Лінкі ўнівэрсальнага доступу

«На вуліцу пасьля 18-й пажадана не выходзіць». Беларуска расказала, што адбываецца ў закрытай на карантын Сардыніі


Зьнелюдзелая плошча перад саборам Сьвятога Марка ў Вэнэцыі

Італія, дзе больш за 10 тысяч чалавек захварэлі на новы каранавірус і звыш 600 чалавек памерлі ад яго, увяла татальны карантын. Беларуска Натальля, якая жыве ў паўднёвай частцы Сардыніі (італьянская выспа ў Міжземным моры), расказала карэспандэнту Свабоды, што адбываецца ў краіне.

УЖЫВУЮ Каранавірус у Беларусі і ў сьвеце. Як разьвіваюцца падзеі

«На поўначы Італіі, дзе Мілян, Лямбардыя, у бок Рыміні, людзі заражаюцца з хуткасьцю ветру. У нас на Сардыніі чалавек 20 заразіліся каранавірусам. Аднак прынялі захады, і вялікі дзякуй мэру, нашаму прэмʼер-міністру, што хутка закрылі ўсе аэрапорты, не ўпускаюць і не выпускаюць караблі. У Беларусь мяне выпусьцілі б хіба толькі на пахаваньне, альбо з прычыны стану здароўя. У такім разе я павінна прадставіць дакумэнт», — расказала беларуска.

Карантын праз каранавірус прадоўжылі да 3 красавіка, кажа Натальля.

«Крамы цяпер працуюць з панядзелка да пятніцы паводле скарочанага графіку. Пускаюць туды ад 20 да 40 чалавек адначасова. У чарзе ў краме трэба стаяць на дыстанцыі адзін-два мэтры адно ад аднаго. Усе бары і кавярні нібыта працуюць да 18 гадзін, але прыватнікі пераважна закрываюць іх з 11 сакавіка, бо ўсе разумеюць, што людзі ня будуць хадзіць. Кірмашы таксама закрываюць. Закрытыя дзіцячыя садкі, школы, трэнажэрныя залі. І я думаю, што на Сардынію нікога не ўпускаюць», — кажа Натальля.

Зьнелюдзелы славуты гандлёвы пасаж у Міляне — Галерэя Віктара Эмануіла II
Зьнелюдзелы славуты гандлёвы пасаж у Міляне — Галерэя Віктара Эмануіла II

Суразмоўца кажа, што харч яны не закуплялі ў запас, бо крамы будуць працаваць.

«У нас на Сардыніі людзі дысцыплінаваныя, асьцярожныя, усе ўсё цудоўна разумеюць. Нехта ходзіць у масках, а нехта не. На вуліцу пасьля 18-й пажадана не выходзіць».

Натальля сказала, што выходзіць з дому можна ў выключных выпадках. Каб паехаць у іншы горад, павінна быць прычына, напрыклад да доктара.

«Бо калі мяне паліцыя спыніць, я павінна назваць прычыну. А калі я выйшла проста пагуляць, то мяне могуць аштрафаваць на 206 эўра і яшчэ арыштаваць на тры месяцы. Каб паехаць, напрыклад, да доктара, трэба раздрукаваць адмысловую паперу, якую даюць у прэфэктуры, альбо мець яе ў электронным выглядзе».

Карабінэры правяраюць аўтамабілі на вуліцах Мілану, 10 сакавіка
Карабінэры правяраюць аўтамабілі на вуліцах Мілану, 10 сакавіка

Натальля кажа, што муж яе працуе, яна вучыцца, у іх 6-гадовая дачка.

«Муж едзе на працу ў іншы горад, і яму зноў жа патрэбная гэтая папера, якая пацьвярджае, што ён едзе на працу, каб не было праблемаў з паліцыяй».

Натальля кажа, што ня мае жаданьня вяртацца ў Беларусь, а пачуцьцё страху заразіцца на каранавірус было б і ў Беларусі.

«У Беларусі таксама ёсьць хворыя на каранавірус, і іх колькасьць будзе павялічвацца. Бо самалёты лётаюць, і яны будуць прылятаць з каранавірусам. Чалавек прыняў асьпірын, сеў у самалёт, у яго няма тэмпэратуры. А за гэты час ён меў зносіны зь вялікай колькасьцю людзей, заразіў іх. Таму я сумняюся, што ў Беларусі ўсё дасканала, як пішуць».

Пашырэньне каранавірусу ў Італіі Натальля тлумачыць адкрытасьцю краіны, масавым турызмам.

«Дарэмна так дапусьцілі сытуацыю. На маю думку, трэба было ўсё закрыць адразу».

Колькасьць заражаных у Італіі на 11 сакавіка дасягнула 10149 чалавек, гэта другі паказьнік у сьвеце пасьля Кітаю. Памер 631 чалавек.

Што трэба ведаць пра новы каранавірус з Кітаю

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.

Пашырэньне каранавірусу ў сьвеце. Гадзіна за гадзінай

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG