Усясветная арганізацыя здароўя павысіла рызыку распаўсюду каранавірусу ў сьвеце
Ступень распаўсюду каранавіруса ў сьвеце «вельмі высокая». Пра гэта падчас прэс-канфэрэнцыі паведаміў прадстаўнік Усясьветнай арганізацыі аховы здароўя (УАЗ) у Беларусі Батыр Бердыклычаў.
«Тэма каранавіруса ў полі ўвагі ўсіх краін сьвету. УАЗ перагледзела рызыку распасюду каранавіруса ў сьвеце ад высокай да вельмі высокай. УАЗ заклікае быць гатовым да зьяўленьня новых выпадкаў. УАЗ заклікае краіны засяродзіцца на трох прыярытэтах: працягваць меры нагляду, забясьпечыць абарону мэдыцынскага пэрсаналу, совечасова інфармаваць насельніцтва ад усіх рызыках, каб перапыніць распаўсюд чутак», — сказаў прадстаўнік Усясветнай арганізацыі здароўя.
На думку Батыра Бердыклычава, у Беларусі праводзіцца вялікая праца ў сувязі з каранавірусам, няма падставаў для панікі.
Захворваньні на каранавірус выявілі праз карантын
Паводле начальніка галоўнага ўпраўленьня арганізацыі мэдычнай дапамогі і экспэртызы Мінздароўя Алены Богдан, усе тры выпадкі захворваньня на каранавірус у Беларусі выявілі праз знаходжаньне хворых у шпіталях на 14-дзённым карантыне.
Менавіта 2 тыдні цягнецца інкубацыйны пэрыяд каранавіруса. Практыка праверкі і шпіталізацыі ў кантактныя цэнтры прымяняецца да людзей, якія вяртаюцца зь Кітаю, Італіі, Ірану і Паўднёвай Карэі. Калі цягам карантыну ў людзей узьнікаюць прыкметы вострых рэспьпіраторных захворваньняў, ў інфэкцыйным шпіталі ў іх бяруць пробы на каранавірус.
Чаму ў шпіталях перапрафілююць ложкі?
Практыка перапрафіляваньня ложкаў у шпіталях праводзіцца штогод, гэта зьвязана з сэзонным абвастрэньнем запаленьня лёгкіх і рэсьпіраторных інфэкцый, сказала Алена Богдан.
Што з тымі, у каго знайшлі каранавірус?
Жанчына, у якой выдзелены каранавірус, знаходзіцца ў інфэкцыйным шпіталі. Тэмпэратура ў яе нармальная, сымптомаў хваробы няма, лячэньня ёй не патрабуецца, паведаміў начальнік Віцебскага гарадзкога ўпраўленьня аховы здароўя Юры Дзяркач.
«Жанчына, у якой выявілі каранавірус знаодзіцца ў лякарні, яе стан задавальняючы, яна фактычна здаровая і лячэньне ёй не патрабуецца», — паведаміў чыноўнік.
Яшчэ двое пацыентаў у Менску таксама, па словах мэдыкаў, пачуваюцца добра. Лячэньне ім не патрабуецца.
«У Менску ў двух чалавек тэмпэратура нармальная, сымптомаў захворваньня няма. Мы кантралюем сытуацыю, мы гатовы аказаць дапамогу, калі яна спатрэбіцца. Але да гэтых людзей трэба ставіцца далікатна», — сказаў Ігар Карпаў, прафэсар, галоўны няштатны інфэкцыяніст Міністэрства здароўя.
Мінздароўя пацьвердзіла тры выпадкі заражэньня каранавірусам
Мінздароўя пацьвердзіла тры выпадкі заражэньня каранавірусам «з высокай ступеньню дакладнасьці». Пра гэта на прэс-канфэрэнцыі ў Менску паведаміла намесьніца міністра аховы здароўя, галоўны санітарны ўрач Беларусі Натальля Жукава.
Яна паведаміла, што вынікі тэстаў на каранавірус накіруюць на дадатковую экспэртызу, у тым ліку ў адну з лябараторыяў усясьветнай арганізцыі здароўя.
Натальля Жукава паведаміла, што цяпер у Беларусі абследуюцца людзі, якія наведвалі краіны, дзе ёсьць праблемы з каранвірусам, а таксама тыя, хто кантактаваў з тымі, хто захварэў.
Мінздароўя расказвае, што з хворымі на каранавірус у Беларусі
Свабода вядзе жывую трансьляцыю пэс-канфэрэнцыі.
ЭГУ перавёў студэнтаў на дыстанцыйнае навучаньне
Эўрапейскі гуманітарны ўнівэрсытэт у Вільні на два тыдні перавёў студэнтаў на дыстанцыйнае навучаньне. Аўдыторных заняткаў у гэты час ня будзе, іх перанясуць на сэрвэр дыстанцыйнага навучаньня.
Іншагароднім студэнтам раяць вяртацца ў Вільню не раней за 15 сакавіка. Студэнтаў, якія падчас вакацыяў наведвалі краіны Эўропы і Азіі, просяць запоўніць апытальнік.
Такія захады ЭГУ прыняў паводле рэкамэндацыяў Міністэрства аховы здароўя Літвы.
6 берасьцейцаў зьмясьцілі пад назіраньне
У Берасьці пад назіраньнем знаходзяцца 6 чалавек, якія прыехалі зь Італіі, піша БелТА. Прыкметаў каранавірусу ў іх няма, але пад назіраньнем людзі будуць знаходзіцца неабходныя 14 дзён.
У больніцу даставілі студэнтку і яе бацькоў, якія прыехалі зь Італіі. А таксама трох кіроўцаў-экспэдытараў, якія наведвалі Апэнінскі паўвостраў. Інфармацыю пра шпіталізацыю трох кіроўцаў пацьвердзіла намесьніца міністра — галоўны дзяржаўны санітарны ўрач Беларусі Натальля Жукава.
Тым часам у менскім ГУМе
Прэвэнтыўныя меры: рэчыцкіх школьнікаў, якія вярнуліся з Італіі, назіраюць спэцыялісты
11 навучэнцаў школ Рэчыцкага раёну, якія вярнуліся 28 лютага з італьянскага горада Таварнэле (рэгіён Флярэнцыя), дзе адпачывалі ў складзе арганізаванай групы, цяпер знаходзяцца пад назіраньнем спэцыялістаў, паведамілі БелТА ў прэс-службе Гомельскага аблвыканкаму.
«Па ўзгадненьні зь Міністэрствам аховы здароўя ў рамках прэвэнтыўных мер дзеці прыбылі ў сацыяльна-пэдагагічны цэнтар Рэчыцкага раёну. Гэта не каранцін», — падкрэсьлілі ў прэс-службе. Дзеці і пэдагог, які іх суправаджаў, знаходзяцца пад наглядам, для іх арганізавалі харчаваньне, мэдыцынскае забесьпячэнне і кругласутачны догляд; каб не перапыняць навучальны працэс, праводзяцца заняткі.
- Па стане на 2 сакавіка ў сьвеце выявілі 89 тысяч выпадкаў COVID-19 (зь іх 80,1 тысячы ў Кітаі, 4,2 тысячы ў Паўднёвай Карэі, 1,7 тысячы ў Італіі, каля 1 тысячы ў Іране). «Актыўнымі» застаюцца 40,8 тысячы выпадкаў. Выпісаныя здаровымі пасьля інфэкцыі 45 156 чалавек.
- За ўвесь час ад COVID-19 памерлі 3057 чалавек (зь іх 2914 у Кітаі, 54 у Іране, 31 у Італіі, 26 у Паўднёвай Карэі). Летальнасьць складае 3,43%, але вірус збольшага забівае людзей сталага веку, якія ўжо маюць іншыя захворваньні.
- У Беларусі пацьвердзілі 3 выпадакі COVID-19 — у грамадзяніна Ірану, студэнта БНТУ, у бацькі яго беларускай сяброўкі і ў жанчыны зь Віцебску, якая падарожнічала ў Італію.
Ва Ўхані закрылі экстрана збудаваны шпіталь
У кітайскім горадзе Ўхань, зь якога пачаўся распаўсюд COVID-19, улады вырашылі закрыць першы імправізаваны шпіталь, які будавалі для пацыентаў з новым каранавірусам, піша Reuters са спасылкай на дзяржаўную кітайскую тэлевізію.
Гэтая навіна супала з рэзкім падзеньнем новых выпадкаў выяўленьня каранавірусу ў Кітаі — за мінулы дзень іх выявілі толькі дзьве сотні, найменшую колькасьць са студзеня.
Але ў Кітаі застаюцца «актыўнымі» 32,6 тысячы выпадкаў COVID-19 — агулам там выяўлена 80,1 тысячы выпадкаў, выпісалі здаровымі 44,5 тысячы, памерлі 2,9 тысячы, у цяжкім стане застаецца 7,1 тысячы пацыентаў. За мінулы дзень у Кітаі памерлі яшчэ 42 пацыенты з COVID-19.
БНТУ будзе весьці заняткі праз Youtube
Пасьля таго, як у студэнта БНТУ выявілі COVID-19, студэнтаў вырашылі вучыць «паводле індывідуальнага графіку» прынамсі да 14 сакавіка. Цяпер стала вядома, як гэта будзе адбывацца: праз трансьляцыі заняткаў на Youtube.
Пакуль на кожны дзень заплянаваныя па два вэбінары для будаўнічага факультэту (толькі на адзін дзень тры, на яшчэ адзін — толькі адзін). Матэрыялы будуць дасяжныя пад ліцэнзіяй Creative commons.
Так, у панядзелак студэнтам Будаўнічага факультэту прапануюць паглядзець вэбінары пра «мадэляваньне, разьлік і аналіз напружана-дэфармаванага стану балечнага элемэнту» і «разьлік выдаткаў на часовыя будынкі і зімовае ўдаражаньне пры складаньні каштарыснай дакумэнтацыі». У аўторак ім прапануюць вэбінары пра «электрычнае поле ў рэчыве» і «карысныя ангельскамоўныя вітаньні».
Каранавірус, каранавірус у Беларусі, каранавірус у сьвеце, коронавирус, коронавирус в Беларуси, коронавирус в мире, Лукашенко про коронавирус
У Беларусі павялічылі колькасьць лякарняў, куды будуць класьці пацыентаў з сымптомамі рэсьпіратарнай інфэкцыі
Міністэрства здароўя вырашыла разьмяшчаць людзей з сымптомамі рэсьпіратарных захворваньняў ня толькі ў Менскай інфэкцыйнай лякарні, але таксама ў тэрапэўтычным корпусе Менскай клінічнай лякарні №6 і ў некаторых абласных лякарнях (поўны сьпіс не называюць).
Паводле міністэрства, «дадзеныя ўстановы абсталяваныя ўсім неабходным абсталяваньнем і высокакваліфікаваным пэрсаналам».
У аднагрупнікаў іранца з БНТУ ня выявілі новы каранавірус
Як паведаміла Міністэрства здароўя, бліжэйшае атачэньне і частку аднагрупнікаў першага ў Беларусі пацыента з COVID-19 праверылі на новы каранавірус. Пакуль лябараторныя дасьледаваньні ня выявілі наяўнасьці РНК, што магла б належыць вірусу SARS-CoV-2.
Тых аднагрупнікаў хворага, якія мелі прыкметы рэсьпіратарнай інфэкцыі, шпіталізавалі ў Менскую інфэкцыйную лякарню, а астатніх, якія ня мелі сымптомаў, паклалі ў шпіталь інвалідаў Вялікай айчыннай пад назіраньне на час інкубацыйнага пэрыяду вірусу — 14 дзён.
За астатнімі студэнтамі і выкладчыкамі БНТУ, дзе вучыўся пацыент з COVID-19, назіраюць мэдыкі, у тым ліку абяцаюць наведваньне дома.
Колькасьць памерлых ад новага каранавірусу перавысіла 3 тысячы
Агульная колькасьць інфікаваных каранавірусам склала да вечара 1 сакавіка 2020 году 88339 чалавек.
З канца сьнежня 2019 году, калі пачалася ўспышка каранавіруснай інфэкцыі COVID-19 (пнеўманіі новага тыпу), ахвярамі захворваньня сталі 3 тысячы чалавек (дакладная лічба: 3001), 42728 чалавек паправіліся.
Такія апошнія зьвесткі публікуе міжнародны інфармацыйны рэсурс WorldOmeter.
За суткі колькасьць заражаных каранавірусам у Італіі вырасла на 50%
Колькасьць інфікаваных каранавірусам у Італіі за апошнія суткі вырасла на 50% і складае 1694 чалавекі.
Пра гэта заявіў Анджэлё Барэлі, кіраўнік службы цывільнай абароны, паведамляе dpa.
Паводле яго зьвестак, лячэньне праходзілі або праходзяць 1577 чалавек; 83 пацыенты ўжо лічацца вылечанымі, а 34 — памерлі.
Днём раней паведамлялася аб прыблізна 1100 выпадках заражэньня каранавірусам у Італіі.
У Беларусі будуць абсьледаваць усіх, хто прыбывае з Кітаю, Паўднёвай Карэі, Ірану і Італіі
У Беларусі з прычыны пагаршэньня эпідэмічнай сытуацыі ў Кітаі, Іране, Італіі і Паўднёвай Карэі будуць праводзіць абсьледаваньні і лябараторную дыягностыку ўсіх грамадзян, якія прыбылі або прыбудуць з гэтых краінаў пасьля 20 лютага, паведамляе Міністэрства аховы здароўя.
«Колькасьць беларускіх і замежных грамадзян, якіх неабходна абсьледаваць і шпіталізаваць, павялічваецца. Таму прынята рашэньне грамадзян з сымптомамі рэсьпіратарных захворваньняў разьмяшчаць ня толькі ў карпусах Менскай інфэкцыйнай бальніцы, але і ў тэрапэўтычным корпусе Мінскай клінічнай бальніцы № 6, а таксама ў некаторых абласных установах аховы здароўя», — адзначаецца на сайце міністэрства.
Успышка каранавірусу палепшыла паветра над Кітаем — NASA
Маніторынг забруджаньня паветра спадарожнікамі NASA і Эўрапейскага касьмічнага агенцтва выявіў значнае зьніжэньне дыяксыду азоту над Кітаем.
Паводле інтэрпрэтацыі амэрыканскіх і эўрапейскіх экспэртаў, зьмены якасьці паветра над Кітаем да лепшага часткова зьвязаныя з запаволеньнем кітайскай эканомікі пасьля ўспышкі каранавірусу і з абмежаваньнямі руху транспарту ў правінцыі Хубэй, у якой знаходзіцца галоўны агмень каранавірусу.
Паводле навукоўцаў NASA, зьніжэньне забруджаньня паветра было спачатку відавочнае ў рэгіёне гораду Ўхань, але потым распаўсюдзілася па ўсёй краіне.
Дыяксыд азоту (NO2) — шкодны для здароўя газ, які вылучаецца аўтамабілямі, электрастанцыямі і прамысловымі аб’ектамі.
Першыя выпадкі заражэньня каранавірусам зарэгістравалі ў Чэхіі
Міністар аховы здароўя Чэхіі Адам Войцех заявіў 1 сакавіка, што ў Чэхіі зарэгістравалі тры першыя выпадкі заражэньня каранавірусам.
Два заражаныя пацыенты знаходзяцца ў шпіталі ў Празе, адзін — у шпіталі ў Усьці-над-Лабэм.
Колькасьць выпадкаў каранавірусу ў Нямеччыне вырасла амаль удвая
Колькасьць пацьверджаных выпадкаў каранавірусу ў Нямеччыне станам на 1 сакавіка вырасла да 117 з 66, паведамляе Reuters, спасылаючыся на нямецкіх мэдыкаў.
Больш за палову выпадкаў заражэньня прыпадае на Паўночны Рэйн-Вэстфалію, самую густанаселеную зямлю Нямеччыны, дзе ў панядзелак, 2 сакавіка, будуць закрытыя некалькі школаў і дзіцячых садкоў, каб паспрабаваць прадухіліць распаўсюд вірусу пасьля таго, як яго выявілі сярод пэрсаналу гэтых установаў.