Амбасадар Расеі Дзьмітры Мезенцаў адмовіўся сказаць, чаму быў на парадзе бяз маскі

Некаторыя прадстаўнікі дыпляматычных місій прысутнічалі на парадзе ў ахоўных масках і нават у пальчатках і акулярах.

Амбасадар Расеі Дзьмітры Мезенцаў быў бяз маскі. Чаму? Не баяўся, што можа заразіцца?

«Я думаў, калі людзі прыходзяць на ўрачыстасьць з нагоды Вялікай Перамогі, нават у маіх калег-журналістаў, а я маю самыя непасрэдныя адносіны да нашага з вамі журналісцкага цэху, ёсьць іншыя пытаньні, на якія я адкажу», — сказаў амбасадар.

У Маскве парад адмянілі, перанесьлі на іншы тэрмін. Як гэта патлумачыць?

«Напэўна, розная эпідэміялягічная абстаноўка. Масква — мэгаполіс на 20 мільёнаў чалавек, і я лічу абгрунтаванымі тыя захады, якія ўжыла кіраўніцтва краіны, кіраўніцтва мэрыі Масквы з тым каб не падвяргаць людзей пагрозе каранавіруснай інфэкцыі. Прэзыдэнт Расеі Ўладзімір Пуцін сказаў, што парад абавязкова будзе, і мы верым, што гэта будзе такая самая ўрачыстасьць, як заўсёды, парад на Краснай плошчы. Тым больш у год 75-годзьдзя Перамогі», — сказаў расейскі амбасадар.

ГЛЯДЗІЦЕ ТАКСАМА:

Большасьць амбасадараў краінаў Эўразьвязу не прыйшлі на парад у Менску

Гэта значыць, што цяпер у Расеі сытуацыя больш складаная, чым у Беларусі?

«Вы ж чытаеце статыстыку і ніхто не хавае. Не ў Расеі — у Маскве. Але сёньня паветраны парад. Сёньня раніцай я паглядзеў трансьляцыю парадаў, якія праходзілі ў буйнейшых абласных і краявых цэнтрах, гэта таксама стварае атмасфэру сьвята, дае пад’ём найперш для вэтэранаў, працаўнікоў тылу, для партызанаў Вялікай Айчыннай, для вэтэранаў узброеных сіл, для ўсіх нас», — сказаў дыплямат.

ГЛЯДЗІЦЕ ТАКСАМА:

МЗС Беларусі пазбавіў акрэдытацыі здымачную групу «Первого канала» Расеі

Раней Аляксандар Лукашэнка выказваў пажаданьне, каб менскі парад паказала расейскае тэлебачаньне. Ці пакажуць?

«Гэта трэба спытаць у расейскіх тэлеканалаў. Я думаю, што ніякіх перашкодаў няма. Але ў расейскіх тэлеканалаў таксама свая праграма, яны расказваюць пра Дзень Перамогі на той роднай для нас зямлі, якая таксама была палітая крывёй героеў. Таму трэба спытаць у журналістаў, я не пытаў», — сказаў Дзьмітры Мезенцаў.

Ці працуе расейскі «Первый канал» на парадзе ў Менску? «Ну ў першага канала ёсьць некаторыя кадравыя складанасьці. Але калі іх калегі падзеляцца матэрыялам, уражаньнямі, то гэта таксама будзе правільна».