Лінкі ўнівэрсальнага доступу

Пасьля прызнаньняў Гараўскага Сьледчы камітэт падоўжыў справу аб зьнікненьні Захаранкі


Юры Гараўскі прызнаецца ў палітычных забойствах

Сьледчы камітэт Беларусі да 18 сакавіка падоўжыў расьсьледаваньне па факце зьнікненьня Юрыя Захаранкі, паведаміў БелаПАН праваабаронца Алег Воўчак, які прадстаўляе інтарэсы сям’і былога міністра ўнутраных спраў.

«Аб выніках расьсьледаваньня вам будзе паведамлена дадаткова», — гаворыцца ў паведамленьні за подпісам начальніка аддзелу цэнтральнага апарату СК Юрыя Вараўкі.

Расьсьледаваньне было адноўлена пасьля таго, як 16 сьнежня мінулага году радыёстанцыя Deutsche Welle апублікавала інтэрвію з былым байцом спэцыяльнага атраду хуткага рэагаваньня Юрыем Гараўскім.

Ён прызнаўся ў датычнасьці да зьнікненьня і забойства Юрыя Захаранкі, а таксама экс-кіраўніка Цэнтарвыбаркаму Віктара Ганчара і бізнэсоўца Анатоля Красоўскага (7 траўня і 16 верасьня 1999 году адпаведна). Паводле колішняга спэцназаўца, усіх застрэліў камандзір падразьдзяленьня Дзьмітры Паўлічэнка. Сам Гараўскі папрасіў прыстанішча ў Швайцарыі.

Пасьля гэтай публікацыі Алег Воўчак заявіў, што выкладзеныя зьвесткі пацьвярджаюць высновы грамадзкай камісіі, а таксама не супярэчаць дакладу дэпутата ПАРЭ Хрыстаса Пургурыдэса, які займаўся расьсьледаваньнем зьнікненьняў: супадаюць дэталі, час, месца і г.д.

Адпаведна, новая інфармацыя павінна стаць падставай, каб аднавіць сьледзтва, спыненае ў сьнежні 2018-га.

Аляксандар Лукашэнка ў інтэрвію радыёстанцыі «Эхо Москвы» 24 сьнежня мінулага году назваў «правакацыяй» матэрыял Deutsche Welle, патлумачыўшы гэта тым, што апанэнтам запатрабаваўся гучны ўкід напярэдадні прэзыдэнцкіх выбараў. Палітычная кампанія павінна прайсьці сёлета да 31 жніўня.

Што важна ведаць пра зьнікненьне беларускіх палітыкаў

Партрэты Юрыя Захаранкі і Віктара Ганчара
Партрэты Юрыя Захаранкі і Віктара Ганчара
  • 7 траўня 1999 году быў выкрадзены і імаверна забіты былы міністар унутраных справаў Беларусі, дзяяч апазыцыі генэрал Юры Захаранка.
  • 16 верасьня 1999 году зьніклі бязь зьвестак былы старшыня Цэнтравыбаркаму і віцэ-сьпікер Вярхоўнага Савету Беларусі Віктар Ганчар, які рыхтаваў імпічмэнт Аляксандру Лукашэнку, і ягоны сябра, бізнэсоўца Анатоль Красоўскі. Пазьней на менскай вуліцы Фабрычнай, дзе меркавана адбылося выкраданьне, былі знойдзеныя аскепкі аўтамабільнага шкла і сьляды крыві.

  • Прадстаўнікі беларускай апазыцыі, родныя зьніклых і міжнародная супольнасьць лічаць, што яны былі выкрадзеныя па палітычных матывах. У датычнасьці да іх зьнікненьняў падазраюцца Віктар Шэйман (былы кіраўнік Адміністрацыі прэзыдэнта), Уладзімер Навумаў (былы міністар унутраных спраў), Юры Сівакоў (займаў пасаду кіраўніка МУС) і Дзьмітры Паўлічэнка (на той момант камандзір брыгады спэцназу ўнутраных войскаў МУС), адносна якіх з 2004 году дзейнічаюць санкцыі Эўразьвязу і ЗША.
  • У верасьні 2004 году Аляксандар Лукашэнка ахарактарызаваў Шэймана, Навумава, Сівакова і Паўлічэнку – як «самых сумленных, надзейных, адданых народу й дзяржаве людзей».
  • На пачатку 2019 году Сьледчы камітэт паведаміў аб прыпыненьні расьсьледаваньня спраў аб зьнікненьні Захаранкі, Ганчара і Красоўскага. У сьнежні 2019 году справу аб зьнікненьні Захаранкі аднавілі.
  • 16 сьнежня 2019 году нямецкае выданьне Deutsche Welle апублікавала інтэрвію, у якім Юры Гараўскі, які назваў сябе байцом беларускага «эскадрону сьмерці», расказаў, як удзельнічаў у выкраданьні і забойстве праціўнікаў Аляксандра Лукашэнкі 20 гадоў таму пад камандаваньнем Дзьмітрыя Паўлічэнкі.

  • 24 сьнежня 2019 году ў інтэрвію «Эхо Москвы» Лукашэнка заявіў, што ніхто акрамя яго ня мог даць каманду аб выкраданьні і забойстве палітыкаў, а ён «ніколі ў жыцьці не аддаваў такую каманду» і ня дасьць цяпер. Ён запытаў, навошта яму было б такое патрэбна і «што зьмянілася, калі ў Беларусі ня стала двух ці трох чалавек», і дадаў, што «Дзіма Завадзкі з-за Чачні Шарамета загінуў». Лукашэнка зьвязаў заявы Гараўскага з тым, што «заўтра прэзыдэнцкія выбары».

Публікацыі па тэме:

Што былы спэцназавец расказаў пра забойствы апанэнтаў Лукашэнкі. Сьцісла

Ад Алкаева да Шэймана. Сьпіс ключавых асобаў у справе зьніклых

Як выглядае месца магчымага забойства Ганчара і Красоўскага пад Бегамляй. ФОТА

«Небясьпечна. Вельмі». Што менчукі кажуць пра зьніклых Ганчара, Захаранку і Красоўскага. ВІДЭА

Ад «яму можна верыць» да «расейскага ўкіду». Рэакцыі на сэнсацыйнае прызнаньне ў забойстве апазыцыянэраў

«Машына была на глыбіні аднаго мэтра». Як у 2001 годзе раскапалі джып Красоўскага

Гараўскі адказаў Паўлічэнку, — удзельнік падрыхтоўкі фільму пра забойствы апанэнтаў Лукашэнкі

Каму выгадны фільм пра ўдзельніка «эскадрону сьмерці» і ці ёсьць у ім «расейскі сьлед»?

Сьледчы, які расказаў пра «эскадроны сьмерці», ня верыць сэнсацыйным прызнаньням былога спэцназаўца

Спэцназаўца, які расказаў пра забойствы апазыцыянэраў, паказвалі на БТ 20 гадоў таму. Архіўнае відэа

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG