Рэдакцыя «Бобруйского курьера» атрымала адказ на свой запыт у Інстытут сацыялёгіі Нацыянальнай акадэміі навук Беларусі: ці можна лічыць іх відэаапытаньні на тэму выбараў «незаконным дасьледаваньнем грамадзкай думкі», як раней заявілі ў Бабруйскім гарвыканкаме, патрабуючы выдаліць іх з сайту.
У адказе Інстытута гаворыцца, што прадстаўленыя «Бобруйским курьером» матэрыялы «не дазваляюць сьцьвярджаць аб тым, што праводзілася сацыялягічнае дасьледаваньне», бо такое дасьледаваньне складаецца з «лягічна пасьлядоўных мэтадалягічных, мэтадычных і арганізацыйна-тэхнічных працэдур» (распрацоўка праграмы і пляну дасьледаваньня, мэтодык і інструмэнтару, збор эмпірычных дадзеных, іх апрацоўка, аналіз і інш), накіраваных на «атрыманьне дакладных дадзеных» з наступным іх практычным прымяненьнем.
Матэрыялы «Бобруйского курьера» не адпавядаюць дадзеным крытэрам, гаворыцца адказе.
У сярэдзіне ліпеня выданьне атрымала з аддзелу ідэалёгіі і спраў моладзі Бабруйскага гарвыканкаму ліст з патрабаваньнем выдаліць з сайта «Бобруйский курьер» 5 відэаролікаў-апытаньняў, дзе людзі выказваюцца пра сваё стаўленьне да выбараў і прэтэндэнтаў на пасаду прэзыдэнта.
Улады гораду палічылі, што гэтыя ролікі — сацыялягічнае дасьледаваньне, а правядзеньне такіх дасьледаваньняў без акрэдытацыі Акадэміі навук і іх публікацыя падпадае пад адміністрацыйную адказнасьць. Ідэолягі пагражалі пачаць адміністрацыйны працэс, калі рэдакцыя ня выдаліць ролікі.
Галоўны рэдактар выданьня Анатоль Санаценка палічыў прэтэнзіі гарадзкіх уладаў беспадстаўнымі і накіраваў зварот у пракуратуру, у якім просіць прыняць меры пракурорскага рэагаваньня для абароны гарантаваных Канстытуцыяй правоў, а таксама ў Нацыянальную акадэмію навук — з просьбай патлумачыць, ці можна матэрыялы выданьня лічыць сацыялягічным дасьледаваньнем. Пракуратура перанакіравала заяву на разгляд старшыні Бабруйскага гарвыканкаму. Адказу ад яго з рэдакцыя пакуль не атрымала.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
