У Менску рэгіструюць адзінкавыя выпадкі грыпу, піша БелТА са спасылкай на прэс-сакратарку Мінздароўя Юлію Барадун.
Эпідэмічны падʼём грыпу ў Менску адсутнічае, гэтаму спрыяе праведзеная вакцынацыя, сказала Барадун. Рэгіструюць адзінкавыя выпадкі захворваньня на грып А, новых сэратыпаў вірусу ў насельніцтва ня выявілі.
Як адзначала раней намесьніца начальніка аддзелу гігіены, эпідэміялёгіі і прафіляктыкі Мінздароўя Інна Карабан, эпідэміі грыпу няма ў цэлым па краіне. Лябараторна пацьвердзіліся вірусы негрыпознай этыялёгіі. У 90% выпадкаў гэта рынавірусы, адэнавірусы, вірусы парагрыпу, рэсьпіраторна-сынцытыяльныя вірусы.
У гэтым сэзоне лекары прышчапілі 41% насельніцтва Беларусі, у першую чаргу групы рызыкі. Такі ўзровень забясьпечвае калектыўны імунітэт, які дазваляе пазьбегнуць эпідэміі грыпу.
