Лінкі ўнівэрсальнага доступу

Amnesty International асудзіла новыя абвінавачаньні супраць Сяргея Ціханоўскага


Сяргей Ціханоўскі, архіўнае фота

Amnesty International апублікавала заяву з нагоды новых абвінавачваньняў супраць мужа кандыдаткі ў прэзыдэнты Беларусі Сьвятланы Ціханоўскай блогера Сяргея Ціханоўскага.

У прэс-рэлізе адзначаецца, што хоць «падрабязнасьці абвінавачаньняў зьяўляюцца сакрэтнымі, але інфармацыя, якую мае Amnesty International, сьведчыць, што гэтыя яны сфабрыкаваныя з адной мэтай — спыніць законную палітычную дзейнасьць Сяргея Ціханоўскага і ягонай жонкі Сьвятланы».

Amnesty International падкрэсьлівае, што новыя абвінавачаньні супраць Сяргея Ціханоўскага, а таксама Мікалая Статкевіча і іншых «зьяўляюцца часткай шырокай кампаніі, накіраванай супраць актывіста, яго прыхільнікаў, блогераў і крытыкаў уладаў».

Пасьля падзеяў 29 траўня ў Горадні і арышту Сяргея Ціханоўскага Amnesty International заявіла, што справа была сфабрыкаваная ўладамі, каб ізаляваць найбольш вядомых крытыкаў і праціўнікаў рэжыму.

«Празьмерна шырокія і расплывістыя абвінавачваньні дазваляюць уладам патэнцыйна прад’явіць абвінавачаньні супраць любога палітычнага апанэнта», — гаварылася ў заяве.

30 чэрвеня Amnesty International прызнала вязьнямі сумленьня Сяргея Ціханоўскага і арыштаваных у ягонай справе.

Калі арганізацыя ўпершыню пракамэнтавала гэтую справу 29 чэрвеня, пад арыштам знаходзіліся 10 чалавек, цяпер у сьпіс уваходзяць прынамсі 15 вязьняў сумленьня, якіх пазбавілі волі выключна за спробу мірнага ажыцьцяўленьня сваіх правоў, гаворыцца ў заяве Amnesty International.

Гэта блогеры Сяргей Ціханоўскі, Уладзімер Няронскі, Сяргей Пятрухін, Аляксандар Кабанаў, Уладзімер Цыгановіч, Зьміцер Казлоў, Ігар Лосік; затрыманыя пасьля інцыдэнту ў Горадні ў так званай «справе Ціханоўскага» Зьміцер Фурманаў, Арцём Сакаў, Аляксандар Арановіч, Яўген Разьнічэнка, Уладзімер Кніга, Андрэй Новікаў, а таксама палітык Мікалай Статкевіч, актывіст Сяргей Спарыш. Яшчэ траіх — Васіля Баброўскага, Уладзімера Навуміка і Вяргілія Ўшака — вызвалілі, але абвінавачаньні супраць іх ня зьнялі.

«Любая асоба, арыштаваная ў якасьці падазраванага ў гэтай справе, ня зьдзейсьніўшы пры гэтым міжнародна прызнанага крымінальнага злачынства, будзе лічыцца вязьнем сумленьня», — заяўляе Amnesty International.

Затрыманьні Ціханоўскага і яго прыхільнікаў. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».

  • На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
  • Ціханоўскага трымаюць за кратамі з 29 траўня. Яго абвінавачваюць паводле чатырох артыкулаў Крымінальнага кодэксу:

ч. 1 арт. 293 (арганізацыя масавых беспарадкаў, да 15 гадоў зьняволеньня).

ч. 3 арт. 130 (распальваньне сацыяльнай варожасьці);

ч. 2 арт. 191 (перашкода працы ЦВК). Заяву на яго падала старшыня ЦВК Лідзія Ярмошына;

ч. 1 арт. 342 (арганізацыя дзеяньняў, што груба парушаюць грамадзкі парадак).

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG