Лінкі ўнівэрсальнага доступу

«Мы ня хочам, каб захад рэжыму быў крывавым». Кандыдат Андрэй Дзьмітрыеў зьвярнуўся да сілавікоў


Андрэй Дзьмітрыеў, архіўнае фота

Свой зварот ён пачаў зь сьцьвярджэньня, што «за апошнія некалькі месяцаў нам усім стала відавочна: эпоха старога прэзыдэнта завяршылася».

«Мы назіраем захад рэжыму і ня хочам, каб ён быў крывавым, — сказаў Дзьмітрыеў. — Гэта сёньня залежыць ад усіх тых, хто носіць зброю па доўгу службы».

Ён заклікаў не пераступіць рысу, «за якой пачынаюцца гвалт ці, ня дай бог, кроў».

«Стары прэзыдэнт хоча, каб вы думалі, што гэтыя выбары пра яго, ставіць знак роўнасьці паміж сабой і краінай», — сказаў Дзьмітрыеў.

Аднак ён лічыць, што большасьць хоча, каб прыйшоў новы прэзыдэнт.

«Мы ўсе яго хочам выбраць на сумленных выбарах, без майданаў і плошчаў. Мы ўсе хочам жыць у міры і згодзе», — сказаў Дзьмітрыеў. Ён лічыць, што новы прэзыдэнт патрэбны і сілавікам.

«Ён будзе будаваць краіну, дзе вам не аддадуць злачынныя загады. Не прынізяць разгонам чаргі каля сувэнірнай крамы ці бегам за раварыстамі. Дзе вам ня трэба будзе арыштоўваць людзей толькі за тое, што ў іх ёсьць сваё меркаваньне. Дзе вас ня будуць шантажаваць за некалькі гадоў да канца службы, што звольняць і вы не атрымаеце працоўнага стажу», — сказаў Дзьмітрыеў.

«Вы ішлі на службу, каб бараніць усю Беларусь, а не аднаго чалавека», — дадаў ён.

Дзьмітрыеў лічыць, што стары прэзыдэнт замест выкананьня абяцаньняў пакінуў толькі страх, на якім усё трымаецца.

«Стары прэзыдэнт штурхае вас на злачынства. Але ён сыдзе, нават калі не 10 жніўня, крыху пазьней, — а вашыя дзеяньні не забудуцца. Навошта вам адказваць за ягоныя памылкі?» — спытаўся Дзьмітрыеў.

Ён заклікаў вайскоўцаў і міліцыянтаў застацца ў казармах, «а калі будзеце на вуліцах — абараняйце мірных людзей ад сапраўдных правакатараў».

Ён сьцьвярджае, што ў старога прэзыдэнта «на самой справе і краіны няма».

«У яго засталіся толькі вы і вашая зброя. Адзіная сіла сёньня, каб утрымаць уладу. Але што такое зброя? Гэта заўсёды вашая асабістая адказнасьць. Ад вас залежыць, чаму і каму яна будзе служыць — міру, спакою, людзям, якія хочуць, каб іхныя дзеці не зьяжджалі за мяжу ў пошуках лепшага жыцьця, альбо помсьце, страху і прыніжэньню. Гэты выбар мы ня можам зрабіць за вас. Але мы верым вам і падтрымаем кожнага, хто выбера бок свайго доўгу, прысягі перад народам, сваіх дзяцей, іх будучыні, а не злачыннага загаду».

«Беларусі патрэбны новы прэзыдэнт», — завяршыў свой зварот Дзьмітрыеў.

Сёньня, напярэдадні выбараў, таксама зьвярнулася да выбарнікаў, сябраў выбарчых камісій і сілавікоў Сьвятлана Ціханоўская.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG