Беларускія дыпляматы адказалі Літве на занепакоенасьць парадам
Амбасада Беларусі ў Літве адказала на выказваньні міністра замежных спраў Літвы аб мэтазгоднасьці правядзеньня параду 9 траўня ў Менску, перадае БелаПАН.
«Дзень перамогі — гэта дата, якая зьвязвае ўсіх нас агульным болем стратаў і ўсьведамленьнем таго, што трагедыя вайны не павінна ніколі паўтарыцца... Кожнаму з нас ёсьць, каму пакланіцца і аддаць даніну памяці ў Дзень Перамогі — не сымбалічна, а шчыра, са сьлязьмі на вачах і з удзячнасьцю. Гэтае сьвята і мерапрыемствы, якія традыцыйна прымеркаваныя да сьвяткаваньня Перамогі ў Беларусі, будуць заўсёды займаць у нашых сэрцах асаблівае месца»,— гаворыцца ў паведамленьні дыпляматычнага прадстаўніцтва.
Напярэдадні літоўскі міністар замежных спраў Літвы Лінас Лінкявічус заявіў, што сытуацыя з узроўнем захворваньня ў Беларусі насьцярожвае Літву. І выказаў пажаданьне, каб Беларусь больш адказна ставілася да рэкамэндацый САЗ, у тым ліку, адносна правядзеньня парада і іншых масавых мерапрыемстваў.
Лукашэнка павіншаваў беларусаў
«Беларусь адзначае гэтую знамянальную дату ў няпросты час. Аднак нашы сённяшнія складанасьці цьмянеюць перад нягодамі і стратамі, якія выпалі на долю гераічнага пакаленьня, якое выратавала сьвет ад карычневай чумы», — падкрэсліў Лукашэнка ў віншаваньні да сьвята 9 траўня.
Перад пачаткам параду.
Людзі, якія ідуць паглядзець на парад.
У Мар’інай Горцы затрымалі апэратара «Белсату»
Відэаапэратара тэлеканалу «Белсат» Аляксандра Баразенку затрымалі раніцай 9 траўня, паведамляе «Белсат». Пра затрыманьне сам Аляксандар Баразенка паведаміў у рэдакцыю «Белсату» а 8:49 раніцы. Цяпер ён знаходзіцца ў Пухавіцкім РАУСе ў Мар’інай Горцы.
Баразенка меўся асьвятляць «АнтыПарад» у Бабруйску — акцыю пратэсту супраць параду ў Менску падчас пандэміі каранавірусу, якую заплянаваў разам з падпісчыкамі блогер Сяргей Ціханоўскі. Аднак, пасьля двух дзён перасьледу 6 траўня міліцыя затрымала Ціханоўскага ў Магілёве. Пазьней, затрымалі сама меней 17 прыхільнікаў Ціханоўскага, якія бралі ўдзел у сустрэчах з блогерам, а таксама хто мае дачыненьне да ягонага YouTube-канала «Страна для жизни».
У Менску праводзяць парад да Дня Перамогі, нягледзячы на каранавірус. Відэатрансьляцыя Свабоды
Сярод тых, хто прыйшоў на парад у Менску, шмат замежнікаў
Пад час жывой відэатрансьляцыі карэспандэнт Свабоды Алег Грузьдзіловіч пагутарыў з тымі, хто ідзе на парад, у тым ліку групай турыстаў з Казахстану, турыстамі з Расеі, госьцем зь Нью-Ёрку, будаўнікамі Беларускай АЭС у Астраўцы.
Многія зь іх ідуць бяз масак, кажуць што баяцца каранавіруву.
"Слава Богу ў вас спакойна, ніхто ня робіць гістэрыкі, панікі, захварэлых у вас меней, чым дзе. Не разбураны бальнічны фонд",— сказаў расейскамоўны госьць зь Нью-Ёрку.
Ня толькі парад. Менскі гарвыканкам паведаміў расклад народных гуляньняў на Дзень Перамогі
У Менску на Дзень Перамогі, акрамя ваеннага парада, пройдуць іншыя масавыя мерапрыемствы. Апоўдні ў парках Чалюскінцаў, Горкага, Уга Чавэса, Паўлава і каля Чыжоўка-арэны загучаць папулярныя творы савецкіх і беларускіх кампазытараў, прысьвечаныя апошняй вайне. Мэлёдыі можна будзе паслухаць да 23:30, у парку Горкага — да 16:00.
Наведвальнікі музэю гісторыі Вялікай Айчыннай вайны здолеюць дакрануцца да Сьцяга Перамогі таксама апоўдні. Музэй працягне працу да 20:00.
Урачыста ўскладаць кветкі да манумэнта Перамогі плянуюць ад 13 гадзіны да 16:30. Ушанаваць памяць загінулых прыйдуць афіцыйныя дэлегацыі дзяржаўных органаў, працоўных калектываў менскіх прадпрыемстваў, прадстаўнікоў грамадзкіх і прафсаюзных арганізацый, адміністрацый раёнаў, духавенства, дэпутаты, моладзь.
Сьвяточны канцэрт на плошчы Перамогі пачнецца а 21:30. Выступяць беларускія калектывы «Песьняры», «Купалінка», «Спадчына», салісты Вялікага тэатру, артысты беларускай эстрады і маладыя таленты.
Салют запусьцяць а 23:15.
У Бабруйску перакрылі вуліцу, на якой зьбіраліся ладзіць акцыю прыхільнікі Ціханоўскага
Да правядзеньня «АнтыПараду» заклікаў відэаблогер Сяргей Ціханоўскі. 6 траўня блогера затрымалі і пасадзілі на 15 сутак.
Прыхільнікі Ціханоўскага хацелі прыпаркавацца ўздоўж дарогі ці ехаць з мінімальнай хуткасьцю, уключыць аварыйку і заціснуць гукавы сігнал.
Некаторыя вэтэраны прыйшлі на парад у Менску, нават нягледзячы на тое, што Лукашэнка казаў, што ў гэтым годзе не задаволіў просьбу вэтэранаў адвезьці іх на парад, турбуючыся пра і здароўе ў сувязі з каранавірусам.
Лукашэнка ў вайсковым мундзіры прымае парад у Менску
Парад пачаўся аб 11 гадзіне, калі адмысловым картэжам з аховай прыбыў Аляксандар Лукашэнка. Для Аляксандра Лукашэнкі і высокіх чыноўнікаў пабудавалі спэцыяльную трыбуну з чырвоным кілімам і сістэмай кандыцыяваньня. Разам з Лукашэнкам на гэтую трыбуну зайшлі кіраўнікі ўраду і Нацыянальнага сходу.
Лукашэнка пра парад падчас пандэміі: «Не бярыцеся асуджаць нас»
Аляксандар Лукашэнка выступіў перад удзельнкіамі параду і гасьцямі:
«Беларускі народ вынес на плячах груз разбурэньняў, несувымерны ні зь якімі пазбаўленьнямі цяперашняга дня, Нават думка змяніць традыцыю праслаўленьня подзьвігу для нас недапушчальная. У гэтым звар’яцелым сьвеце знойдуцца людзі асуджаюць нас за правядзенне гэтага святога дзеяньня. Не бярыцеся асуджаць нас. У нас не было іншага выбару, а калі б і быў, мы зрабілі б так жа. Таму што на нас глядзяць вочы забітых салдат, закатаваных партызан і падпольшчыкаў. Вочы дзяцей Хатыні. Яны вельмі хацелі жыць, але загінулі ў гэтай страшнай вайне. Хай у гэтым годзе вайсковы парад у Менску стане адзіным на постсавецкай прасторы, ён стане сімвалам Перамогі ўсяго савецкага народа».
Некаторыя гледачы параду прыйшлі ў масках, некаторыя бязь іх.
Парад у Менску. Некаторыя наведнікі ў масках. Фотагалерэя
Парад скончыўся шэсьцем спартоўцаў, пачаліся гуляньні
Як заўжды ў такіх выпадках, пасьля праходу пешых калён вайскоўцаў, гусенічнай і калёснай тэхнікі, пралёту самалётаў і гелікоптараў, выступіла рота ганаровай варты.
Завяршылі парад шэсьцем фізкулькурнікаў і сьпевам расейскамоўнай песьні «День победы».
Людзі разыходзяцца, для іх прадугледжаная дадатковая праграма масавых імпрэз і гуляньняў да Дня перамогі, арганізаваная Менскім гарвыканкамам.
Большасьць амбасадараў краінаў Эўразьвязу не прыйшлі на парад у Менску
Запрашэньне наведаць парад Перамогі ў цэнтры Менску прынялі 18 замежных амбасадараў, якія працуюць у Беларусі, распавялі Tut.by у МЗС. Гэта амбасадары Азэрбайджану, Армэніі, Вугоршчыны, Вэнэсуэлы, Віетнаму, Ірану, КНДР, Казахстану, Кітаю, Кіргізстану, Малдовы, Палестыны, Расеі, Славакіі, Турэччыны, Таджыкістану, ААЭ, Сэрбіі.
Фактычна большасьць амбасадараў краінаў Эўразьвязу, акрамя амбасадараў Вугоршчыны і Славакіі, не прынялі запрашэньне прыйсьці на парад. Прадстаўнікі амбасады ЗША ў Менску таксама адмовіліся ад удзелу ва ўрачыстасьцях.
Салдат страціў прытомнасьць падчас параду ў Менску. Відэа
Падчас параду да 75-х угодкаў заканчэньня Другой сусьветнай вайны 9 траўня ў Менску адзін з салдат, якія ўдзельнічалі ў парадзе, страціў прытомнасьць.
Відэа здарэньня апублікаваў Тэлеграм-канал Nexta Lite.