Лінкі ўнівэрсальнага доступу

Сайты бяз фота. Эўрапарлямэнт заклікае да санкцый. Ціханоўская складае «сьпіс Тарайкоўскага». Што адбываецца ў Беларусі

Што адбываецца ў 40-ы дзень беларускіх пратэстаў супраць фальсыфікацыі прэзыдэнцкіх выбараў.


22:19 17.9.2020

Затрымалі некалькі супрацоўнікаў «Гродна Азот», у іх дома прайшлі ператрусы

Стала вядома, што сёньня на «Гродна Азот» затрымалі некалькі чалавек, у іх дома прайшлі ператрусы. Прычына пакуль невядомая. На тэрыторыі заводу нехта чарговым разам вывесіў бел-чырвона-белы сьцяг.

21:48 17.9.2020

«30% — гэта сілавікі». Хто зьвяртаецца па дапамогу да фондаў беларускай салідарнасьці і як яны працуюць

Кіраўнік PandaDoc Мікіта Мікада заявіў, што з прычыны арыштаў супрацоўнікаў кампаніі ў Беларусі прыпыніў праект дапамогі сілавікам, якія вырашылі звольніцца на фоне затрыманьняў і зьбіваньня пратэстоўцаў. Праект Protect Belarus прапаноўваў сілавікам, якія звольніліся, фінансавую і юрыдычную дапамогу, а таксама аплату курсаў перакваліфікацыі. Працягнуць справу Мікада мае намер адзін з кіраўнікоў стартапу Deepdee Яраслаў Ліхачэўскі.

Чым і як дапамагае фонд, заснаваны Мікітам Мікада, каму ўжо дапамог і на якія сумы, а таксама аб працы іншых фондаў у эфіры «Настоящего времени» расказаў Андрэй Стрыжак, сузаснавальнік Фонду салідарнасьці, сябра Каардынацыйнай рады. Чытайце па спасылцы.

21:45 17.9.2020

Бяляцкі: «Мы цяпер перажываем сапраўдную прававую і цывілізацыйную катастрофу»

Амбасадар Польшчы ад імя Таварыства Яна Карскага 17 верасьня ўручыў Праваабарончаму цэнтру «Вясна» прэстыжную польскую прэмію «Арол Яна Карскага» — «за шматгадовую абарону правоў чалавека, годнасьці і дэмакратыі».

«Мы цяпер перажываем сапраўдную прававую і цывілізацыйную катастрофу, калі зачыняюцца тэатры, разганяюцца працоўныя калектывы, аказваецца ціск на рэлігійную частку нашага грамадзтва, найперш на каталікоў, — заявіў старшыня «Вясны» Алесь Бяляцкі. — Цяпер у Беларусі адбываецца катастрофа, калі ўзброеныя да зубоў спэцатрады тэрарызуюць беларускае грамадства».

Паводле Бяляцкага, толькі сёньня па адміністрацыйных справах каля тысячы чалавек знаходзяцца ў турмах Менску і Жодзіна, больш за 250 чалавек знаходзяцца зараз у СІЗА ці зьяўляюцца падазраванымі пад падпіскай па крымінальных справах. Рэпартаж з уручэньня прэміі чытайце па спасылцы.

20:44 17.9.2020

Лукашэнка заявіў пра закрыцьцё межаў зь Літвой і Польшчай, узмацненьне мяжы з Украінай

«Беларусь ня стане на калені, нават калі застанецца ў адзіночку. Аб гэтым Аляксандар Лукашэнка заявіў, выступаючы на жаночым форуме „За Беларусь“», — паведамляе БЕЛТА.

«Мы вымушаныя адвесьці войскі з вуліц, паўвойска паставіць пад ружжо і закрыць дзяржаўную мяжу з захаду, перш за ўсё зь Літвой і Польшчай. Мы вымушаныя ўзмацніць дзяржаўную мяжу, на вялікі жаль, з нашай брацкай Украінай».

Што азначаюць словы Лукашэнкі на практыцы, пакуль незразумела.

Падчас выступу Лукашэнка таксама заявіў, што яму не патрэбнае прызнаньне выбараў іншымі дзяржавамі, і пахваліў АМАП. «Нібыта на Акрэсьціна яны нешта пабілі, кагосьці забілі. Амапаўцы ніколі не дзяжураць, ніколі не былі ні ў СІЗА, ні на Акрэсьціна. Там нясуць службу вайскоўцы ўнутраных войскаў. Амапаўцы, гэтыя хлопцы сарвалі бліцкрыг пад бел-чырвона-белымі сьцягамі».

19:43 17.9.2020

У АБСЭ рыхтуецца маніторынгавая місія для расьсьледаваньня падзеяў у Беларусі

17 краін — чальцоў АБСЭ сёньня заявілі аб ініцыяваньні Маскоўскага мэханізму ў АБСЭ для расьсьледаваньня падзеяў у Беларусі. Першы раз Маскоўскі мэханізм у дачыненьні да Беларусі быў ініцыяваны ў красавіку 2011 году, пасьля масавых рэпрэсіяў, якія адбыліся пасьля выбараў 2010 году.

Па правілах АБСЭ мэханізм можа быць запушчаны 10-ю дзяржавамі-ўдзельніцамі без папярэдніх перамоваў зь дзяржавай, адносна якой прапануецца правесьці дасьледаваньне.

Бэльгія, Канада, Чэхія, Данія, Фінляндыя, Францыя, Ісьляндыя, Латвія, Літва, Нарвэгія, Нідэрлянды, Польшча, Румынія, Славаччына, Вялікая Брытанія і ЗША ў сумеснай заяве падтрымалі ідэю спрыяньня нацыянальнаму дыялёгу ў Беларусі. Краіны — чальцы АБСЭ неаднаразова зьвярталіся да беларускага боку, але іх звароты засталіся без адказу. Цалкам чытайце тут.

19:40 17.9.2020

Да лістапада экспэртная група вырашыць, ці варта праводзіць хакейны чэмпіянат сьвету ў Менску

Міжнародная фэдэрацыя хакею на паседжаньні ў Цурыху, сярод іншага, вырашала лёс сумеснага чэмпіянату сьвету 2021 году ў Менску і Рызе.

Раней урад Латвіі накіраваў у штаб-кватэру фэдэрацыі ліст, у якім было заяўлена, што краіна супраць таго, каб празь цяперашні гвалт у Беларусі частка форуму адбывалася там. Агучвалася прапанова перадаць такое права іншай краіне. Такім чынам, упершыню ў хакейнай гісторыі краіна-арганізатар заявіла пра нежаданьне ладзіць супольны турнір з палітычных прычын. Падрабязна тут.

19:39 17.9.2020

У Горадні дзяўчаты зладзілі акцыю ў падтрымку мурала «Жыве Беларусь»

Дзесяць дзяўчат у вясельных сукенках зь бел-чырвона-белымі сьцягамі зладзілі фатасэсію ў падтрымку мурала «Жыве Беларусь». Вялікае палатно ў белым і чырвоным колерах зьявілася на будынку каля турмы ў цэнтры Горадні (Кірава, 3). Аднак арандатары будынку дамовіліся яго прыбраць. Мурал пачалі счышчаць са сьцяны.

19:23 17.9.2020

«Адказнасьць нясе найвышэйшае кіраўніцтва Беларусі». Заклік дырэктара Ўсясьветнай арганізацыі супраць катаваньняў

Генэральны сакратар Усясьветнай арганізацыі супраць катаваньняў Джэральд Стэйброк заклікаў даць ацэнку дзеяньням рэжыму Лукашэнкі.

— Зафіксавана больш за 500 выпадкаў катаваньняў. Магчыма, іх нават больш, гэта тыя людзі, якія расказалі свае гісторыі. Тое, што адбывалася пасьля выбараў, — гэта сыстэматычныя, заплянаваныя катаваньні, учыненыя дзяржавай. Размова не ідзе пра асобны гнілы яблык у сыстэме. Мы бачым сплянаваны, арганізаваны гвалт, можна казаць пра палітыку брутальнасьці.

У міжнародным праве гэта называецца злачынствамі супраць чалавечнасьці. І гэта патрабуе міжнароднай увагі. Зараз беларуская дзяржава цалкам адмаўляе тое, што адбылося. Яны зьмянілі тактыку, але адмаўляюць гэта. Па ніводнай з гэтых спраў не вядзецца дасьледаваньне, ахвяры гвалту зазнаюць рэпрэсіі за ўдзел у нібыта незаконных дэманстрацыях, атрымліваючы за гэта сур’ёзнае пакараньне. Тое, што адбываецца ў Беларусі, — гэта крызіс правоў чалавека. Сьвет мае магчымасьць на яго адрэагаваць, узьняўшы пытаньне ў Радзе ААН па правах чалавека.

19:20 17.9.2020

«Бачу свае сьцягі на акцыях і вельмі ганаруся». Менчука будуць судзіць за шыцьцё бел-чырвона-белага сьцяга

Міліцыянты пад выглядам прадстаўнікоў фірмы заказалі ў менчука Аляксандра 10 бел-чырвона-белых сьцягоў ды правялі кантрольную закупку вырабу, зробленага на заказ. У выніку 21 верасьня Аляксандра чакае суд паводле абвінавачаньня ў незаконнай прадпрымальніцкай дзейнасьці. Яму пагражае вялікі штраф.

«Заказалі 10 сьцягоў, знайшлі толькі адзін ужо пашыты, а потым запатрабавалі, каб узяў на сябе 10 чужых. Адмовіўся, напісаў у пратаколе, што пашыў толькі адзін сьцяг. Тады зьдзекаваліся, пагражалі, рвалі пратаколы», — згадвае Аляксандар падзеі ў райаддзеле міліцыі пасьля «кантрольнай закупкі».

Пасьля візыту міліцыянтаў Аляксандар аформіўся як рамесьнік і працягвае шыць бел-чырвона-белыя сьцягі, якія дорыць сябрам альбо прадае. «Хутка зраблю соты сьцяг. На вуліцы бачу ў людзей свае сьцягі і вельмі гэтым ганаруся. Веру, што наш сьцяг стане дзяржаўным». Цалкам чытайце па спасылцы.

19:17 17.9.2020

«Прапанавалі запісацца на гурткі сьпеваў». У Горадні студэнтаў выклікалі на гутарку за «Муры» і «Грай»

Каля 15 студэнтаў з трох факультэтаў ГрДУ (гісторыі, камунікацыі і турызму; біялёгіі і экалёгіі; юрыдычнага) выклікалі на прафіляктычную гутарку да прарэктара ўнівэрсытэту па выхаваўчай рабоце Васіля Сянько. Як ананімна расказалі некалькі студэнтаў, іх выклікалі паасобку, размаўлялі па некалькі хвілін.

Размова тычылася сьпеваў на факультэце гісторыі, камунікацыі і турызму 9 верасьня. Тады на перапынку каля 15 чалавек засьпявалі ўнутры будынку «Муры», «Тры чарапахі», «Грай». У студэнтаў пыталіся, што яны рабілі з 13:00 да 13:30 9 верасьня і ці будуць яны яшчэ ўдзельнічаць у нечым падобным. Некаторыя адказвалі, што будуць, калі гэта не перашкодзіць вучобе і будзе адпавядаць іхняй грамадзянскай пазыцыі. Кіраўніцтва сказала навучэнцам, што тыя ўдзельнічалі ў незаконным масавым мерапрыемстве. Цалкам чытайце тут.

19:10 17.9.2020

Шмат каму на дзяржслужбе давядзецца альбо сябе памяняць, альбо сысьці, — былы супрацоўнік кіраўніцтва спраў прэзыдэнта

Анатоль Котаў звольніўся з пасады «па згодзе бакоў» 18 жніўня. Ён працаваў намесьнікам начальніка аддзелу фінансаваньня дзяржаўных органаў галоўнага фінансавага ўпраўленьня кіраўніцтва спраў прэзыдэнта Беларусі.

Котаў аддаў дзяржаўнай службе амаль 20 гадоў, але прызнаўся, што бліжэйшым часам працягваць яе не ўяўляецца магчымым. У інтэрвію тэлеканалу «Настоящее время» Анатоль Котаў растлумачыў свой учынак і расказаў, якія, на яго погляд, у беларускіх чыноўнікаў засталіся пэрспэктывы. Чытайце па спасылцы.

19:08 17.9.2020

У Менску мітынгуюць камуністы

На вуліцы Прытыцкага ў Менску сёньня сабраўся мітынг камуністаў. У мітынгоўцаў на расьцяжцы надпіс «Слава красной армии».

19:06 17.9.2020

Беларусы Гішпаніі запісалі відэазварот да землякоў

18:29 17.9.2020

Ціханоўская выступіць 21 верасьня на сустрэчы міністраў замежных спраў Эўразьвязу

21 верасьня Сьвятлана Ціханоўская выступіць на сустрэчы міністраў замежных спраў Эўразьвязу ў Брусэлі, паведаміў афіцыйны тэлеграм-канал «Страна для жизни», праект мужа Сьвятланы Ціханоўскай палітвязьня Сяргея Ціханоўскага.

21 верасьня Рада Эўразьвязу на ўзроўні кіраўнікоў МЗС разгледзіць сытуацыю ў Беларусі пасьля прэзыдэнцкіх выбараў, паведамляецца ў апублікаваным у Брусэлі праекце парадку пасяджэньня рады. «Рада абмяркуе апошнія палітычныя падзеі ў Беларусі, патэнцыйную падтрымку Эўразьвязам нацыянальнага інклюзіўнага дыялёгу, а таксама абноўленую інфармацыю аб фінансавай дапамозе Эўразьвязу народу Беларусі і кірунках перагляду адносін Эўразьвяз-Беларусь», — гаворыцца ў дакумэнце.

18:28 17.9.2020

Гомельскі журналіст Яўген Меркіс атрымаў 15 сутак арышту

17 верасьня суд Навабеліцкага раёну Гомля пакараў журналіста Яўгена Меркіса арыштам на 15 сутак за нібыта ўдзел у несанкцыянаваным мерапрыемстве. Суд над Меркісам праходзіў у будынку РАУС, туды нікога не пусьцілі.

Яўгена Меркіса затрымалі 14 верасьня разам з калегай Марынай Драбышэўскай. 15 верасьня суд пакараў Драбышэўскую арыштам на 10 сутак.

Апошні раз Яўгену Меркісу прысудзілі 5 сутак арышту 24 жніўня, абвінаваціўшы ў «парушэньні парадку правядзеньня масавага мерапрыемства». Да гэтага журналіст таксама быў затрыманы і мусіў адседзець 15 сутак, але яго адпусьцілі праз трое сутак.

Цяпер 8 журналістаў знаходзяцца за кратамі па адміністрацыйных прысудах.

18:27 17.9.2020

«Адзін са сьцягоў мне прысьніўся»: Як мянчанка стварыла 14 сьцягоў раёнаў за 14 гадзін і не спыняецца

Жыхары многіх гарадоў і раёнаў ствараюць цяпер сваю сымболіку. Мянчанка Тацяна за паўдня намалявала 14 такіх выяваў. Натхніла яе фота сьцяга сталічнай Грушаўкі. Цяпер Тацяну просяць маляваць яшчэ, людзі хочуць сваю сымболіку для раёнаў і асобных вуліц.

Адну ідэю Тацяна ўбачыла ў сьне: гэта сымболіка Пушкінскай — чалавек з раскінутымі рукамі і прабітым сэрцам.

Каб запраектаваць сьцяг, Тацяна вывучае «гісторыю месца», але шмат у якіх выпадках «хочацца дадаць нейкага крэатыву». Цалкам чытайце па спасылцы.

17:57 17.9.2020

Ціханоўская выступіць 21 верасьня на сустрэчы міністраў замежных спраў Эўразьвязу

21 верасьня Сьвятлана Ціханоўская выступіць на сустрэчы міністраў замежных спраў Эўразьвязу ў Брусэлі, паведаміў афіцыйны Тэлеграм-канал «Страна для жизни», праект мужа Ціханоўскай палітвязьня Сяргея Ціханоўскага.

17:48 17.9.2020

Перад праўладным канцэртам у Менску

17:36 17.9.2020

У Беларусі палітычнымі вязьнямі прызнаныя яшчэ 12 чалавек. Агулам іх ужо 70

Праваабаронцы прызналі палітычнымі зьняволенымі 12 чалавек, якім выставілі абвінавачаньні ў «масавых беспарадках» (арт. 293 КК РБ), піша праваабарончы цэнтар «Вясна».

Гэта Cяргей Капанец, Дзяніс Кірэшчанка, Аляксей Караткоў, Станіслаў Міхайлаў, Алена Маўшук, Алег Мазгоў, Дэвід Масьціцкі, Мікалай Сасеў, Ігар Салавей, Ягор Сугойдзь, Дзяніс Чыкалёў і Вячаслаў Шэлямет.

17:21 17.9.2020

МЗС Беларусі пракамэнтавала рэзалюцыю Эўрапарлямэнту па сытуацыі ў Беларусі

«Мы расчараваныя тым, як Эўрапарлямэнт, які пазыцыянуе сябе ў якасьці сур’ёзнай, абʼектыўнай і дэмакратычнай структуры, ня змог знайсьці ў сабе палітычнай волі зазірнуць далей за свой нос, пераадолець аднабокасьць і ня стаць закладнікам ходкіх штампаў», — гаворыцца ў афіцыйным камэнтары на сайце МЗС.

«Недасканаласьць заклікаў да санкцый і згортваньня адносін для інтарэсаў людзей з Эўропы і Беларусі зусім відавочная. Але зразумела, што эўрапарлямэнтары, у адрозьненьне ад бізнэсу і простых грамадзян, на сабе гэта не адчуюць, таму так лёгка жанглююць гэтымі катэгорыямі. Але на ўсё ёсьць суд гісторыі», — гаворыцца ў камэнтары МЗС. Цалкам чытайце тут.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG