Лінкі ўнівэрсальнага доступу

У доме бацькі заснавальніка блогу Nexta адбыўся ператрус

абноўлена

Аляксандар Пуціла, архіўнае фота

Супрацоўнікі міліцыі 18 чэрвеня правялі ператрус у доме Аляксандра Пуцілы, журналіста «Белсата» і бацькі заснавальніка блогу Nexta Сьцяпана Пуцілы. Пра гэта паведаміў намесьнік старшыні Беларускай асацыяцыі журналістаў Барыс Гарэцкі.

Прычына: праверка па справе абразы супрацоўніка міліцыі.​

Прыкладна а 23-яй гадзіне сьледчыя пакінулі кватэру журналіста. Яны забралі ноўтбук і мабільны тэлефон Пуцілы, паведамляе БАЖ.

Як распавёў сын Аляксандра Пуцілы Сьцяпан (блогер Nexta), бацьку сёньня выклікалі ў міліцыю ў Жодзіна, каб «узяць тлумачэньні». Паводле Сьцяпана, гэта можа быць зьвязана з пастом Аляксандра Пуцілы ў Фэйсбуку, дзе той выказаў абурэньне, бо яго не прапусьцілі на матч «Тарпэда» – «Дынама Берасьце». З Жодзіна Пуцілу павезьлі ў Менск для «агляду» ягонай кватэры.

Паводле калегаў Пуцілы, якім удалося зьвязацца зь ім па хатнім тэлефоне, ператрус праводзілі людзі ў цывільным.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі (на 13 лепеня) праваабаронцы налічылі больш за 700 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. 129 чалавек пакаралі адміністрацыйнымі арыштамі, 252 чалавекі аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG