Мужчынскі праваслаўны манастыр у вёсцы Малыя Ляды Смалявіцкага раёну знаходзіцца на карантыне, наведваць яго нельга.
Каранавірус у Беларусі і ў сьвеце. Як разьвіваюцца падзеі >>
Пра гэта карэспандэнту Свабоды паведамілі ў манастыры.
«Па ўсю інфармацыю зьвяртайцеся да мэдыцыны», — сказалі там.
Старшыня Сынадальнага інфармацыйнага аддзелу БПЦ пратаярэй Сяргей Лепін пацьвердзіў карэспандэнту Свабоды, што Лядзенскі манастыр знаходзіцца на карантыне і там ёсьць людзі з пацьверджаным каранавірусам.
«Але колькі, я ня ведаю. Па дадатковую інфармацыю вам трэба зьвяртацца ў Лядзенскі манастыр», — сказаў ён.
Прэс-сакратар Барысаўскай япархіі а. Ігар Васько сказаў, што хворых у манастыры няма. Ён пракамэнтаваў публікацыі ў СМІ наконт сытуацыі там.
«Няма такой колькасьці людзей. Там пішуць, што 54 чалавекі, але ў манастыры ўсяго іх 20. Таму я не магу пацьвердзіць гэтую інфармацыю пра каранавірус, пра хворых. А тое, што манастыр закрыты для паломнікаў, то гэта так. Гэта зьвязана са складанай эпідэміялягічнай сытуацыяй. Таму было прынята рашэньне, што на Пакутным тыдні, а потым на Вялікдзень будзе набажэнства, але потым яго зачыняць на нейкі час. Унутраны распарадак у іх застаецца звычайны», — сказаў прадстаўнік Барысаўскай эпархіі.
Ён таксама расказаў, што ўсе 20 насельнікаў манастыра застаюцца на месцы і выконваюць свае абавязкі.
«Гэта манахі, паслушнікі і невялікая колькасьць супрацоўнікаў. Усе яны там. У тым ліку ігумен манастыра ераманах Лаўр», — сказаў а. Ігар Васько.
На праваслаўны Вялікдзень кіраўнік Беларусі Аляксандар Лукашэнка разам з сынам Мікалаем наведаў манастыр і Сьвята-Дабравешчанскую царкву.
Галоўны лекар Смалявіцкага цэнтру гігіены і эпідэміялёгіі Павал Галубовіч сказаў карэспандэнту Свабоды, што ўсю інфармацыю ён перадае ў Міністэрства аховы здароўя, таму зьвяртацца наконт сытуацыі ў Лядзенскім манастыры трэба туды.
У сваю чаргу прэс-сакратарка міністэрства Юлія Барадун параіла «зьвяртацца ў манастыр».
Апроч Лядзенскага, на карантыне знаходзіцца і Жыровіцкі манастыр, некаторыя манастыры закрываюцца на самаізаляцыю, сказаў прадстаўнік БПЦ Сяргей Лепін.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
