Лінкі ўнівэрсальнага доступу

Славаччына заявіла, што атрымала ад Расеі зусім ня той «Sputnik V», які хваліў часопіс The Lancet


Дастаўка расейскай вакцыны вайсковым самалётам у Славаччыну, 1 сакавіка 2021

Партыі расейскай вакцыны «Sputnik V», пастаўленыя ў Славаччыну, не ідэнтычныя прэпаратам, выкарыстаным у клінічных выпрабаваньнях у Расеі, а таксама тым, якія Расея прадставіла для выпрабаваньняў рэгулятару ЭЗ.

Пра гэта паведаміла кіраўніца славацкага Дзяржаўнага інстытуту кантролю за лекамі Зузана Банёва. Паводле яе, Славаччына ня можа пацьвердзіць эфэктыўнасьць набытай вакцыны, цытуе чыноўніка газэта Nový čas.

Раней аўтарытэтны мэдычны часопіс The Lancet апублікаваў папярэднія вынікі трэцяй фазы выпрабаваньняў прэпарата, дзе эфэктыўнасьць была ацэненая больш як у 91%.

Славаччына — адна зь дзьвюх краін Эўразьвязу, якая вырашыла выкарыстоўваць расейскую вакцыну да таго, як яна была ўхваленая Эўрапейскім агенцтвам лекавых сродкаў. Гэтае рашэньне прывяло да палітычнага крызісу, які скончыўся адстаўкай прэм’ер-міністра і яго кабінэта, якія падтрымлівалі ідэю.

Фармацэўтычны рэгулятар Славаччыны напярэдадні паведаміў, што ня можа ўхваліць пачатак вакцынацыі «Спутнікам», бо ня мае дастатковай інфармацыі пра бясьпеку і эфэктыўнасьць вакцыны. Паводле Банёвай, вытворца не прадставіў рэгулятару 80% неабходных дадзеных для адабрэньня прэпарата.

У прыватнасьці, гаворка ідзе пра дадзеныя даклінічных і клінічных выпрабаваньняў і пра вытворчасьць прэпарата. Па словах чыноўніцы, Славаччына паўторна запытвала гэтую інфармацыю ў расейскага боку, але не атрымала адказу. У канцы сакавіка аб прыпыненьні рэгістрацыі прэпарата з той жа прычыны паведаміла бразыльскае Нацыянальнае агенцтва санітарнага кантролю.

Славаччына імпартавала 200 000 дозаў расейскай вакцыны больш як месяц таму, але яна дагэтуль не выкарыстоўваецца, адзначае браціслаўскі карэспандэнт чэскай газэты Právo. Усяго было закуплена два мільёны дозаў.

Пра адрознасьць славацкай вакцыны ад той, якая была ўхваленая ў Расеі па выніках выпрабаваньняў, са спасылкай на крыніцы 6 красавіка напісала славацкая газэта Denník N. 7 красавіка Расейскі фонд прамых інвэстыцый, які прасоўвае вакцыну на зьнешніх рынках, назваў паведамленьні пра падмену фэйкам і заклікаў верыць толькі афіцыйным крыніцам.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG