Лінкі ўнівэрсальнага доступу

«Беларуская царква можа вярнуцца ў Кіеўскую мітраполію». У Кіеве адбылася дыскусія пра гібрыдную вайну Расеі супраць Беларусі


Лідэр усеўкраінскага аб’яднаньня «Свабода» Алег Цягнібок заклікае палітычных і грамадзкіх актывістаў Беларусі і Ўкраіны ініцыяваць пытаньне аб вяртаньні Беларускай праваслаўнай царквы ў Кіеўскую мітраполію.

З такой прапановай Алег Цягнібок выступіў сёньня ў Кіеве на міжнароднай экспэртнай дыскусіі «Гібрыдная вайна Расейскай Фэдэрацыі супраць Беларусі», арганізаванай украінскім недзяржаўным аналітычным цэнтрам «Украінскія студыі стратэгічных дасьледаваньняў» і Рухам салідарнасьці «Разам».

«Расея выкарыстоўвае ўвесь арсэнал сродкаў — ад эканамічнай вайны і гуманітарнага ўплыву, асабліва ў мэдыя-прасторы, да спэцыяльных апэрацый. На прыкладзе Беларусі мы можам яшчэ раз вывучыць альгарытмы расейскай агрэсіі і спыніць Маскву на паўночным флянгу. Мусім дзейнічаць на апярэджваньне. Так, на рэлігійным адрэзку мы павінны ўзьняць пытаньне аб вяртаньні аўтакефаліі Беларускай праваслаўнай царкве, якая гістарычна ўваходзіла ў склад Кіеўскай мітраполіі», — заявіў Алег Цягнібок.

У прэсавай службе Праваслаўнай царквы Ўкраіны не змаглі адказаць на пытаньне Свабоды аб магчымым дыялёгу з Беларускай праваслаўнай царквой. «Царква ня можа камэнтаваць выказваньні палітыкаў. Гэта думка, выказаная спадаром Цягнібокам».

Алег Цягнібок таксама лічыць, што ключавым момантам агульнай бясьпекі для Ўкраіны і Беларусі ёсьць стварэньне эфэктыўнага Балта-Чарнаморскага саюзу паводле прынцыпу «поўнач-поўдзень».

«Менавіта таму Масква рукамі кантраляваных беларускіх элітаў намагаецца не дапусьціць збліжэньня нашых народаў. Безь Беларусі ня будзе міру ні для Ўкраіны, ні для дзяржаў Балтыі. Толькі вярнуўшы Менск у наш лягер, мы зможам пабудаваць Балта-Чарнаморскі саюз, які стане сапраўднай процівагай імпэрскім амбіцыям Масквы», — перакананы Алег Цягнібок.

У сваю чаргу былы амбасадар Украіны ў Беларусі Раман Бясьсьмертны зьвярнуў увагу на тое, што сёлета ў рамках эканамічнага форуму ў Давосе адбылася дыскусія «ад мора да мора», на якую нават не запрасілі прадстаўнікоў Украіны, краін Балтыі і Беларусі.

«Канфэрэнцыя у Давосе аб краінах Міжмор’я, ініцыяваная польскімі палітыкамі, была закрытай. Гэта сьведчыць пра тое, што Эўропа сваім хітаньнем недзе на 3-5 гадоў спазьняецца ў рэакцыі на агрэсіўную палітыку Расеі. На жаль, і сёньняшняе палітычнае кіраўніцтва Ўкраіны не ўсьведамляе гэтую праблему. А гэта азначае, што ўвесь цяжар у супрацьстаяньні расейскай агрэсіі, якая будзе нарастаць, ускладаецца на грамадзтва», — адзначыў Раман Бясьсьмертны.

Зьлева направа: Дэпутат кіеўскай рады Юры Сірацюк, лідэр «Свабоды» Алег Цягнібок, былы амбасадар Украіны ў Беларусі Раман Бясьсьмертны і Віктар Гвозьдзь, які у 2014-2016 гадах ачольваў Службу зьнешняй выведкі Ўкраіны, а цяпер узначальвае незалежны аналітычны цэнтар «Борисфен Інтел».
Зьлева направа: Дэпутат кіеўскай рады Юры Сірацюк, лідэр «Свабоды» Алег Цягнібок, былы амбасадар Украіны ў Беларусі Раман Бясьсьмертны і Віктар Гвозьдзь, які у 2014-2016 гадах ачольваў Службу зьнешняй выведкі Ўкраіны, а цяпер узначальвае незалежны аналітычны цэнтар «Борисфен Інтел».

Дыплямат лічыць недарэчным выкарыстоўваць тэрмін «гібрыдная вайна» у дачыненьні да палітыкі Расеі на постсавецкай і эўрапейскай прасторы:

«Гэта бязглузьдзіца. Ідзе вайна, абвешчаная расейскім прэзыдэнтам Пуціным і расейскаю ваеншчынаю супраць цывілізаванага сьвету. Вайна з выкарыстаньнем усіх сучасных інструмэнтаў, уключаючы інфармацыйныя тэхналёгіі. Галоўная мэта — адраджэньне імпэрыі. Ёсьць ідэя зьнішчэньня Беларусі і Ўкраіны як дзяржаў, і на гэта скіраваныя абсалютна ўсе рэсурсы».

Раман Бясьсьмертны прапанаваў стварыць супольны польска-літоўска-беларуска-ўкраінскі інфармацыйны партал: «Калі цяпер паглядзець, што пішуць СМІ Ўкраіны ці Беларусі, такое ўражаньне, што паміж Менскам і Кіевам ня 600 кілямэтраў, а 10 тысяч. Не хапае нават апэратыўнай інфармацыі аб сытуацыях у краінах».

На думку Віктара Гвазьдзя, які у 2014-2016 гадах ачольваў Службу зьнешняй выведкі Ўкраіны, а цяпер узначальвае незалежны аналітычны цэнтар «Борисфен Інтел», Беларусь і Ўкраіна мусяць аб’яднаць намаганьні ў барацьбе з расейскай экспансіяй:

«Асноўнымі напрамкамі такой працы могуць быць і абмен інфармацыяй аб формах і мэтадах гібрыднай вайны Расеі і каардынацыя захадаў супрацьдзеяньня ёй. Можа быць створаная супольная працоўная група высокага ўзроўню, але пакуль мы бачым, што наша ўлада ставіцца да гэтага недастаткова ініцыятыўна, то такую працу патрэбна пачаць на ўзроўні грамадзкіх арганізацый, палітыкаў і асобных палітычных сілаў».

Віктар Гвозьдзь таксама перакананы, што Ўкраіна мусіць падтрымліваць Беларусь у яе дачыненьнях з заходнімі краінамі і міжнароднымі арганізацыямі, выкарыстоўваючы свае двухбаковыя кантакты з ЗША і Эўразьвязам. Асобна экспэрт спыніўся на неабходнасьці «дапамогі Беларусі з боку Ўкраіны для зьмяншэньня эканамічнай і энэргетычнай залежнасьці ад Расеі, у тым ліку праз арганізацыю паставак нафты на беларускія НПЗ праз украінскія парты».

Гістарычная спраўка:

Ад часу прыняцьця хросту ў Х стагодзьдзі тэрыторыя сучаснай Беларусі была часткай Кіеўскай мітраполіі Канстантынопальскага патрыярхату.

У 1448 годзе гэтая мітраполія ў выніку палітычных і царкоўных канфліктаў канчаткова падзялілася на дзьве — Маскоўскую і Кіеўскую, якую ад таго часу часьцей сталі называць Літоўска-Наваградзкай.

У 1596-1620 гадах адзіная памесная ўсходнехрысьціянская царква ВКЛ, аб’яднаная ў Кіеўскую мітраполію, падзялілася на дзьве часткі — праваслаўную і ўніяцкую.

У 1686 годзе праваслаўная частка Кіеўскай мітраполіі была захопленая Маскоўскім патрыярхатам.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG