Лінкі ўнівэрсальнага доступу

«З Лукашэнкам у нас тое, што трэба». Як беларускія спартоўцы крытыкуюць апанэнтаў улады


Экс-кідальнік молата Вадзім Дзевятоўскі

На фоне пікетаў у зборы подпісаў за прэтэндэнтаў на вышэйшую пасаду, якія ў выходныя суправаджаліся масавымі затрыманьнямі чальцоў ініцыятыўных групаў, актывізаваліся вядомыя спартоўцы.

Зьвіліся адразу некалькі рэакцый спартоўцаў з асуджэньнем канкурэнтаў Аляксандра Лукашэнкі.

Дзевятоўскі: «​Некаму трэба расхістаць становішча ў нашай краіне»​

Кідальнік молата, прызэр Алімпійскіх гульняў, чэмпіён сьвету і Эўропы, старшыня Фэдэрацыі лёгкай атлеткі Беларусі Вадзім Дзевятоўскі зьвярнуўся «да ўсіх, каму неабыякавая будучыня краіны».

«Беларусь была і застаецца спакойнай, міралюбнай і гасьціннай. Людзі, якія прыяжджаюць зь іншых краін, захапляюцца чысьцінёй і парадкам, высокім узроўнем бясьпекі, спакоем і прыгажосьцю нашай зямлі. Але ад пэўных асобаў можна чуць агрэсіўную рыторыку ў дачыненьні да прэзыдэнта. Я нарадзіўся ў СССР і памятаю ўсё, што было на кожным этапе нашага станаўленьня. Нельга забываць, які шлях мы прайшлі, і гэты шлях даў нам магчымасьць неімаверна зьмяніцца і захаваць сваю незалежнасць пры велізарным вонкавым ціску», — напісаў Дзевятоўскі.

Пазьней ён апублікаваў у Instagram скрыншот з колькасцю лайкаў, якое сабрала ягонае паведамленьне з крытыкай «некаторых людзей і сілаў, якім з розных прычынаў трэба расхістаць становішча ў краіне і парушыць яе разьвіцьцё».

«Колькасьць салідарных са мною значна большая, чым тых, хто лічыць іначай. На абразы перайсьці прасьцей за ўсё, але я ніколі гэтым не займаўся і ня буду», — напісаў Дзевятоўскі.

Літвінчук: ​«​Нельга без трывогі глядзець цяпер на сацсеткі»​

Падтрымкай Аляксандра Лукашэнкі адзначыліся дзьве беларускія вясьляркі-байдарачніцы.

Шматразовая прызэрка Алімпійскіх гульняў, чэмпіёнка сьвету і Эўропы Марына Літвінчук выказала ў сваім Instagram думку пра пікеты, якія прайшлі па ўсёй Беларусі ў падтрымку розных прэтэндэнтаў.

«Нельга без трывогі глядзець цяпер на сацсеткі, асабліва на старонкі некаторых блогераў. Гэта называецца зборам подпісаў? Шоў, спэктакль, разгойдваньне натоўпу — толькі ня збор подпісаў. Людзі, адумайцеся, наша самае галоўнае багацьце — гэта мір. Ёсьць нямала краінаў, якія нам зайздросьцяць. Беражыце сябе!» — напісала спартоўка.

Махнева: «​Каб каго і ведала, прагаласавала б за нашага прэзыдэнта​»​

Да гэтага чэмпіёнка сьвету і Эўропы, алімпійская прызэрка ў веславаньні Маргарыта Махнева ў інтэрвію газэце «Прессбол» расказала пра стаўленьне да беларускай мовы і кіраўніка краіны.

«Успамінаю папярэднія выбары, як адна жанчына казала, што ў нас усё будзе па-беларуску. І я думаю: ну як жа так, калі ўвесь народ гаворыць па-расейску? Вакол мяне ўсё размаўлялі на расейскай. Я вучыла [беларускую], але не разумела», — заявіла спартоўка.

Махнева таксама дадала, што нават калі б кагосьці з кандыдатаў ведала па выступах у тэлевізары, усё роўна прагаласавала б за «нашага прэзыдэнта».

«Кожны думае, што менавіта пры ім будзе лепш. Але ўсе яны глыбока памыляюцца. Якраз з Лукашэнкам у нас тое, што трэба», — падсумавала Маргарыта Махнева.

Прэзыдэнцкія выбары — 2020 у Беларусі. Што важна ведаць

УЖЫВУЮ Выбары-2020. Як праходзіць прэзыдэнцкая кампанія падчас пандэміі

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак. Кандыдат у прэзыдэнты на выбарах-2010 Мікола Статкевіч зьбіраўся зарэгістраваць 30 «кандыдатаў пратэсту», каб мець магчымасьць зьбіраць людзей на вуліцах, але ня ўдзельнічаць ў саміх выбарах. Яго і амаль усіх ягоных паплечнікаў не дапусьцілі да збору подпісаў — зарэгістравалі толькі групу Ўладзімера Няпомняшчых.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“». 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG