Лінкі ўнівэрсальнага доступу

У Магілёве за хабар і махлярства асудзілі супрацоўніка Сьледчага камітэту


Юры Клопаў падчас суду

Былы сьледчы на судзе параўнаў зьбіраньне доказаў ягонай віны з тым, як гэта рабілася ў 1937 годзе.

У Магілёве асудзілі на 7 гадоў калёніі ўзмоцненага рэжыму капітана юстыцыі з упраўленьня Сьледчага камітэту Магілёўскай вобласьці Юрыя Клопава. Яго прызналі вінаватым у замаху на завалоданьне чужой маёмасьцю шляхам падману ў асабліва буйным памеры (махлярстве) і падбухторваньні да даваньня хабару ў буйным памеры. Таксама Клопава пазбавілі службовага званьня «капітан міліцыі».

Віна былога сьледчага ў атрыманьні хабару паўторна ў асабліва буйным памеры не была даказаная, за гэты эпізод яго апраўдалі. Справу разглядаў Ленінскі раённы суд Магілёва.

Юрыя Клопава вядуць на агучваньне выраку
Юрыя Клопава вядуць на агучваньне выраку

Афіцыйнай інфармацыі пра затрыманьне Клопава не было. Як вынікае з прысуду, яго затрымалі 24 траўня 2019 году.

Паводле адваката падсуднага, Клопава затрымалі за падбухторваньне да даваньня хабару аднаго з пацярпелых, які «быў блізкі да органаў КДБ і пазьней у КДБ зьвярнуўся». Як сьцьвярджае адвакат, іншыя эпізоды злачыннай дзейнасьці Клопава «былі падабраныя», яго абгаварылі трое чалавек і «суд пачуў» довады абароны пра гэта. 7-гадовае пакараньне адвакат называе «перамогай», бо абвінавачаньне прасіла падсуднаму 12 гадоў.

«У атрыманьні хабару ён катэгарычна не прызнаў віны, і яе доказаў не было, — кажа адвакат Клопава. — На адных паказаньнях яго зьбіраліся прыцягваць да крымінальнай адказнасьці, прычым адзін зь фігурантаў зьмяніў паказаньні ў судзе».

Сам абвінавачаны, якога на судовым працэсе трымалі ў клетцы, заявіў, што дасьць камэнтар па справе, калі да яго прыйдуць у турму. Вырак судзьдзі Ігара Швэдава ён зьбіраецца абскарджваць, на гэта ў яго ёсьць 10 дзён.

Tut.by пісаў, што ў сваім апошнім слове на судзе Клопаў заявіў, што яго арыштавалі на падставе паказаньняў «мярзотнікаў» і параўнаў мэтады зьбіраньня доказаў віны з тым, як тое адбывалася ў 1937 годзе. Ён казаў, што зь яго «ня трэба рабіць сакральнай ахвяры перадвыбарнай кампаніі пэўных кандыдатаў» і прасіў судзіць яго «за тое, што ён учыніў». Спасылаўся на словы Аляксандра Лукашэнкі пра фальсыфікацыі падчас расьсьледаваньня крымінальных спраў і казаў, што «яны нічога ня значаць», раз ён абвінавачаны.

Родныя Юрыя Клопава ня згодныя з прысудам, лічаць абвінавачаньні незаслужанымі, але адмовіліся гаварыць з журналістамі, патлумачыўшы гэты тым, што «праўды яны не напішуць».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG