Хто і як дапамагае ахвярам хатняга гвалту ў Беларусі. Дакумэнтальны фільм

У Беларусі каля 10 гадоў існуе таемны «Прытулак» – шэлтэр для жанчын, якія пацярпелі ад хатняга гвалту. Гэта вялікі дом у прыватным сэктары Менска. Ён існуе на прыватныя ахвяраваньні. Больш за 1000 жанчын штогод зьвяртаюцца да валянтэраў па дапамогу.

Законапраект аб супрацьдзеяньні хатняму гвалту ў Беларусі павінен быў быць прыняты ў 2018 годзе, але гэтага не адбылося. Аляксандар Лукашэнка раскрытыкаваў законапраект, назваўшы яго «глупствам з Захаду». Пра тое, хто дапамагае пацярпелым і як – у дакумэнтальным фільме з цыклю «Невядомая Беларусь».

ГЛЯДЗІЦЕ ТАКСАМА:

Пацярпелыя ад хатняга гвалту могуць атрымаць дапамогу онлайн у часе пандэміі каранавірусу

Паводле дадзеных МУС, у Беларусі за сем месяцаў 2019 году ад хатняга гвалту загінулі 55 чалавек, 4,5 тысячы хатніх скандалістаў былі прымусова адселеныя ад сям’і. У бліжэйшай пэрспэктыве гаворкі пра падрыхтоўку законапраекту аб процідзеяньні хатняму гвалту не ідзе.

Грамадзкае абʼяднаньне «Радзіслава» было створанае ў 2002 годзе ў горадзе ў Менску жанчынамі, якія пацярпелі ад гвалту, для аказаньня дапамогі іншым жанчынам, якія патрапілі ў такую ж сытуацыю. Цяпер у ім 30 спальных месцаў. Жанчыны могуць жыць у прытулку ад 1 дня да 1 году. Ім бясплатна прадастаўляецца дапамога псыхолягаў, сацыяльных работнікаў, юрыстаў.

Кругласутачны тэлефон экстрэннай дапамогі — 8029 610 83 55 email: kartanasiliya@gmail.coм

Як караюць за хатні гвалт у Беларусі?

У Беларусі няма мэханізму прадухіленьня хатняга гвалту, ёсьць толькі пакараньні за фактычна ўчынены гвалт. Канстытуцыя Беларусі гарантуе права на прыватнае жыцьцё, недатыкальнасьць, абарону гонару і годнасьці.

Паводле МУС, у 2019 годзе ад хатняга гвалту загінулі 55 чалавек і 4,5 тысячы хатніх скандалістаў сёлета прымусова адселеныя ад сям’і.

Пасьля крытыкі Аляксандра Лукашэнкі ў 2018 годзе, які расказаў, што сам біў свайго сына, Міністэрства ўнутраных спраў адмовілася ад падрыхтоўкі закону «Аб супрацьдзеяньні хатняму гвалту».

У канцэпцыі таго законапраекту:

• Даваліся азначэньні хатняга гвалту і крыўдзіцеля;
• Уводзілася працэдура ацэнкі рызыкі — вызначэньня верагоднасьці паўторнага нанясеньня шкоды жыцьцю ці здароўю пацярпелага;
• Прадугледжвалася ўжываньне так званага абарончага прадпісаньня, якое абмяжоўвае дзеяньні агрэсара на час ад 3 да 30 сутак.

Для ахвяраў хатняга гвалту дзейнічае «гарачая лінія» па нумары тэлефона 8 801 100-8-801.