8 сакавіка ў Мёрах адбылося «Народнае галасаваньне» (праймэрыз), у межах якога выбіраюць адзінага кандыдата ад аб'яднанай апазыцыі.
У галасаваньні ўзялі ўдзел 18 чалавек, галасы разьмеркаваліся наступным чынам:
Павал Севярынец — 11, Мікалай Казлоў — 4, Вольга Кавалькова — 2, Аляксей Янукевіч і Юрась Губарэвіч — не атрымалі галасоў.
Як паведаміў Свабодзе Павал Севярынец, галасаваньне ў Мёрах стала першым, куды завітаў прадстаўнік уладаў.
«На сустрэчы прыйшоў намесьнік старшыні Мёрскага райвыканакаму Валер Драба. Ён актыўна ўдзельнічаў, задаваў шмат пытаньняў: пра сельскую гаспадарку, пра догляд за дзецьмі. Таксама ён быў адзіным, хто падняў руку, калі мы спыталі, хто лічыць, што ў Беларусі сумленныя выбары. Валер Драба сказаў, што падліковыя камісіі працуюць празрыста і любы можа ў гэтым пераканацца», — расказаў Севярынец.
Падчас падліку галасоў у Мёрах арганізатары знайшлі адзін незапоўнены бюлетэнь, яго палічылі сапсаваным. Хто яго апусьціў у скрыню, невядома.
Мёры — чацьвёрты горад, дзе праходзяць праймэрыз. Пакуль першае месца займае Павал Севярынец (117 галасоў). 8 сакавіка яшчэ заплянаваныя галасаваньні ў Шаркаўшчыне і Паставах.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
