Лінкі ўнівэрсальнага доступу

Парад і гуляньні ў Менску падчас пандэміі, пратэст у Бабруйску. Што адбывалася 9 траўня

У Менску прайшоў парад да 75-х угодкаў заканчэньня Другой сусьветнай вайны. Сьвяткаваньні і масавыя акцыі да Дня перамогі адбываюцца і ў іншых гарадах Беларусі, нягледзячы на пандэмію каранавірусу.


Аляксандар Лукашэнка прымае парад 9 траўня 2010 году.

Коратка

Мінабароны Беларусі паведаміла пра ўдзел у парадзе 4000 вайскоўцаў, 185 адзінак тэхнікі, гусенічнай і калёснай, абяцаюць толькі новыя і мадэрнізаваныя ўзоры вайсковай тэхнікі. Агульная даўжыня параднай калёны склала 2 кілямэтры. Над Менскам праляцела баявая авіяцыя ў складзе 42 паветраных суднаў. Свабода вяла жывую трасьляцыю з падзеі.

Трыбуны для гледачоў былі разьлічаныя на 11 тысяч чалавек, яны былі амаль цалкам запоўненыя. Людзі стаялі і на вуліцах, але няшмат. Вельмі мала людзей было ў масках. Менская міліцыя падрыхтавалася да наплыву наведнікаў, для якіх было створана 167 пунктаў пропуску. Гарвыканкам падрыхтаваў плян іншых імпрэзаў.

У парадзе ўдзельчаў Аляксандар Лукашэнкі, які выступіў з прамовай, іншых высокіх чыноўнікаў. Для іх была створаная асобная трыбуна з сыстэмай кандыцыянаваньня.

Сусьветная арганізацыя здароўя занепакоеная парадам у Менску

7 траўня кіраўнік эўрапейскага аддзяленьня Сусьветнай арганізацыі здароўя (WHO) Ганс Клюге назваў заклікаў знайсьці «альтэрнатыўныя рашэньні» для сьвяткаваньня Дня перамогі, каб «не рызыкаваць чалавечымі жыцьцямі».

Місія Сусьветнай арганізацыі здароўя і каардынатарка ААН у Беларусі заклікалі беларускія ўлады зрабіць новыя захады супраць эпідэміі: перанесьці або скасаваць масавыя мерапрыемствы, закрыць забаўляльныя ўстановы і скараціць «неістотныя перасоўваньні» людзей.

Лукашэнка не захацеў скасаваць вайсковы парад на 9 траўня, нават пасьля таго як ад удзелу ў тым парадзе адмовіліся вайскоўцы з Расеі і Кітаю, шэраг расейскіх палітыкаў.

У Бабруйску на 12 гадзін быў заплянваваны «АнтыПарад» — акцыя пратэсту супраць параду ў Менску падчас пандэміі каранавірусу, якую хацеў правесьці разам з падпісчыкамі блогер Сяргей Ціханоўскі. Аднак, пасьля двух дзён перасьледу 6 траўня міліцыя затрымала Ціханоўскага ў Магілёве. Тым не меней пратэст у Бабруйску адбыўся.

18:24 9.5.2020

Выхвальства Лукашэнкі насуперак пандэміі, выклік Пуціну, подкуп людзей — сусьветныя СМІ пра парад у Менску

«Беларусь падкупляе людзей для ўдзелу ў парадзе», «Беларускі парад адбываецца насуперак пандэміі і кідае выклік Пуціну», «Аляксандру Лукашэнку нішто не перашкодзіла правесьці парад у Менску» — парад у Менску трапіў у загалоўкі сусьветных СМІ.

18:23 9.5.2020

Амбасадар Расеі Дзьмітры Мезенцаў адмовіўся сказаць, чаму быў на парадзе бяз маскі

Некаторыя прадстаўнікі дыпляматычных місій прысутнічалі на парадзе ў ахоўных масках і нават у пальчатках і акулярах.

Амбасадар Расеі Дзьмітры Мезенцаў быў бяз маскі. Чаму? Не баяўся, што можа заразіцца?

«Я думаў, калі людзі прыходзяць на ўрачыстасьць з нагоды Вялікай Перамогі, нават у маіх калег-журналістаў, а я маю самыя непасрэдныя адносіны да нашага з вамі журналісцкага цэху, ёсьць іншыя пытаньні, на якія я адкажу», — сказаў амбасадар.

15:51 9.5.2020

15:33 9.5.2020

Парад палітычнай адзіноты Лукашэнкі

Адзіны ў сьвеце парад, прысьвечаны юбілею Перамогі, адбыўся ў Менску. Акрамя таго, вечарам 9 траўня будзе вялікі канцэрт і фаервэрк.

Здавалася б, сьвята ўдалося, Лукашэнка можа адчуваць сябе трыюмфатарам. Аднак трыюмф атрымаўся змазаным, Лукашэнка застаўся ў палітычнай адзіноце, разважае палітычны аглядальнік Свабоды Валер Карбалевіч у новым блогу. Чытайце па спасылцы >>

13:56 9.5.2020

15 чалавек затрымалі пасьля акцыі ў Бабруйску

Жыхар Бабруйска Дзяніс М. распавёў Свабодзе, што пасьля акцыі «АнтыПарад» у горадзе адбыліся затрыманьні.

Паводле яго, агулам было затрымана каля 15 чалавек, якія накіроўваліся ў бок вакзалу, ішлі па вуліцы, махалі рукамі і крычалі «Стоп таракан!». Сярод іх былі бабруйчане і прыежджыя. За пратэстоўцамі ехала машына міліцыі, усе яны былі затрыманыя, іх павезьлі ў аўтобусе.

Як расказала Свабодзе прэс-сакратарка Аб’яднанай грамадзянскай партыі Ганна Красуліна, у Бабруйску затрымалі кіраўніцу Бабруйскай арганізацыі АГП і прафсаюзу РЭП Галіну Сьмірнову, актывістаў Уладзімера Раманоўскага і Аляксандра.

13:29 9.5.2020

Апэратара «Белсату», які ехаў на «АнтыПарад», 3 гадзіны трымалі ў міліцыі за «скрадзены аўтамабіль»

Апэратара тэлеканалу «Белсат» Аляксандра Баразенку адпусьцілі зь міліцыі. Ён распавёў Свабодзе, што яго затрымалі каля 9 раніцы 9 траўня на падʼезьдзе да Марʼінай Горкі, запыталі дакумэнты, пачалі аглядаць машыну, паведамілі, што падобная машына можа быць ва ўгоне і прададзеная ў Расею. Папрасілі праехаць у РАУС. У міліцыі відэаапэратара пратрымалі 2,5-3 гадзіны, склалі пратакол апытаньня, сфатаграфавалі машыну. Каля 12 гадзін Баразенку адпусьцілі. Аўтамабіль таксама вярнулі, атрымаўшы тлумачэньні.

Баразенка мяркуе, што яму хацелі перашкодзіць асьвятляць «АнтыПарад» у Бабруйску, які меўся адбыцца апоўдні.

13:18 9.5.2020

У цэнтры Бабруйску пратэстуюць кіроўцы

Цягам 5-10 хвілін дзясяткі машын адначасна сыгналілі ў знак пратэсту і ў падтрымку затрыманага блогера Сяргея Ціханоўскага на вуліцы Інтэрнацыянальнай і каля гандлёвага цэнтру «Карона».

На канале Youtube баранавіцкага блогера Дзьмітрыя Цімафеева зьявілася відэа, на якім яго затрымліваюць. Цімафееў расказвае, што спачатку яму адключылі тэлефон, хаця грошы на тэлефоне ў яго ёсьць.

12:43 9.5.2020

Людзей было меней, чым звычайна на парадах

Паводле назіраньняў карэспандэнта Свабоды Алега Грузьдзіловіча, які вёў відэарэпартаж з параду ў Менску, гэтым разам гасьцей на парадзе было меней чым звычайна. Напрыклад, тры гады таму людзі стаялі натоўпамі перад прапускнымі пунктамі, і прастора паміж гэтымі пунктамі і трыбунамі была шчыльна запоўненая, а цяпер там было мала людзей.

Не было плякатаў з просьбай захоўваюць дыстанцыю і насіць маскі, людзі на трыбунах і побач зь імі стаялі вельмі шчыльна.

Міліцыянты, якія правяралі людзей на ўваходах, былі ў масках і пальчатках. Усе вайскоўцы на парадзе былі без масак, таксама як Аляксандар Лукашэнка і чыноўнікі. А людзі пераважна былі бяз масак, маскі насілі некаторыя жанчыны і дзеці.

12:40 9.5.2020

Салдат страціў прытомнасьць падчас параду ў Менску. Відэа

Падчас параду да 75-х угодкаў заканчэньня Другой сусьветнай вайны 9 траўня ў Менску адзін з салдат, якія ўдзельнічалі ў парадзе, страціў прытомнасьць.

Відэа здарэньня апублікаваў Тэлеграм-канал Nexta Lite.

12:13 9.5.2020

Большасьць амбасадараў краінаў Эўразьвязу не прыйшлі на парад у Менску

Запрашэньне наведаць парад Перамогі ў цэнтры Менску прынялі 18 замежных амбасадараў, якія працуюць у Беларусі, распавялі Tut.by у МЗС. Гэта амбасадары Азэрбайджану, Армэніі, Вугоршчыны, Вэнэсуэлы, Віетнаму, Ірану, КНДР, Казахстану, Кітаю, Кіргізстану, Малдовы, Палестыны, Расеі, Славакіі, Турэччыны, Таджыкістану, ААЭ, Сэрбіі.

Фактычна большасьць амбасадараў краінаў Эўразьвязу, акрамя амбасадараў Вугоршчыны і Славакіі, не прынялі запрашэньне прыйсьці на парад. Прадстаўнікі амбасады ЗША ў Менску таксама адмовіліся ад удзелу ва ўрачыстасьцях.

12:10 9.5.2020

Парад скончыўся шэсьцем спартоўцаў, пачаліся гуляньні

Як заўжды ў такіх выпадках, пасьля праходу пешых калён вайскоўцаў, гусенічнай і калёснай тэхнікі, пралёту самалётаў і гелікоптараў, выступіла рота ганаровай варты.

Завяршылі парад шэсьцем фізкулькурнікаў і сьпевам расейскамоўнай песьні «День победы».

Людзі разыходзяцца, для іх прадугледжаная дадатковая праграма масавых імпрэз і гуляньняў да Дня перамогі, арганізаваная Менскім гарвыканкамам.

11:35 9.5.2020

11:25 9.5.2020

Некаторыя гледачы параду прыйшлі ў масках, некаторыя бязь іх.

11:24 9.5.2020

11:23 9.5.2020

Лукашэнка пра парад падчас пандэміі: «Не бярыцеся асуджаць нас»

Аляксандар Лукашэнка выступіў перад удзельнкіамі параду і гасьцямі:

«Беларускі народ вынес на плячах груз разбурэньняў, несувымерны ні зь якімі пазбаўленьнямі цяперашняга дня, Нават думка змяніць традыцыю праслаўленьня подзьвігу для нас недапушчальная. У гэтым звар’яцелым сьвеце знойдуцца людзі асуджаюць нас за правядзенне гэтага святога дзеяньня. Не бярыцеся асуджаць нас. У нас не было іншага выбару, а калі б і быў, мы зрабілі б так жа. Таму што на нас глядзяць вочы забітых салдат, закатаваных партызан і падпольшчыкаў. Вочы дзяцей Хатыні. Яны вельмі хацелі жыць, але загінулі ў гэтай страшнай вайне. Хай у гэтым годзе вайсковы парад у Менску стане адзіным на постсавецкай прасторы, ён стане сімвалам Перамогі ўсяго савецкага народа».

11:08 9.5.2020

Лукашэнка ў вайсковым мундзіры прымае парад у Менску

Парад пачаўся аб 11 гадзіне, калі адмысловым картэжам з аховай прыбыў Аляксандар Лукашэнка. Для Аляксандра Лукашэнкі і высокіх чыноўнікаў пабудавалі спэцыяльную трыбуну з чырвоным кілімам і сістэмай кандыцыяваньня. Разам з Лукашэнкам на гэтую трыбуну зайшлі кіраўнікі ўраду і Нацыянальнага сходу.

11:08 9.5.2020

Некаторыя вэтэраны прыйшлі на парад у Менску, нават нягледзячы на тое, што Лукашэнка казаў, што ў гэтым годзе не задаволіў просьбу вэтэранаў адвезьці іх на парад, турбуючыся пра і здароўе ў сувязі з каранавірусам.

10:56 9.5.2020

У Бабруйску перакрылі вуліцу, на якой зьбіраліся ладзіць акцыю прыхільнікі Ціханоўскага

Да правядзеньня «АнтыПараду» заклікаў відэаблогер Сяргей Ціханоўскі. 6 траўня блогера затрымалі і пасадзілі на 15 сутак.

Прыхільнікі Ціханоўскага хацелі прыпаркавацца ўздоўж дарогі ці ехаць з мінімальнай хуткасьцю, уключыць аварыйку і заціснуць гукавы сігнал.

10:52 9.5.2020

Ня толькі парад. Менскі гарвыканкам паведаміў расклад народных гуляньняў на Дзень Перамогі

У Менску на Дзень Перамогі, акрамя ваеннага парада, пройдуць іншыя масавыя мерапрыемствы. Апоўдні ў парках Чалюскінцаў, Горкага, Уга Чавэса, Паўлава і каля Чыжоўка-арэны загучаць папулярныя творы савецкіх і беларускіх кампазытараў, прысьвечаныя апошняй вайне. Мэлёдыі можна будзе паслухаць да 23:30, у парку Горкага — да 16:00.

Наведвальнікі музэю гісторыі Вялікай Айчыннай вайны здолеюць дакрануцца да Сьцяга Перамогі таксама апоўдні. Музэй працягне працу да 20:00.

Урачыста ўскладаць кветкі да манумэнта Перамогі плянуюць ад 13 гадзіны да 16:30. Ушанаваць памяць загінулых прыйдуць афіцыйныя дэлегацыі дзяржаўных органаў, працоўных калектываў менскіх прадпрыемстваў, прадстаўнікоў грамадзкіх і прафсаюзных арганізацый, адміністрацый раёнаў, духавенства, дэпутаты, моладзь.

Сьвяточны канцэрт на плошчы Перамогі пачнецца а 21:30. Выступяць беларускія калектывы «Песьняры», «Купалінка», «Спадчына», салісты Вялікага тэатру, артысты беларускай эстрады і маладыя таленты.

Салют запусьцяць а 23:15.

10:49 9.5.2020

Сярод тых, хто прыйшоў на парад у Менску, шмат замежнікаў

Пад час жывой відэатрансьляцыі карэспандэнт Свабоды Алег Грузьдзіловіч пагутарыў з тымі, хто ідзе на парад, у тым ліку групай турыстаў з Казахстану, турыстамі з Расеі, госьцем зь Нью-Ёрку, будаўнікамі Беларускай АЭС у Астраўцы.

Многія зь іх ідуць бяз масак, кажуць што баяцца каранавіруву.

"Слава Богу ў вас спакойна, ніхто ня робіць гістэрыкі, панікі, захварэлых у вас меней, чым дзе. Не разбураны бальнічны фонд",— сказаў расейскамоўны госьць зь Нью-Ёрку.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG