Лінкі ўнівэрсальнага доступу

У Гішпаніі расьследуюць расейскія сувязі каталёнскіх сэпаратыстаў


Дэманстрацыя прыхільнікаў незалежнасьці Каталёніі, кастрычнік 2017

Адзін з арыштаваных нядаўна лідэраў сэпаратысцкага руху сьцьвярджае, што расейскія агенты прапаноўвалі даць у распараджэньне Барсэлёны 10 тысяч салдат для ўдзелу ў ваенным канфлікце з Мадрыдам. Пра гэта паведамляе «Голас Амэрыкі».

Згодна з матэрыяламі, пададзенымі ў гішпанскі суд, расейскія агенты прапаноўвалі вайсковую дапамогу каталёнскім сэпаратыстам у разгар няўдалай спробы ўраду Пудждэмона вывесьці рэгіён са складу Гішпаніі ў 2017 годзе. Гэтыя экстраардынарныя сьцьвярджэньні ляглі ў аснову расьсьледаваньня, распачатага судом у Барсэлёне, меркаванай сувязі паміж удзельнікамі руху за незалежнасьць Каталёніі і дэзынфармацыйнай кампаніяй, ініцыяванай Масквой для дэстабілізацыі Эўропы.

У сераду на загад судзьдзі Хаакіна Агірэ ў Барсэлёне арыштавалі 21 падазраванага ў гэтай справе, у тым ліку трох чалавек, якія ўваходзілі ў атачэньне экс-кіраўніка Каталёніі Карлеса Пудждэмона. Былы кіраўнік рэгіёну неўзабаве пасьля правалу спробы абвяшчэньня незалежнасьці Каталёніі ўцёк з Гішпаніі ў 2017 годзе. Цяпер ён жыве ў Бэльгіі і зьяўляецца дэпутатам Эўрапарлямэнту.

Тагачасны прэзыдэнт Каталёніі Карлес Пудждэмон падпісвае дэклярацыю ад незалежнасьці, 10 кастрычніка 2017
Тагачасны прэзыдэнт Каталёніі Карлес Пудждэмон падпісвае дэклярацыю ад незалежнасьці, 10 кастрычніка 2017

Паводле судовых матэрыялаў, адзін з падазраваных згадаў прапанову, якая нібыта паступіла яму ад нейкіх расейскіх агентаў. Расейцы прапаноўвалі даць у распараджэньне Пудждэмона 10 тысяч салдатаў для дапамогі ў тэарэтычна магчымым ваенным канфлікце з войскам Гішпаніі. Прапанова так і не была рэалізаваная.

«Расейскае ўмяшаньне як геапалітычная стратэгія фактычна пачалося восеньню 2017 году, калі расейцы сталі распаўсюджваць фэйкавыя навіны і дэзынфармацыю», — гаворыцца ў рашэньні судзьдзі Агірэ, які спаслаўся на публікацыю ў інтэрнэце матэрыялаў у падтрымку каталёнскіх сэпаратыстаў, якія распаўсюджваюцца расейскімі навіновым плятформамі.

У 2017 годзе гішпанскі ўрад абвінаваціў Расею ва ўмяшаньні ў каталёнскі канфлікт — расейскія афіцыйныя асобы гэтыя абвінавачаньні нязьменна адмаўлялі.

Амбасада Расеі ў Мадрыдзе зрабіла рэтвіт рашэньня барсэлёнскага судзьдзі, суправадзіўшы яго зьедлівым камэнтаром: «Увага: інфармацыя, якая зьявілася ў гішпанскіх СМІ аб прыбыцьці ў Каталёнію 10 тысячаў расейскіх салдатаў, зьяўляецца няпоўнай. Да ліку салдат трэба дадаць два нулі, і самае дзіўнае з усёй гэтай змовы: войскі павінны быць перакінутыя на самалётах „Муха“ і „Чата“, сабраных у Каталёніі падчас грамадзянскай вайны і схаваных у бясьпечным месцы ... да атрыманьня праз гэтыя публікацыі зашыфраванага загаду дзейнічаць».

Хоць расьсьледаваньне тычыцца падзеяў трохгадовай даўнасьці, якія пагражалі разбурыць адну з найбуйнейшых эканомік Эўропы, яно можа паўплываць на цяперашнюю складаную палітычную сытуацыю ў Гішпаніі.

Левы кааліцыйны ўрад Гішпаніі залежыць ад каталёнскай сэпаратысцкай партыі «Левая рэспубліка Каталёнія» (Esquerra Republicana de Catalunya, ЕRC) для працягу перамоваў аб прыняцьці бюджэту на 2021 год. Пасьля пандэміі COVID-19 гэты бюджэт мае вырашальнае значэньне для фінансаваньня аднаўленьня краіны.

«Відавочна, што ўрад Гішпаніі не зацікаўлены ў пошуку рашэньня канфлікту з Каталёніяй», — сказаў «Голасу Амэрыкі» Рауль Мурса, прадстаўнік ERC.

Рэгіянальныя выбары ў Каталёніі заплянаваныя на люты. Згодна зь нядаўнімі апытаньнямі, сэпаратысцкія партыі, хутчэй за ўсё, атрымаюць большасьць, але ня больш за 50% галасоў выбарнікаў.

Расьсьледаваньне таксама вядзецца ў дачыненьні да меркаванага неправамернага выкарыстаньня дзяржаўных сродкаў для падтрымкі сэпаратысцкага руху ў Гішпаніі, а таксама меркаванай актыўнай ролі Расеі ў кампаніях па распаўсюду дэзынфармацыі з мэтай дыскрэдытацыі Мадрыду.

Арыштаваным прад’явілі абвінавачаньні ў крадзяжы і адмываньні сродкаў.

У ходзе сьледзтва высьветлілася, што грошы, прызначаныя для фінансаваньня адміністрацыі правінцыі Барсэлёна, якая ўваходзіць у склад Каталёніі, а таксама рэгіянальнай арганізацыі, якая падтрымлівае разьвіцьцё спартовых камандаў, былі незаконна выкарыстаныя не па прызначэньні. Гішпанскі ўрад паведаміў пра гэта пасьля нядаўніх арыштаў.

Адзін з арыштаваных сэпаратыстаў — Арыёль Салеры, мэдыявыдавец, якога лічаць адным зь вядучых стратэгаў сэпаратысцкага руху.

Салеры знаходзіцца пад сьледзтвам па абвінавачваньні ў тым, што ён нібыта сустракаўся з расейскімі прадстаўнікамі і заснавальнікам WikiLeaks Джуліянам Асанжам, калі той шукаў прытулку, знаходзячыся ў амбасадзе Эквадору ў Лёндане, каб папулярызаваць ідэі сэпаратызму і дыскрэдытаваць Гішпанію на міжнародным узроўні.

Джуліян Асанж
Джуліян Асанж

У апублікаваным судовым дакумэнце гаворыцца, што меркаваная сустрэча Салеры і Асанжа ў верасьні 2017 году адбылася з мэтай распрацоўкі «стратэгіі дэзынфармацыі і дэстабілізацыі, у якой таксама ўдзельнічаў Крэмль... Галоўным пасланьнем кантраляваных Крамлём інфармацыйных агенцтваў было сьцьвярджэньне аб тым, што Эўразьвяз знаходзіцца на мяжы краху».

Бэнэт Салелас, адвакат Салеры, заяўляе аб невінаватасьці яго кліента і «асуджае выкарыстаньне сыстэмы правасудзьдзя для барацьбы з рухам за незалежнасьць Каталёніі».

Пытаньне аб незалежнасьці раскалола 7,5 мільёна жыхароў рэгіёну. Падчас нядаўняга сацапытаньня, праведзенага рэгіянальным урадам у гэтым месяцы, 46,3% каталёнцаў выступілі супраць аддзяленьня ад Гішпаніі, а 45,5% падтрымалі незалежнасьць рэгіёну.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG