Лінкі ўнівэрсальнага доступу

Сайты бяз фота. Эўрапарлямэнт заклікае да санкцый. Ціханоўская складае «сьпіс Тарайкоўскага». Што адбываецца ў Беларусі

Што адбываецца ў 40-ы дзень беларускіх пратэстаў супраць фальсыфікацыі прэзыдэнцкіх выбараў.


17:09 17.9.2020

У БНТУ супрацоўнікам забаранілі выказваць свае палітычныя сымпатыі і выкарыстоўваць «недзяржаўную сымболіку»

Рэктар Беларускага нацыянальнага тэхнічнага ўнівэрсытэту (БНТУ) Сяргей Харытончык зацьвердзіў правілы прафэсійнай этыкі супрацоўнікаў, паведамляе БелаПАН. Згодна зь імі, работнікам ВНУ забараняецца:

  • «публічна выказваць свае сымпатыі і антыпатыі» палітычным партыям, грамадзкім аб’яднаньням, якія маюць палiтычныя мэты,
  • выкарыстаньне недзяржаўнай сымболікі і «незаконныя дзеяньні ў дачыненьні да дзяржаўных сымбаляў»,
  • на тэрыторыі БНТУ нельга праводзіць масавыя мерапрыемствы (мітынгі, шэсьці, дэманстрацыі, пікеты, спартовыя, культурныя, рэлігійныя акцыі) без узгадненьня з адміністрацыяй ВНУ,
  • работнік БНТУ ня мае права выдаваць інфармацыю аб дзейнасьці ўнівэрсытэта і зьвесткі аб прыватным жыцьці яго работнікаў, выкарыстоўваць яе з мэтамі, не зьвязанымі з выкананьнем службовых абавязкаў,
  • у непрацоўны час работнікі павінны «устрымацца ад дзеяньняў і выказваньняў», якія могуць нашкодзіць рэпутацыі БНТУ ці скампрамэтаваць, паставіць пад сумнеў кампэтэнтнасьць і бесстароннасьць ВНУ.

За невыкананьне правілаў работнік нясе «дысцыплінарную адказнасьць у адпаведнасьці з заканадаўствам».

17:07 17.9.2020

Польшча і Літва падпісалі дэклярацыю пра Беларусь

Прэм'ер-міністры Польшчы і Літвы Матэвуш Маравецкі і Саўлюс Сквярняліс падчас міжурадавых кансультацый падпісалі дэклярацыю аб стратэгічным партнэрстве і Беларусі.

Бакі выказалі ў дэклярацыі падтрымку сувэрэнітэту, незалежнасьці і тэрытарыяльнай цэласнасьці Беларусі, паведамляе Польскае агенцтва друку. Урады Польшчы і Літвы таксама падтрымліваюць імкненьне беларускага народу жыць у свабоднай і дэмакратычнай дзяржаве, якая кіруецца лідэрамі, абранымі на свабодных і справядлівых выбарах.

Урады асудзілі гвалт і заклікалі як мага хутчэй правесьці свабодныя і справядлівыя прэзыдэнцкія выбары.

16:48 17.9.2020

Тры найбуйнейшыя фракцыі Эўрапарлямэнту падтрымалі вылучэньне беларускай апазыцыі ў постаці Каардынацыйнай рады на прэмію Сахарава

«Мы падтрымліваем народ Беларусі ў барацьбе за годнасьць, свабоду і дэмакратыю», — гаворыцца ў афіцыйным Twitter фракцыі Эўрапейскай народнай партыі.

15:29 17.9.2020

Палітвязень Павал Севярынец адмовіўся даваць паказаньні ў СІЗА

Палітвязьня вадзілі на першы і пакуль што апошні допыт, падчас якога ён адмовіўся даваць паказаньні. Пра гэта Павал Севярынец напісаў у лісьце, які даслаў з-за кратаў журналістцы «Новага Часу».

Паўла Севярынца затрымалі напачатку чэрвеня ў пікеце за альтэрнатыўных кандыдатаў на пасаду прэзыдэнта Беларусі. Ад таго часу ён знаходзіўся ў ізалятары на Акрэсьціна, дзе яму дадавалі ўсё новыя адміністрацыйныя арышты. Амаль увесь час зьняволеньня там ён правёў у карцары. 20 жніўня стала вядома, што на Севярынца заведзена крымінальная справа, яго абвінавачваюць паводле ч.2 арт.293 Крымінальнага кодэксу — «масавыя беспарадкі». Падрабязнасьці тут.

15:22 17.9.2020

«За імі нашая краіна». Непаўналетнюю гарадзенку затрымалі падчас «Маршу герояў» і апыталі без бацькоў

Пятнаццацігадовую Паліну Курс затрымалі ў Горадні разам з 25-гадовай сястрой Маргарытай 13 верасьня. Дзяўчыну апытвалі без прысутнасьці бацькоў.

Як расказала Паліна, яна разам з сястрой Маргарытай ішла ў заалягічную краму ў раёне вуліцы Горкага. Побач праходзіла калёна пратэстоўцаў, пачаліся затрыманьні. Амапаўцы хацелі схапіць пажылую жанчыну, дзяўчаты за яе заступіліся. Урэшце затрымалі і абедзьвюх дзяўчат, і бабулю. Ім заламалі рукі і адвялі ў аўтазак. Маргарыце сарвалі з твару маску, яна згубіла пры затрыманьні красоўку.

У Ленінскім РАУС іх сфатаграфавалі, перапісалі асабістыя дадзеныя.На дзьве гадзіны Паліну забралі ад старэйшай сястры ў асобны кабінэт. Яе адзін на адзін апытваў інспэктар па справах непаўналетніх, як яна зразумела. У гэты час у кабінэце не было ні бацькоў, ні сацыяльнага пэдагога ці псыхоляга. Пасьля апытаньня пазванілі ейнаму бацьку і перадалі дзяўчыну ў ягоныя рукі. Маргарыту дагэтуль ня выпусьцілі, яе перавялі ў ізалятар часовага ўтрыманьня на вуліцы Гая да суду. Суд яшчэ не адбыўся. Перадачы для яе не прынялі. Цалкам чытайце тут.

15:14 17.9.2020

Міліцыя затрымала мужчыну, які не даваў прыбраць бела-чырвона-белыя стужкі ў сваім двары. ВІДЭА

15:05 17.9.2020

32-гадовы мянчук страціў частку ступні ад выбуху сьвятлашумавой гранаты

Ноччу 10 жніўня Георгі Сайкоўскі вяртаўся дадому каля мэтро «Пушкінская»​ ў Менску. Калі да пад’​езду заставалася 200 мэтраў, у яго пад нагамі выбухнула сьвятлашумавая граната. Людзі дапамаглі дабрацца да лякарні.

Раніцай хлопец зразумеў, што пасьля апэрацыі ў яго фактычна не засталося ступні. Наперадзе ў Георгія цяжкі працэс рэабілітацыі.

15:04 17.9.2020

Дзьвюм лекаркам-анколягам, затрыманым на жаночым маршы, прысудзілі па 11 сутак

12 верасьня мэдыкаў Ангеліну Адамоніс і Валянціну Харытонаву затрымалі на жаночым маршы, а пазьней асудзілі кожную на 11 сутак, паведамляе «Эўрарадыё».

Ангеліна Адамоніс — цытагенэтык РНПЦ дзіцячай анкалёгіі, спэцыяліст у галіне спадчынных захворваньняў і паталёгій.

«Яны павінны займацца лячэньнем дзяцей, а не сядзець у камэрах, — абураецца яе брат Аляксандар. — Іх затрымалі ў самым пачатку маршу. Яны падышлі ў раён станцыі мэтро „Грушаўка“ і праз 15 хвілін апынуліся ў аўтазаку. Дзяўчат акружылі сілавікі і сталі „выдзіраць“. Ангеліна сказала, што затрыманьне было жорсткім, але ў аўтазаку ня білі».

Пасьля затрыманьня Ангеліна і Валянціна правялі двое сутак у менскім ізалятары на завулку Акрэсьціна. 14 верасьня іх судзілі за ўдзел у несанкцыянаваным масавым мерапрыемстве і пакаралі 11 суткамі адміністрацыйнага арышту. Затым перавезьлі зь Менска ў Жодзіна.

«Ангеліна падпісала пратакол. Валянціна не падпісала, выклікала адваката. Але абедзьвюм далі па 11 сутак. Я падаў скаргу на перагляд прысуду, папрасіў, каб у РНПЦ напісалі ад імя дырэктара хадайніцтва, што дзяўчаты працуюць у цэнтры — адзіным такім у краіне», — паведаміў Аляксандар Адамоніс.

Ангеліна і Валянціна павінны выйсьці з ізалятару 23 верасьня.

15:04 17.9.2020

Што скажуць Лукашэнку сябры Рады

Адзін з лідэраў Каардынацыйнай рады, былы віцэ-прэзыдэнт амэрыканскай ІТ-кампаніі зь беларускімі каранямі EPAM Максім Баграцоў і сябра асноўнага складу Кааардынацыйнай рады, культурная экспэртка, трэнерка па бізнэс-камунікацыі Аксана Зарэцкая адказалі на пытаньні Свабоды і чытачы тэлеграм-каналу і youtube-каналу Свабоды.

14:33 17.9.2020

Плятформа «Голас» праводзіць апытаньне згодных са статусам Каардынацыйнай рады як свайго прадстаўніка

Дзеля гэтага да 22 верасьня трэба прайсьці на плятформе ананімнае апытаньне ў падтрымку рады, каб прызнаць яе ўпаўнаважаным прадстаўніком народу ў дыялёгу з уладамі.

Раней у атачэньні Аляксандра Лукашэнкі заявілі: калі пратэставы рух хоча стаць рэальнай палітычнай сілай, ён мусіць аформіцца ў легальны інстытут.

«Відавочна, што Беларусь апынулася ў палітычным крызісе. Адзіны выхад з сытуацыі — дыялёг. Каардынацыйная рада стваралася з ініцыятывы Сьвятланы Ціханоўскай якраз для вырашэньня крызісу і арганізацыі дыялёгу. Давайце разам паскорым працэс!», — заклікае каманда «Голасу».

14:32 17.9.2020

Эўразійскі банк гатовы ў выпадку санкцыяў выручыць Беларусь


Падзяліцца
Глядзець камэнтары

Друкаваць

Эўразійскі банк разьвіцьця (ЭАБР) будзе гатовы разгледзець магчымасьць замяшчэньня Эўрапейскага банку рэканструкцыі і разьвіцьця (ЭБРР), калі той выйдзе з праектаў у Беларусі, паведаміў агенцтву «Інтэрфакс-Захад» намесьнік старшыні праўленьня ЭАБР Андрэй Крайні.

Ён дадаў, што ў «банка ўжо ёсьць такі вопыт у Расейскай Фэдэрацыі, калі Эўрапейскі банк рэканструкцыі і разьвіцьця вырашыў спыніць сваю дзейнасьць з прычыны рэжыму санкцыяў».

Цяпер у крэдытным партфэлі ЭАБР Беларусі (краіна далучылася да банку ў 2009 годзе, ад гэтага часу ў Менску разьмешчана яго прадстаўніцтва — ІФ) належыць 22,7%, наперадзе — Расея (36,3%) і Казахстан (38,1%), адзначыў Крайні. «За апошні час мы істотна нарасьцілі фінансаваньне праектаў у краіне. На сёньня бягучы інвэстыцыйны партфэль складае $ 971,1 млн. Усяго ў разьвіцьцё Беларусі ЭАБР уклаў $ 1 млрд 815,8 млн», паінфармаваў ён.

Эўрапарлямэнт прыняў 17 верасьня рэзалюцыю, якая прадугледжвае спыненьне апэрацыяў ЭБРР і Эўрапейскага інвэстыцыйнага банку зь дзяржаўным сэктарам Беларусі.

14:10 17.9.2020

Эўрапарлямэнт не пагадзіўся лічыць Лукашэнку прэзыдэнтам і прапанаваў санкцыі

17 верасьня на пасяджэньні сэсіі Эўрапарлямэнту дэпутаты прынялі рэзалюцыю аб Беларусі, у якой пацьвердзілі, што не прызнаюць вынікаў прэзыдэнцкіх выбараў і што пасьля заканчэньня тэрміну паўнамоцтваў Аляксандра Лукашэнкі Эўрапарлямэнт ня будзе лічыць яго прэзыдэнтам.

Эўрапарлямэнт рэкамэндаваў Эўракамісіі:

  • павялічыць фінансаваньне грамадзянскай супольнасьці Беларусі;
  • замарозіць трансфэры сродкаў Эўразьвязу дзяржаўным і падкантрольным ураду структурам;
  • спыніць пазыкі ўраду ад Эўрапейскага інвэстыцыйнага банку і ЭББР;
  • арганізаваць канфэрэнцыю донараў для дэмакратычнай Беларусі, дзе разгледзець «шматмільярдны фінансавы пакет» для падтрымкі будучых рэформаў;
  • прыпыніць зь Беларусьсю перамовы аб прыярытэтах эўрапейскага партнэрства;
  • стварыць гуманітарны калідор і спрасьціць выдачу візаў палітычным уцекачам і тым, хто мае патрэбу ў мэдычнай дапамозе пасьля гвалту;
  • распрацаваць у Эўропе адмысловую стыпэндыяльную праграму для студэнтаў, выключаных зь беларускіх ВНУ з палітычных матываў;
  • заклікаць не праводзіць у Беларусі частку чэмпіянату сьвету ў хакеі ў 2021 годзе.

    Эўрапарлямэнт заклікаў таксама інстытуты Эўразьвязу і ўрады краін ЭЗ «вывучыць магчымасьць пашырэньня санацыйнага сьпісу на прадмет уключэньня расейскіх грамадзян, якія непасрэдна ўдзельнічаюць у падтрымцы рэжыму Лукашэнкі ў Беларусі».

    За рэзалюцыю прагаласавалі 574 дэпутатаў, супраць – 37, устрымаліся – 82 .

13:53 17.9.2020

Дырэктар Інстытуту сацыялёгіі напісаў заяву на звальненьне. Раней ён заявіў пра рэйтынг Лукашэнкі ў 24%

Генадзь Коршунаў піша на Facebook, што апошнім днём яго працы ў інстытуце будзе 18 верасьня. Прычыны ён не называе: «сёлета абставіны склаліся такім чынам», што яму давялося «прасіць звольніць паводле згоды бакоў».

Коршунаў у чэрвені пацьвярджаў, што рэйтынг даверу Лукашэнку быў яшчэ да пачатку эпідэміі каранавірусу на ўзроўні 24% у Менску

13:40 17.9.2020

Сьледчы, які пасьля выбараў звольніўся на знак пратэсту, папрасіў палітычнага прыстанішча ў Польшчы

27-гадовы Андрэй Астаповіч служыў у Следчым камітэце Беларусі і звольніўся 16 жніўня, пасьля пачатку масавых пратэстаў па выніках прэзыдэнцкіх выбараў, разгону дэманстрантаў, катаваньняў і забойстваў.

Астаповіч прыехаў у Расею, каб пасьля перабрацца ў Латвію, але ў чаканьні візы быў затрыманы ў Пскове. Пасьля шуму ў прэсе расейскія сілавікі не адважыліся перадаць яго ў рукі беларускім калегам, а проста перавезьлі празь мяжу і пакінулі каля памежных пунктаў у Віцебскай вобласьці.

15 верасьня стала вядома, што былы сьледчы доўга хаваўся ў лясах Беларусі, пасьля чаго знайшоў спосаб выбрацца на тэрыторыю Эўразьвязу і трапіць у Варшаву

13:24 17.9.2020

Рада Міжнароднай фэдэрацыі хакею абмяркуе, ці праводзіць у Беларусі ЧС-2021

Сёньня адбудзецца пасяджэньне Рады Міжнароднай фэдэрацыі хакею (ІІХФ). Адным з галоўных пытаньняў стане правядзеньне ЧС-2021.

У пачатку жніўня віцэ-прэзыдэнт ІІХФ Калерва Кумала ўзьняў пытаньне аб зьмене месца правядзеньня турніру з прычыны падзеяў у Беларусі, яго падтрымала Латвія.

Таксама сёньня Эўрапарлямэнт будзе галасаваць па рэзалюцыі аб Беларусі. Дэпутаты заклікаюць перанесьці зь Менску ЧС-2021.

13:09 17.9.2020

Палітэмігрант Краўцоў патрабуе ад Сьледчага камітэту завесьці справу аб ягоным выкраданьні і незаконным пазбаўленьні волі

Антон Раднянкоў і Іван Краўцоў
Антон Раднянкоў і Іван Краўцоў

Выканаўчы сакратар Каардынацыйнай рады Іван Краўцоў, які 7 верасьня разам з калегам Антонам Раднянковым быў затрыманы спэцслужбамі і прымусова выпраўлены ва Ўкраіну, накіраваў заяву ў Сьледчы камітэт з патрабаваньнем пачаць крымінальную справу аб выкраданьні і незаконным пазбаўленьні волі.

У тэксьце заявы, якая маецца ў распараджэньні Свабоды, Іван Краўцоў заявіў аб учыненых супраць яго 7 і 8 верасьня супрацьпраўных дзеяньнях.

«Гэтыя дзеяньні чыніліся невядомымі мне асобамі, частка якіх традыцыйна хавалася за маскамі. З таго, што цягам дня я ўтрымліваўся ў будынках дзяржаўных органаў — ГУБАЗіК МУС і ДФР КДК Беларусі — можна меркаваць, што да гэтага датычныя супрацоўнікі згаданых сілавых органаў», — мяркуе Іван Краўцоў.

Па яго словах, перасьлед у адносінах яго ніяк працэсуальна ня афармляўся. Ніякіх дакумэнтаў ён не падпісваў, таксама было адмоўлена ў выкліку адваката для аказаньня юрыдычнай дапамогі.

«У сувязі з гэтым дадзеныя дзеяньні нельга расцэньваць як затрыманьне ў парадку, якi прадугледжаны КаАП або КПК Беларусі. Такія захады невядомых асобаў маюць прыкметы перавышэньня ўлады і службовых паўнамоцтваў», — настойвае заяўнік.

Ён просіць прызнаць сябе пацярпелым і каб Сьледчы камітэт распачаў па апісаных фактах крымінальную справу для пакараньня вінаватых.

12:56 17.9.2020

Трэнэра, які прынёс Беларусі чатыры алімпійскія перамогі, пазбавілі імянной прэзыдэнцкай стыпэндыі

Ганна Гуськова і Мікалай Казека
Ганна Гуськова і Мікалай Казека

Аднаго з самых тытуляваных трэнэраў Беларусі, нязьменнага кіраўніка зборнай фрыстайлістаў Мікалая Казеку пазбавілі імянной прэзыдэнцкай стыпэндыі, паведамляе Sport.tut.by са спасылкай на адпаведны дакумэнт.

У дакумэнце РЦАП па фрыстайле з подпісам дырэктара паведамляецца, што Мікалай Казека пазбаўлены імянной стыпэндыі прэзыдэнта. Акрамя таго, зь яго спаганяюць сродкі, выплачаныя «у пэрыяд з 2019/07/13 па 2020/06/02» (як адміністрацыйнае спагнаньне). У лісце яму прапануюць вярнуць гэтыя грошы ў добраахвотным дасудовым парадку.

У РЦАП па фрыстайле Tut.by пацьвердзілі сапраўднасьць дакумэнта, а таксама сказалі, што 16 верасня Казека быў азнаёмлены зь ім.

На дакумэнце ёсьць камэнтар за яго подпісам: «Зьвярнуўся да міністра зь лістом-зваротам па тлумачэньне сутнасьці прэтэнзій па вяртаньні атрыманых сродкаў».

12:37 17.9.2020

Супраць уласьнікаў будынку, дзе разьмяшчаўся штаб Бабарыкі, завялі крымінальную справу

Пра затрыманьне братоў Анішчанкаў, якія кіруюць кампаніяй «Белцяжмаш», стала вядома 16 верасьня.

Афіцыйная інфармацыя пра затрыманьне ўладальнікаў будынку, дзе разьмяшчаўся штаб Віктара Бабарыкі і Каардынацыйная рада, зьявілася ў тэлеграм-канале Камітэту дзяржкантролю.

«Дэпартамэнтам фінансавых расьсьледаваньняў Камітэта дзяржаўнага кантролю 16 верасьня 2020 году за ўхіленьне ад выплаты сум падаткаў у асабліва буйным памеры ў дачыненьні да службовых асобаў ЗАТ „Белцяжмаш“ распачата крымінальная справа паводле часткі 2 артыкулу 243 Крымінальнага кодэксу Рэспублікі Беларусь, — гаворыцца ў паведамленьні КДК. — Сума нявыплачаных падаткаў склала больш за 6 мільёнаў рублёў. Праз падазрэньне ў злачынстве затрымалі 5 асобаў, у тым ліку кіраўніка таварыства. Праводзяцца сьледчыя дзеяньні».

Кампаніі «Белцяжмаш» належыць будынак па вуліцы Харужай 25/1, дзе ад траўня разьмяшчаўся офіс выбарчага штабу Віктара Бабарыкі, а затым — Каардынацыйнай рады. Ігар Анішчанка таксама вядомы тым, што ў сакавіку 2017 году пагадзіўся спыніць будаўніцтва ў раёне ўрочышча Курапаты пасьля пратэсту жыхароў Менску.

12:35 17.9.2020

Старшыню суполкі Незалежнага прафсаюзу на «Белшыне» Сяргея Гурло, які галадае ў бабруйскім ізалятары супраць незаконнага зьняволеньня, пакінулі ў няволі яшчэ на два дні.

17 верасьня яго мусілі вызваліць пасьля 5 сутак адміністрацыйнага арышту за «ўдзел у несанкцыянаванай акцыі».

Інфармацыю пра тое, што 56-гадовы Гурло застанецца ў ізалятары даседжваць неадбытыя раней «суткі», пацьвердзілі ягонай жонцы Алене.
Пра ягоную галадоўку з 12 верасьня стала вядома ад выпушчаных з ізалятару пратэстоўцаў.

12:07 17.9.2020

Польшча адкрыла мяжу для беларусаў, умовай застаецца 10-дзённы карантын

Ад 17 верасьня ўсе грамадзяне Беларусі, якія маюць турыстычныя польскія і шэнгенскія візы, зноў могуць трапіць на тэрыторыю Польшчы, нягледзячы на тое, што захоўваецца карантын па каранавірусе.

Раней сьпіс грамадзян Беларусі, якія маюць права на ўезд на тэрыторыю Польшчы ва ўмовах каранавіруса абмяжоваўся студэнтамі, уладальнікамі карты паляка, віду на жыхарства, дыпляматычнага пашпарту, кіроўцаў і некаторых іншых катэгорый.

16 верасьня Памежная служба Польшчы апублікавала новы дакумэнт аб перасячэньні мяжы ва ўмовах каранавірусу.

У ім сярод тых, хто можа ўяжджаць у краіну зьявіўся яшчэ адзін пункт, які пачынае дзейнічаць з 17 верасьня — грамадзяне Беларусі, якія перасякаюць мяжу Польскай рэспублікі на падставе турыстычнай візы.

Фактычна ў параўнаньні зь іншымі замежнікамі беларусам робіцца выключэньне. Такім чынам любы беларус з візай можа выехаць у Польшчу, але з умовай 10-дзённага карантыну па каранавірусе.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG