Лінкі ўнівэрсальнага доступу

Суд над журналісткай і лекарам у справе Бандарэнкі закрылі ад грамадзтва

абноўлена

Кацярына Барысевіч у клетцы падчас суду. 19 лютага

Судовы працэс над журналісткай Tut.by Кацярынай Барысевіч і доктарам менскай лякарні хуткай дапамогі Арцёмам Сарокіным, якіх вінавяцяць у разгалошваньні мэдычнай тайны Рамана Бандарэнкі, пройдзе ў закрытым фармаце.  

  • Судзьдзя Сьвятлана Бандарэнка (намесьніца старшыні суду Маскоўскага раёну Менску ў крымінальных справах) закрыла працэс на просьбу пракурора Людмілы Іваненкі, «каб пазьбегнуць выдаваньня мэдычнай тайны і дадзеных папярэдняга расьсьледаваньня, якія ахоўваюцца законам».
  • Маці загінулага Рамана Бандарэнкі, падсудныя і іх адвакаты выступалі супраць закрыцьця працэсу.
  • Журналістаў незалежных мэдыя зусім не пусьцілі на працэс, у залю першапачаткова пусьцілі толькі блізкіх сваякоў абвінавачаных і дыпляматаў. Каля 100 чалавек засталіся ў калідоры
  • Сваякі Барысевіч і Сарокіна расказалі, што яны выглядаюць бадзёра і добра трымаюцца.
Арцём Сарокін
Арцём Сарокін

Як праходзіць працэс

17.55 Пасяджэньне скончылася. Наступнае прызначылі на панядзелак у 10.30.

Пасля 15-й гадзіны ў суд выклікалі сьведкаў — двух лекараў БХМД. Адзін зь іх — рэаніматоляг, які, верагодна, аказваў мэдычную дапамогу Раману Бандарэнку. Падчас сьледзтва ў яго ўзялі падпіску пра неразгалошваньне. Ён адмовіўся размаўляць з журналістамі, піша Tut.by.

12.07 Маці Рамана Бандарэнкі Алену выклікалі на допыт у суд. Згодна зь лёгікай вядзеньня працэсу, піша Tut.by, можна меркаваць, што абвінавачаньне фігурантам ужо зачыталі, вызначылі парадак вядзеньня працэсу такім чынам, што спачатку дапытваюць сьведак.

11.25 Доктарка ўльтрагукавой дыягностыкі Надзея выказалася пра суд над Сарокіным.

11.10 Людзі складаюць скаргу на закрыцьцё працэсу, патрабуюць забясьпечыць прысутнасьць на судзе і адкрытасьць. Пад заявай падпісаліся ўжо больш за 50 чалавек.

11.00 «Каця малайчына, трымаецца. Яны выглядала добра. Усьміхалася. Працэс закрылі адразу, і мы не пасьпелі пачуць ніякіх дэталяў», — расказаў пасьля закрыцьця працэсу брат Кацярыны Барысевіч Вадзім.

Людзі выходзяць з залі паседжаньня пасьля закрыцьця судовага працэсу
Людзі выходзяць з залі паседжаньня пасьля закрыцьця судовага працэсу

Брат Арцёма Сарокіна Павал расказаў, што прысутныя ў залі сустрэлі рашэньне суду пра закрыцьцё працэсу выгукамі «Ганьба!», і міліцыянты вырашылі «прыбраць усіх з залі як мага хутчэй».

«Мы ставімся да гэтага адмоўна. Усе СМІ, і нават дзяржаўныя, казалі, што ўсё мусіць быць адкрыта, каб людзі ведалі. Зьдзіўлены, што выглядае добра, мала памяняўся. Радуе, што трымаюць сябе з форме і вонкава, і ўнутрана», — сказаў Павал Сарокін.

10.51 Рэакцыя прысутных на закрыцьцё суду над Барысевіч і Сарокіным і дзеяньні міліцыі і «людзей у цывільным»

10.40 Суд пройдзе ў закрытым рэжыме: «каб пазьбегнуць выдаваньня мэдычнай тайны і дадзеных папярэдняга расьсьледаваньня, якія ахоўваюцца законам», а таксама таму, што «матэрыялы справы зьмяшчаюць мэдычныя дакумэнты, у тым ліку тыя, што раней не публікаваліся».

«Гэта значыць, што мы не даведаемся, у чым абвінавачваюць і за што канкрэтна судзяць лекара і журналіста, якія расказалі праўду аб стане загінулага Рамана Бандарэнка, — піша Tut.by. На пасяджэньні ня змогуць прысутнічаць нават родныя Кацярыны Барысевіч і Арцёма Сарокіна.

Кацярына Барысевіч і Арцём Сарокін
Кацярына Барысевіч і Арцём Сарокін

10.30 Генэральны дырэктар Tut.by Людміла Чэкіна назвала абвінавачаньне «абсалютна абсурдным».

«Артыкул пра выдаваньне лекарскай тайны мае на ўвазе наяўнасьць пакутаў пацыента ці ягоных сваякоў. Сваякі Рамана Бандарэнкі ня раз заяўлялі, што ніякіх прэтэнзій ня маюць і што гэта было зроблена ў інтарэсах грамадзтва і самага Рамана. Калі браць чыста фармальныя прыкметы, суб’ектам можа быць толькі мэдычны работнік. Тое, што журналіста прыцягнулі ў якасьці саўдзельніка, гэта абсалютнае дзікунства. Артыкул абсалютна мёртвы, раней прымяняўся вельмі рэдка. То бок выцягнулі абсалютна замшэлы артыкул і выкарысталі яго ў сваіх палітычных мэтах».

10.20 Пракурор хадайнічае аб закрыцьці пасяджэньня, абарона катэгарычна ня згодная: маецца заява маці Рамана, яна настойвае на адкрытасьці паседжаньня», паведамляе Tut.by. Адвакат Кацярыны Барысевіч кажа: «Маці Бандарэнкі зьяўляецца адзіным чалавекам, які можа даць ці ня даць згоду на тое, каб суд быў адкрытым».

«Я хачу, каб грамадзтва ведала, за што судзяць журналіста і лекара, таму падтрымліваю хадайніцтва адваката», — кажа Кацярына Барысевіч.

Лекар Арцём Сарокін таксама за адкрыты працэс.

10.12 Першыя кадры з залі суду. Барысевіч і Сарокін у клетцы. Кацярына паказвае рукамі сэрцайка.

10.00 У залю запусцілі толькі блізкіх сваякоў, дзяржаўныя СМІ і дыпляматаў, разам каля 30 чалавек. Уваход ахоўваюць людзі ў цывільным. Сарокіна і Барысевіч прывезлі ў суд за дзесяць хвілін да пачатку працэсу іх завялі пад канвоем у кайданках.

На суд ня трапіла больш за 50 чалавек, яны чакаюць у калідоры
На суд ня трапіла больш за 50 чалавек, яны чакаюць у калідоры
Арцёма Сарокіна заводзяць у суд
Арцёма Сарокіна заводзяць у суд
Брат Кацярыны Барысевіч разам зь яе дачкой Дар'яй (зьлева) і сяброўкай Вольгай Анцыповіч перад пачаткам суду
Брат Кацярыны Барысевіч разам зь яе дачкой Дар'яй (зьлева) і сяброўкай Вольгай Анцыповіч перад пачаткам суду
Маці Рамана Бандарэнкі Алену пусьцілі ў залю
Маці Рамана Бандарэнкі Алену пусьцілі ў залю

Што адбылося

Журналістку Tut.by Кацярыну Барысевіч і доктара лякарні хуткай мэдычнай дапамогі Арцёма Сарокіна затрымалі 19 лістапада. Кацярына Барысевіч была аўтаркай артыкулу, дзе гаварылася, што ў крыві загінулага Рамана Бандарэнкі не было алькаголю. Інфармацыю пра гэта ёй перадаў лекар Арцём Сарокін, які тым самым зьняпраўдзіў словы ўладаў, нібыта падчас бойкі на «плошчы Пераменаў» Раман Бандарэнка быў пʼяны.

Паводле матэрыялаў справы, Кацярына Барысевіч «бяз згоды пацыента або іншых упаўнаважаных асобаў» угаварыла лекара Арцёма Сарокіна даць вусную інфармацыю пра пацыента лякарні Рамана Бандарэнку і перадаць праз мэсэнджар Telegram фатакопіі мэдычнай дакумэнтацыі, усьведамляючы, што запрошаная ёй інфармацыя складае мэдычную тайну і яна ня мае права на яе атрыманьне і распаўсюд.

Дзеяньні Кацярыны Барысевіч кваліфікавалі паводле ч. 5 арт. 16 і ч. 3 арт.178 Крымінальнага кодэксу Рэспублікі Беларусь, Арцёма Сарокіна — па ч. 3 ст.178 КК.

Крымінальную справу па факце гібелі Рамана Бандарэнкі распачалі толькі праз 100 дзён пасьля ягонай сьмерці. «Датычнасьць супрацоўнікаў органаў унутраных спраў да прычыненьня Бандарэнку Р. І. цялесных пашкоджаньняў ня выяўленая», — адзначана ў паведамленьні Генпракуратуры.

Што вядома пра сьмерць Рамана Бандарэнкі

Раман Бандарэнка
Раман Бандарэнка
  • Невядомыя ў масках пачалі зразаць бел-чырвона-белыя стужкі ў двары на вуліцы Чарвякова ўвечары 11 лістапада.
  • Пасьля вэрбальнага канфлікту зь мясцовымі жыхарамі невядомыя пачалі нападаць і біць жыхароў. Каля 22:16 некалькі чалавек забралі і зьвезьлі на бусах, падобных да тых, якімі карыстаюцца сілавікі.
  • Паводле непацьверджанай інфармацыі, каля 1,5 гадзіны Бандарэнка знаходзіўся ў Цэнтральным РУУС Менску.
  • У 0:05 Раман Бандарэнка паступіў у лякарню хуткай мэдычнай дапамогі зь вялікім ацёкам мозгу, закрытай чэрапна-мазгавой траўмай, субдуральнымі гематомамі, ударамі, абдзірынамі.
  • Паводле лекараў, ён быў у затарможаным стане, але ў апэрацыйную яго ўжо прывезьлі ў коме. Апэрацыя цягнулася некалькі гадзін.
  • Раман быў у крытычным стане.
  • ​ГУУС Менгарвыканкаму сьцьвярджае, што міліцыя прыбыла на месца толькі пасьля здарэньня. Рамана знайшлі непрытомнага і выклікалі хуткую. Адзін са сьведак здарэньня расказаў Свабодзе, што міліцыя прыяжджала яшчэ тады, калі невядомыя зразалі стужкі, «аднак хутка зьехала, нічога не зрабіўшы».
  • Сьледчы камітэт заявіў, што мужчына быў пʼяны. Аднак мэдыкі гэтую заяву абверглі — у крыві Бандарэнкі алькаголю не было.
  • 19 лістапада затрымалі журналістку Tut.by Кацярыну Барысевіч і лекара Арцёма Сарокіна. Кацярына Барысевіч была аўтаркай артыкула, дзе гаварылася, што ў крыві загінулага Рамана Бандарэнкі не было алькаголю. Інфармацыю пра гэта ёй перадаў лекар Арцём Сарокін. Пачатак суду над імі прызначаны на 19 лютага.
  • 18 лютага 2021 году, на соты дзень пасьля сьмерці Рамана, Генпракуратура паведаміла яго маці Алене Бандарэнцы, што па факце сьмерці яе сына пачалі крымінальную справу.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG