Менскі гарадзкі суд прысудзіў 11 гадоў зьняволеньня інжынэру Ціхану Восіпаву.
Мужчыну прызналі вінаватым у
- замаху на забойства пяці байцоў унутраных войскаў МУС праз наезд на іх аўтамабілем,
- удзеле ў масавых беспарадках,
- заведама ілжывым даносе пра злачынства.
Пасьля інцыдэнту, які адбыўся ў ноч на 11 жніўня на вуліцы Прытыцкага, дзе праходзілі масавыя пратэсты супраць фальшаваньня выбараў, Восіпаў утапіў аўтамабіль у сажалцы, а паведаміў, што нібыта яго скралі.
Асуджаны не прызнаў віны паводле артыкулу аб замаху на забойства і заявіў, што будзе абскарджваць прысуд.
Суд на Ціханам Восіпавым праз замену судзьдзі ў ходзе працэсу фактычна адбыўся двойчы. На абодвух працэсах байцы ўнутраных войскаў, якіх прызналі пацярпелымі ад наезду, давалі паказаньні, якія не пацьвердзілі вэрсіі сьледзтва пра замах на іхныя жыцьці з боку Ціхана Восіпава. Таксама пацярпелыя ня выставілі на судзе матэрыяльных прэтэнзій да Восіпава, бо, зь іхных словаў, не палічылі, што атрымалі значныя траўмы.
Ціхан Восіпаў паўтараў у судзе, што не знарок наехаў на сілавікоў, якія стаялі на праезнай частцы дарогі, а зрабіў гэта ад стрэсу, які перажываў у момант нападу на ягоны аўтамабіль узброеных невядомых людзей. Паводле Восіпава, калі на яго наставілі зброю, ён паспрабаваў зьехаць зь небясьпечнага месца і «на некалькі сэкундаў нахіліў галаву», а таму «мог ня ўбачыць і зачапіць некага на дарозе».
Што да эпізоду пра махлярства з утопленым аўтамабілем, дык тут віну Ціхан Восіпаў цалкам прызнаваў. Малады чалавек тлумачыў свой учынак тым, што не хацеў, каб жонка ведала аб праблемах, у якія ён трапіў.
Дзяржаўны абвінаваўца на абодвух працэсах прытрымліваўся кваліфікацыі ўчынку Ціхана Восіпава менавіта як замаху на забойства і лічыў, што гэта было на судзе даказана. Пракурор запрошваў для абвінавачанага 12 гадоў зьняволеньня.
Маці асуджанага Сьвятлана сказала, што на абодвух працэсах яна пераканалася ў невінаватасці свайго сына, бо нават пацярпелыя не пацьвердзілі замах. А пасьля прысуду пераканалася ў тым, што «ў нас няма справядлівага суду».
«Хай гэта будзе на іх сумленьні», — сказала яна.
Вельмі разгубленай была пасьля працэсу цешча Ціхана Восіпава Лілія.
«У мяне два зяці, і абодва вельмі добрыя. Ня думаю, што Ціхан гэтак вінаваты, каб выносіць яму такі вялікі тэрмін», — сказала яна.
Вырак Ціхану Восіпаву ня першы з прысудаў за дзеяньні, якія сьледзтва кваліфікавала як «замах на сілавікоў». У сакавіку 11 гадоў зьняволеньня за наезд на супрацоўніка ДАІ прысудзілі прадпрымальніку зь Менску Аляксандру Троцкаму. Зь ім інцыдэнт адбыўся 12 жніўня на праспэкце Пераможцаў. Аляксандар Троцкі таксама не прызнаў віны ў наўмысным наезьдзе на міліцыянта і тлумачыў свае дзеяньні прыступам страху ад настаўленай на яго зброі.
