоўваньне» (арт. 409 КК).

Абвінавачаньне ў зьнявазе прадстаўніка ўлады падчас выкананьня службовых абавязкаў (369 арт. КК) суд скасаваў, бо такая правіна болей не зьяўляецца злачыннай і за яе няма крымінальнай адказнасьці.

Крымінальную справу разглядала судзьдзя Натальля Панасенка. Дзяржаўнае абвінавачваньне прадстаўляў памочнік пракурора гораду Раман Парфёнаў.

Згодна з абвінавачваньнем, Гулідаў у студзені 2021 году, быўшы п’яным, двойчы тэлефанаваў на спэцыяльны нумар 102 і з ужываньнем ненарматыўнай лексыкі публічна прыніжаў гонар і годнасьць Лукашэнкі. Зьняважлівымі словамі падсудны, адзначана ў абвінавачаньні, выказваў нэгатыўную ацэнку дзейнасьці асобы Лукашэнкі, а ягоныя фразы «зьмяшчалі лжывыя думкі, прымітыўныя пажаданьні … ды былі накіраваныя на падрыў аўтарытэта кіраўніка дзяржавы і фармаваньня яго нэгатыўнага вобразу».

Апрача таго, пакуль вялося сьледзтва, Гулідаў прадаў мабільны тэлефон, зь якога званіў у міліцыю. Ён быў прызнаны рэчавым доказам і сьледчым пакінуты абвінавачанаму пад пісьмовы абавязак захоўваць яго.

Сваю віну Гулідаў прызнаў цалкам, а свае дзеяньні патлумачыў тым, што быў нападпітку і не асэнсоўваў, што рабіў. Аб учыненым даведаўся ад участковага міліцыянта, які прыйшоў яго апытваць. У судзе настойваў, што супраць палітыкі Лукашэнкі ня мае нічога супраць і яго ў Беларусі ўсё задавальняе. У пратаколе допыту адзначана, што ён тэлефанаваў у міліцыю, каб выказаць пратэст. Свой учынак падсудны назваў дурнотаю і сьцьвярджаў, што мэты зьняважыць некага ня меў. У пратэставых акцыях 2020 году ён не ўдзельнічаў, але чуў пра іх.

Прысуд мадэратару чату «Жодино для жизни»

Вынесены прысуд палітзьняволенай мадэратарцы чату «Жодино для жизни» Лідзіі Коршун. Жанчыну абвінавачвалі ў «арганізацыі і падрыхтоўцы дзеяньняў, што груба парушаюць грамадзкі парадак» і «абразе прадстаўніка ўлады».

Нібыта Коршун каардынавала «дваровы пратэставы рух у горадзе, заклікала да актыўных дзеяньняў, пры гэтым сама заўсёды заставалася дома», а таксама «публікавала абразы ў адрас міліцыянтаў у чаце групы „Карнікі“».

Судзьдзя Іван Грынкевіч палічыў віну жанчыны даказанай і прысудзіў ёй 3 гады «хатняй хіміі».

Мастака Данілу Ганчарова асудзілі на 2 гады калёніі

Ён не прызнаў віны і адмовіўся ад паказаньняў у судзе. Судзьдзя Цэнтральнага суду Менску Дзьмітры Карсюк вынес прысуд, не зважаючы на выяўленыя памылкі сьледзтва і слабыя доказы таго, што Даніла парушаў грамадзкі парадак.

Даніла Ганчароў — мастак па сьвятле, раней яго звольнілі з Новага драматычнага тэатру за ўдзел у страйку.

«Хімія» за абразу прадстаўніка ўлады

У судзе Першамайскага раёну Віцебску на 1,5 года «хіміі» асудзілі Аляксандра Мацьвеева, абвінавачанага паводле арт. 369. КК.

Суд прызнаў мужчыну вінаватым у «публічнай абразе прадстаўніка ўлады ў сувязі з выкананьнем ёй службовых абавязкаў». Судзьдзя Натальля Карабліна цалкам задаволіла патрабаваньне пракуратуры, даўшы Мацьвееву тэрмін, які быў запрошаны.

У суполцы «Типичный Витебск» у Instagram ён напісаў «крытычны камэнтар з эмацыйнай афарбоўкай і ўжываньнем неўнармаванай лексікі адносна дзеяньняў старшага сяржанта ППС Віталя Шнявіна».