Лінкі ўнівэрсальнага доступу

У Вярхоўнай Радзе Ўкраіны стварылі аб’яднаньне «За дэмакратычную Беларусь»


Дэпутат Вярхоўнай Рады Аляксей Ганчарэнка.

Міжфракцыйнае дэпутацкае аб’яднаньне «За дэмакратычную Беларусь» створана ва ўкраінскім парлямэнце. Ініцыятарам выступіў Аляксей Ганчарэнка з фракцыі «Эўрапейская салідарнасьць» былога прэзыдэнта краіны Пятра Парашэнкі.

На сваёй старонцы ў «Фэйсбуку» Ганчарэнка растлумачыў прычыны стварэньня аб’яднаньня:

«У жніўні ў Беларусі будуць чарговыя прэзыдэнцкія выбары. Гэтыя выбары сталі прычынай таго, што цяперашняя ўлада пачала маштабныя рэпрэсіі супраць апазыцыйных кандыдатаў, грамадзкіх дзеячоў, блогераў, звычайных людзей. Усё гэта робіцца для таго, каб даць сфальсыфікаваць выбары і чарговы раз „перавыбраць“ Аляксандра Лукашэнку. Наша аб’яднаньне створана для таго, каб дапамагчы беларусам стварыць дэмакратычную, свабодную і сапраўды незалежную дзяржаву. Мы зробім усё магчымае, каб інфармаваць міжнародныя інстытуцыі пра сытуацыю ў Беларусі, дапамагаць беларускім палітычным зьняволеным і звычайным людзям выйсьці на волю».

«Беларусь павінна стаць свабодным, дэмакратычнай, эўрапейскай і незалежнай дзяржавай», — падкрэсьліў Ганчарэнка. На імя сьпікера Вярхоўнай Рады Дзьмітрыя Разумкова ён накіраваў просьбу абвясьціць аб стварэньні аб’яднаньня на пленарным пасяджэньні.

Прэзыдэнцкія выбары — 2020 у Беларусі. Што важна ведаць

УЖЫВУЮ Выбары-2020. Як праходзіць прэзыдэнцкая кампанія падчас пандэміі

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак. Кандыдат у прэзыдэнты на выбарах-2010 Мікола Статкевіч зьбіраўся зарэгістраваць 30 «кандыдатаў пратэсту», каб мець магчымасьць зьбіраць людзей на вуліцах, але ня ўдзельнічаць ў саміх выбарах. Яго і амаль усіх ягоных паплечнікаў не дапусьцілі да збору подпісаў — зарэгістравалі толькі групу Ўладзімера Няпомняшчых.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“». 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG