Рызыка зьяўленьня цяжкіх формаў захворваньня, выкліканага новым каранавірусам, Міністэрства аховы здароўя Беларусі ацэньвае як ня вельмі высокую. Пра гэта ў інтэрвію тэлеканалу АНТ расказаў міністар аховы здароўя Беларусі Ўладзімер Каранік, паведамляе БЕЛТА.
Міністар адзначыў, што Беларусь мае магчымасьці для таго, каб абараніцца ад распаўсюджваньня каранавіруснай інфэкцыі і зьяўленьня яе цяжкіх формаў.
«Каб ніхто ад гэтай хваробы не памёр, у нашых сілах зрабіць усе захады. Мы сёньня рызыку менавіта цяжкіх формаў расцэньваем як ня вельмі высокую, таму што ў адрозьненьне ад многіх краін у нас па-іншаму пабудованая сыстэма, якая дазваляе больш апэратыўна і адэкватна рэагаваць на наяўныя выклікі », — сказаў Уладзімер Каранік.
Што трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
