Лінкі ўнівэрсальнага доступу

+1 ад БНФ, +4 ад БХК, +353 ад БРСМ, +204 ад камуністаў. Як за тыдзень вырасла колькасьць назіральнікаў


Назіральнікі на парлямэнцкіх выбарах, 2019 год, ілюстрацыйнае фота

Цэнтральная выбарчая камісія Беларусі апублікавала 21 ліпеня абноўленыя зьвесткі аб акрэдытацыі нацыянальных назіральнікаў на прэзыдэнцкіх выбарах 2020 году.

Па стане на 20 ліпеня акрэдытавалі 42 856 чалавек агулам, 3436 — за апошні тыдзень.

31 186 нацыянальных назіральнікаў, або амаль 73%, па-ранейшаму прыпадае на долю грамадзкіх аб’яднаньняў. Фэдэрацыя прафсаюзаў Беларусі вылучыла 8779 чалавек (плюс 177 за тыдзень), Беларускі рэспубліканскі саюз моладзі — 6019 (+353), праўладная «Белая Русь» — 5161 (+252), Беларускае аб’яднаньне вэтэранаў — 3780 (+125), Беларускі саюз жанчын — 3705 (+232), Беларускі фонд міру — 1632 (+131), Беларускі Хэльсынскі камітэт — 52 (+4), БНФ «Адраджэньне» — 2 (+1). Іншыя грамадзкія аб’яднаньні дэлегавалі 2056 (+410) чалавек.

Ад палітычных партыяў выбарчыя камісіі акрэдытавалі 2073 нацыянальныя назіральнікі. У Камуністычнай партыі Беларусі 1018 (+204) прадстаўнікоў, у Рэспубліканскай партыі працы і справядлівасьці — 670 (+77), Лібэральна-дэмакратычнай партыі — 120 (+55), Беларускай аграрнай партыі — 107 (+59), Сацыял-дэмакратычнай партыі народнай згоды — 63 (+0), Беларускай сацыяльна-спартыўнай партыі — 62 (+0), Рэспубліканскай партыі — 21 (+0), Беларускай патрыятычнай партыі — 8 (+0), партыі БНФ — 2 (+0), Беларускай партыі «Зялёныя» — 1 (+0), Аб’яднанай грамадзянскай партыі — 1 (+0).

7427 (+1127) грамадзянаў сталі назіральнікамі шляхам падачы адпаведнай заявы ад свайго імя, 2170 (+230) акрэдытавалі ад працоўных калектываў.

На папярэдніх прэзыдэнцкіх выбарах у 2015 годзе былі акрэдытаваныя 43 572 нацыянальныя назіральнікі, у 2010-м — 39 619. Назіральнікі ад БДІПЧ АБСЭ і ПАРЭ не зьбіраюцца прысутнічаць на сёлетніх выбарах, але ад СНД прыедуць.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі (на 13 лепеня) праваабаронцы налічылі больш за 700 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. 129 чалавек пакаралі адміністрацыйнымі арыштамі, 252 чалавекі аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG