Лінкі ўнівэрсальнага доступу

Арыштаванага ў Крыме пазаштатнага карэспандэнта Радыё Свабода маглі катаваць токам


Уладзіслаў Есіпенка
Уладзіслаў Есіпенка

Арыштаванага ў анэксаваным Расеяй Крыме пазаштатнага карэспандэнта рэдакцыі «Крым.Реалии» Ўладзіслава Есіпенку супрацоўнікі ФСБ Расеі два дні катавалі электрычнасьцю, каб атрымаць прызнаньне ў злачынстве.

Пра гэта напісаў на сваёй старонцы ў фэйсбуку галоўны рэдактар выданьня «Ґрати» (Краты) Антон Наўмлюк.

«Надзявалі на галаву нешта, падключалі ток і паступова павялічвалі, калі ён прызвычайваўся. Такім чынам у яго атрымалі першыя прызнальныя паказаньні, якія потым яшчэ і запісалі ў інтэрвію на «Крым24», — расказаў журналіст.

Паводле яго, інфармацыя аб катаваньнях Есіпенкі стала вядомая ад крыніцы ў СІЗА, якая размаўляла з арыштаваным журналістам.

Пасьля публікацыі гэтых паказаньняў Есіпенка адмовіўся адказваць на пытаньні сьледзтва, спасылаючыся на 51 артыкул Канстытуцыі Расеі, якая дазваляе ня сьведчыць супраць сябе і блізкіх. Па словах затрыманага, зараз на яго аказваюць толькі псыхалягічны ціск, паведамляюць «Ґрати».

«Крым.Реалии» не валодаюць пацьвярджэньнем гэтай інфармацыі зь іншых крыніцаў.

Уладзіслаў Есіпенка быў затрыманы 10 сакавіка расейскімі спэцслужбамі на трасе Сімфэропаль — Алушта і абвінавачаны ў незаконным вырабе выбуховых прыстасаваньняў. ФСБ сьцьвярджае, што Есіпенка займаўся зборам матэрыялаў у інтарэсах спэцслужбаў Украіны, у прыватнасьці, фота- і відэаздымкай аб’ектаў масавага знаходжаньня людзей на тэрыторыі Крыма. Па прадʼяўленым артыкуле журналісту пагражае да шасьці гадоў пазбаўленьня волі.

Арышт Есіпенкі асудзіў прэзыдэнт Радыё Свабодная Эўропа / Радыё Свабода Джэймі Флай. «Есіпенку варта неадкладна вызваліць, каб ён мог узьяднацца са сваёй сямʼёй», — заявіў Флай.

Украінскія праваабаронцы апублікавалі сумесную заяву, у якой запатрабавалі ад расейскіх уладаў вызваліць Есіпенку, а Ўкраіну і міжнародная супольнасьць заклікалі ўзмацніць ціск на Расею за перасьледу на анэксаваным паўвостраве.

Рашучы пратэст выказала Міністэрства замежных справаў Украіны.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG