Лінкі ўнівэрсальнага доступу

Паплечніка Ціханоўскай, затрыманага напярэдадні Славянскага базару ў Віцебску, арыштавалі на 13 сутак — нібыта за сварку зь дзяўчынай


Руслан Ахрымчук

Руслана Ахрымчука судзілі 17 ліпеня ў Кастрычніцкім судзе Віцебску ў другой палове дня паводле часткі 2 артыкула 9.1. Артыкул прадугледжвае адміністрацыйную адказнасьць за правапарушэньні ў галіне сямейна-бытавых адносін. Паседжаньне доўжылася амаль дзьве гадзіны.

Руслана затрымалі 15 ліпеня. Двое сутак да суду ён правёў у ізалятары часовага ўтрыманьня. Суд над ім адбываўся праз скайп.

13 сутак Руслану далі за нібыта сварку зь дзяўчынай 9 ліпеня.

«Мы пасварыліся на словах, — камэнтуе дзяўчына Руслана Алёна, якая прысутнічала на судзе. — Але міліцыю ніхто не выклікаў».

Да гэтай пары невядома, як супрацоўнікі міліцыі дазналіся пра сварку паміж маладымі людзьмі. Паводле Алёны, супрацоўнікі міліцыі — двое ў цывільным і трое ў форме — прыехалі да яе на трэці дзень пасьля сваркі, 11 ліпеня. Яе падманным шляхам вызвалі з хаты — нібыта распытаць пра суседа, які п’е. Замест гэтага пачалі задаваць пытаньні пра сварку. Дзяўчына адказала, што ніхто ёй крыўды не чыніў.

«У той жа дзень яны падпільнавалі мяне на прыпынку, калі я зьбіралася ехаць на лецішча, і патлумачылі, што мне трэба напісаць тлумачальную запіску наконт Руслана. Я нават расьпіску напісала, што мне ніхто не пагражаў — ні фізычна, ні псыхалягічна».

Заяву на Руслана ў міліцыю дзяўчына не пісала. У момант затрыманьня Руслану сказалі адваротнае.

Учора і сёньня Алёна прастаяла пад дзьвярыма Кастрычніцкага суду. Пра дату і час слуханьня ніхто не паведамляў. Заставалася толькі пільнаваць.

«Я напісала хадайніцтва, — кажа дзяўчына. — Калі няма заявы пацярпелага, яго ня маюць права асуджаць. Складу злачынства няма. На судзе я казала, што мяне ніхто ня крыўдзіў. Гэта сапраўды так. Я патрабавала спыніць працэс».

Хадайніцтва Алёны не далучылі да справы. Працэс не спынілі, бо справу ўзбудзіла пракуратура.

«Усё паперакручвалі так, нібыта я і Руслан кажам няпраўду, — працягвае дзяўчына. — Маіх словаў ніхто ня слухаў. Гэта быў ня суд, а цырк. Захацела пракуратура і пасадзіла чалавека на 13 сутак — без падстаў, без званка ў міліцыю, без заявы».

Алёна кажа, што Руслана пачалі перасьледаваць пасьля яго ўдзелу ў перадвыбарчай кампаніі. Руслан — сябар ініцыятыўнай групы Сьвятланы Ціханоўскай. Удзельнічаў у зборы подпісаў. Сябры актывіста мяркуюць, што Руслана хочуць нэўтралізаваць на час правядзеньня агітацыі і выбараў.

«Яго пастаянна каля дому пільнавалі, — кажа яна. — Мяне выкарысталі як зачэпку. Я ім непатрэбная. Ім трэба было Руслана пасадзіць».

Алёна не адчувае сябе ў бясьпецы. У судзе дзяўчына папярэдзіла, што будзе выклікаць міліцыю кожны раз, як убачыць незнаёмых людзей паблізу свайго дому.

Суд скончыўся а пятай увечары. Пастанову Алёна ўбачыла толькі пасьля сёмай. З матэрыяламі справы зможа азнаёміцца ў наступны аўторак. На абскарджаньне рашэньня ў судзе далі пяць дзён, пачынаючы ад заўтрашняга дня.

19 ліпеня віцебскі ізалятар часовага ўтрыманьня закрываюць на рамонт. Пакуль невядома, ці адпусьцяць Руслана датэрмінова, ці перавядуць у ізалятар іншага гораду.

Затрыманьні Ціханоўскага і яго прыхільнікаў. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.

Пахвілінна. Як адбылося затрыманьне Ціханоўскага ў Горадні >>

  • У Twitter-акаўнце Ціханоўскага «Страна для жизни» зьявілася відэа, на якім бачна, як мужчына ў скураной куртцы, падчас мітусьні на пікеце ў Горадні, дапамагае легчы на зямлю чалавеку ў міліцэйскай форме.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся ў некалькіх мэтрах ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміў пра крымінальную справу за «гвалт супраць міліцыянтаў».
  • Ціханоўскага маюць трымаць за кратамі прынамсі да дня прэзыдэнцкіх выбараў.
  • Вядома пра наступных затрыманых у «справе Ціханоўскага»:
  1. Сяргей Ціханоўскі
  2. Яўген Разьнічэнка
  3. Зьміцер Фурманаў
  4. Уладзімер Навумік
  5. Вяргілій Ушак
  6. Аляксандар Арановіч
  7. Васіль Баброўскі
  8. Арцём Сакаў
  9. Уладзімер Кніга

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG