Лінкі ўнівэрсальнага доступу

Бабарыку памянялі абвінавачаньне: «даваньне хабару» стала «атрыманьнем хабару»


Віктар Бабарыка, архіўнае фота

Генэральная пракуратура Беларусі 24 ліпеня паведаміла аб выстаўленьні новага абвінавачаньня Віктару Бабарыку — былому старшыню «Белгазпрамбанку», які стаў палітычным зьняволеным падчас збору подпісаў за вылучэньне яго кандыдатам у прэзыдэнты.

Паведамленьне даецца як адказ «у сувязі з публікацыямі ў шэрагу СМІ аб абскарджаньні адвакатамі Бабарыкі выстаўленага яму абвінавачаньня». Сьцьвярджаецца, што ў час пракурорскага нагляду была правераная справа, якую расьсьледуе Камітэт дзяржаўнай бясьпекі.

Сабраныя ў справе доказы, паказаньні сьведак і іншых абвінавачаных, дакумэнты і носьбіты інфармацыі «далі падставу для выстаўленьня новага абвінавачаньня» — яго выставілі 24 ліпеня.

«Дзеяньні Бабарыкі В.Д. па атрыманьні ад прадстаўнікоў камэрцыйных структураў незаконных грашовых узнагародаў у агульнай суме больш за 28 млн рублёў і іх разьмеркаваньне сярод кіраўніцтва ААТ „Белгазпрамбанк“, праведзеныя ім як службовай асобай — старшынём праўленьня дадзенага банку, перакваліфікаваныя з ч. 2 арт. 431 на ч. 3 арт. 430 КК як прыняцьце службовай асобай для сябе матэрыяльных каштоўнасьцяў у асабліва буйным памеры ў складзе арганізаванай групы, — піша Генпракуратура. — Акрамя таго, у новым абвінавачаньні канкрэтызаваныя асобныя акалічнасьці інкрымінаваных яму злачынстваў».

Чаму спачатку гаворка ішла пра артыкул аб атрыманьні, а цяпер — аб даваньні хабару, не тлумачаць. Расьсьледаваньне працягваецца.

Калі паводле ч. 2 арт. 431 пагражае да 5 гадоў абмежаваньня волі або ад 2 да 7 гадоў пазбаўленьня волі, то паводле ч. 3 арт. 430 — ад 5 да 15 гадоў пазбаўленьня волі са штрафам.

Акрамя гэтых артыкулаў, Бабарыку таксама вінавацяць ва «ўхіленьні ад сплаты падаткаў» паводле ч. 2 арт. 243 (пакараньне — абмежаваньне волі да 5 гадоў са штрафам або пазбаўленьне волі ад 3 да 7 гадоў са штрафам) і ў «легалізацыі сродкаў, атрыманых злачынным шляхам» паводле ч. 2 арт. 235 (пакараньне — ад 4 да 7 гадоў пазбаўленьня волі).

«З мэтай удакладненьня абставінаў злачынных дзеяньняў» сьледчыя КДБ накіравалі запыт «кампэтэнтным органам» Латвіі, Эстоніі, Расеі, ЗША, Турэччыны, Брытанскіх Віргінскіх астравоў і Рэспублікі Кіпр.

Суду над Бабарыкам яшчэ не было, ён ня быў прызнаны вінаватым, а ягоныя дзеяньні не былі прызнаныя злачыннымі ў судзе.

Перасьлед Віктара Бабарыкі і яго прыхільнікаў. Што важна ведаць

  • 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць людзей, калі тыя адмаўляюцца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
  • 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў па арт. 235 (легалізацыя сродкаў, здабытых злачынным шляхам у асабліва буйным памеры) і арт. 243 (ухіленьне ад выплаты падаткаў у асабліва буйным памеры) Крымінальнага кодэксу.
  • Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога капрамату на яго.
  • 11 чэрвеня арыштавалі каардынатарку выбарчага штабу Бабарыкі Сьвятлану Купрэеву, яе вінавацяць ва ўхіленьні ад выплаты падаткаў у асабліва буйным памеры.
  • 12 чэрвеня Лукашэнка заявіў, што Бабарыка таксама датычны да справы, маўляў «​гэта адна шайка-лейка»​ і безь яго ведама нічога не рабілася. Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
  • Усяго па «справе „Белгазпрамбанку“» праходзяць каля 20 чалавек.
  • 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскаія акцыянэры банка («Газпромбанк» і «Газпром») назвалі гэтае рашэньне незаконным.
  • 17 чэрвеня арыштавалі выбарчы фонд Віктара Бабарыкі з 100 тысячамі рублёў на рахунку. Афіцыйных тлумачэньняў штабу кандыдата тады не далі.
  • Раніцай 18 чэрвеня затрымалі Віктара Бабарыку і яго сына ды кіраўніка ініцыятыўнай групы Эдуарда Бабарыку. У дамах сям’і Бабарыкаў прайшлі ператрусы.
  • «Бабарыку затрымалі праз тое, што ён зьяўляўся непасрэдным арганізатарам супрацьпраўнай дзейнасьці, спрабаваў узьдзейнічаць на сьведак, схаваць сьляды раней зьдзейсьненых злачынстваў, і літаральна днямі Бабарыка спрабаваў зьняць буйную суму грошай з падкантрольных яму рахункаў», — сказаў кіраўнік Камітэту дзяржкантролю Іван Тэртэль, расказваючы пра нібыта махлярскую схему з адмываньнем грошай з удзелам былых і дзейных топ-мэнэджэраў «Белгазпрамбанку».
  • Віктар і Эдуард Бабарыкі знаходзяцца ў СІЗА КДБ. Ім прад'явілі абвнавачаньне, артыкул не называецца.
  • Праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы
  • 19 чэрвеня Штаб Бабарыкі падрыхтаваў да здачы 435 тысяч подпісаў.
  • 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
  • «Трэба — сядуць». Што Лукашэнка казаў пра Бабарыку цягам двух тыдняў перад яго затрыманьнем

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG