У Беларусі ня ўводзяць карантын у навучальных установах у сувязі з COVID-19, не пераносяць школьныя вакацыі на ранейшы тэрмін і нават адкрываюць дзіцячыя лягеры.
Як піша Міністэрства адукацыі ў Telegram, школьныя вакацыі пачнуцца 30 сакавіка — у той тэрмін, што і плянавалі раней.
«Ва ўстановах адукацыі будуць арганізаваныя і працаваць дзіцячыя лягеры, — паведамляе міністэрства. — Бацькі могуць падаць заявы ў вызначаным парадку.
Праграма знаходжаньня распрацоўваецца індывідуальна ў кожнай навучальнай установе з улікам усіх санітарна-прафіляктычных мерапрыемстваў і рэкамендацыяў санэпідслужбы і Міністэрства аховы здароўя».
Мінздароўя тым часам далучылася да ўсясьветнага флэшмобу «Заставайцеся дома», заклікала да самаізаляцыі тых, хто знаходзіцца ў групе рызыку: сталых грамадзянаў, хранічна хворых пацыентаў, людзей з хаця б найменшымі прыкметамі вострай рэсьпіраторнай інфэкцыі, а таксама тых, хто прыбыў з-за мяжы і, адпаведна, атрымаў рэкамэндацыю да самаізаляцыі.
Аляксандар Лукашэнка раней тлумачыў, што ў Беларусі ня ўводзяць карантынаў, бо сытуацыя вакол COVID-19 «гэта псыхоз». Таксама ён казаў, што карантыны — ня сфэра дзейнасьці Мінздароўя («а тых, хто будзе закрываць-адкрываць, у нас хапае»), а сам ён толькі дазволіў бацькам не выпраўляць вучняў у школы: маўляў, «не забараняем».
Зь ім не пагадзіліся палітыкі, мэдыкі і студэнты:
Каранавірус у Беларусі і ў сьвеце. Як разьвіваюцца падзеі >>
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў