Лінкі ўнівэрсальнага доступу

Лукашэнка назваў справу «Белгазпрамбанку» ўрокам для эканомікі і Нацыянальнага банку, дзе зрабіў перастаноўкі


Аляксандар Лукашэнка прызначыў 20 ліпеня новых кіраўнікоў у праўленьне Нацыянальнага банку Беларусі. Старшыня застаўся ранейшы — Павал Калавур.

Намесьніцай начальніка галоўнага ўпраўленьня рэгуляваньня банкаўскіх апэрацыяў і чальцом праўленьня Нацбанку прызначыў Ілону Лядніцкую, чальцамі праўленьня — начальнікамі галоўных упраўленьняў апэрацыяў на фінансавых рынках і манэтарнай палітыкі Дзяніса Гарагляда і Дзьмітрыя Мурына.

Падчас абвяшчэньня кадравых рашэньняў Лукашэнка заявіў, што варта зьмякчаць фінансавую палітыку і пастаянна падвышаць крэдытаваньне эканомікі.

«Вы маю пазыцыю ведаеце: хто склаў рукі або, ня дай Бог, людзей пачаў звальняць, на падтрымку дзяржавы хай не разьлічвае, — казаў Лукашэнка чальцам праўленьня Нацбанку. — Прытым меры за тое, што выкідваюць людзей на вуліцу, будуць самыя жорсткія. Але тым, у каго ёсьць „жывыя“ экспартныя кантракты або хто запусьціў інвэстыцыйны праект, трэба дапамагчы абавязкова. Гэта грошы зваротныя».

Ён заклікаў таксама да рэструктурызацыі запазычанасьцяў і адмовы ад «празьмерных» умоваў і бар’ераў, працягу зьніжэньня стаўкі рэфінансаваьня і спрашчэньня наглядных абмежаваньняў, запэўніў у правядзеньні паступовай лібэралізацыі фінансавага і валютнага рынкаў. Кожны банкір мусіць пэрсанальна адказваць за тое, якія грошы ён прыцягнуў з замежных рынкаў, дадаў Лукашэнка.

«Калі страцім заводы, прадпрыемствы, калектывы, наступнымі будуць банкі, — разважаў ён. — Бягучыя цяжкасьці вырашым, але з 2021 году трэба прырастаць сярэднесусьветнымі тэмпамі».

Сытуацыя зь «Белгазпрамбанкам» мае стаць «урокам» для абноўленага кіраўніцтва Нацбанку, заявіў Лукашэнка, бо там «нагляд праваліўся». На прыкладзе гэтай сытуацыі, сказаў ён, «бачым, што працы — непачаты край».

Перасьлед Віктара Бабарыкі і яго прыхільнікаў. Што важна ведаць

  • Віктара Бабарыку абвінавачваюць у «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК). Яму пагражае да 15 гадоў турэмнага зьняволеньня.
  • У крымінальнай справе «Белгазпрамбанку» 122 тамы. Працэс пачаўся 17 лютага. Справу разглядае Вярхоўны суд у будынку суду Маскоўскага раёну.
  • 22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляе ў дастатковай ступені зразумець, у якіх менавіта дзеяньнях абвінавачанага Бабарыкі ўгледжана злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
  • Віктар Бабарыка віны не прызнае.​

Хроніка перасьледу

  • 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
  • 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
  • Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
  • 11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
  • 12 чэрвеня Лукашэнка заявіў, што Бабарыка таксама датычны да справы, маўляў, «​гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
  • Фігурантамі «справы „Белгазпрамбанку“» сталі каля 20 чалавек.
  • 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
  • 17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
  • 18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
  • Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
  • 19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
  • Штаб Бабарыкі падрыхтаваў да здачы 435 тысяч подпісаў.
  • 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
  • 2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
  • 14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
  • 10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
  • 17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
  • 6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
  • 12 ліпеня стала вядома, што Бабарыку этапавалі ў ПК №1 у г. Наваполацак.
  • 12 кастрычніка з ізалятараў выйшлі некалькі чалавек, затрыманых у справе «Белгазпрамбанку»​. Ім зьмянілі меру стрыманьня, але іншыя падрабязнасьці справы невядомыя.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG