Лінкі ўнівэрсальнага доступу

«Кітайскія студэнты будуць пад пільным наглядам». Беларускія мэдыкі расказалі, як засьцерагчыся ад каранавірусу


Ілюстрацыйнае фота

Насіць маску, мыць рукі, зьвяртацца да дактароў — мэдыкі адказалі на пытаньні журналістаў пра каранавірус падчас прэсавай канфэрэнцыі.

У Міністэрстве аховы здароўя правялі прэсавую канфэрэнцыю ў сувязі з пачаткам сэзону распаўсюджаньня інфэкцыйных рэсьпіраторных захворваньняў, які звычайна прыпадае на канец студзеня. Ужо зарэгістраваныя выпадкі захворваньня на грып, найперш сярод дзяцей. Але паказьнік на 46% ніжэйшы за леташні, таму адмыслоўцы характарызуюць эпідэміялягічную сытуацыю па грыпе як спакойную. Лічыцца, што добра спрацавалі прафіляктычныя захады, у тым ліку вакцынацыя.

Але трывогі дадала сытуацыя ў Кітаі, дзе зарэгістраваная ўспышка лёгачнай пнэўманіі, якую спараджае каранавірус. Што пра яго вядома?

Паводле Ірыны Глінскай з Рэспубліканскага цэнтру гігіены, эпідэміялёгіі і грамадзкага здароўя, у КНР у 25 правінцыях зарэгістраваныя больш за 800 выпадкаў захворваньня на каранавірус, 25 чалавек памерлі ад пнэўманіі. Асобныя выпадкі захворваньня зарэгістраваныя таксама ў Ганконгу, Сынгапуры, Тайляндзе, Японіі, Паўднёвай Карэі, ЗША.

Вірус перадаецца паветрана-кропельным шляхам, але для яго перадачы патрэбныя досыць шчыльныя кантакты, звычайна сямейныя, адзначыла спэцыяліст. Ёсьць выпадкі, калі вірус падхоплівалі супрацоўнікі лякарняў, дзе даглядалі хворых. Вялікай рэсьпіраторнасьці ў гэтага вірусу няма. Першыя выпадкі захворваньня былі зарэгістраваныя ў канцы сьнежня 2019 году. За гэты час Усясьветная арганізацыя здароўя (УАЗ) выпрацавала рэкамэндацыі ад каранавірусу.

Што раяць лекары?

  • Пазьбягаць кантактаў з тымі, у каго заўважаныя сымптомы захворваньня.
  • Выконваць «рэсьпіраторны этыкет» — у месцах масавага збору людзей насіць мэдычныя маскі.
  • Захоўваць гігіену рук, бо вірус перадаецца і праз рукі.
  • Калі вы прыехалі з краін, дзе зарэгістраваныя захворваньні на каранавірус, і адчулі недамаганьне, пры звароце да мэдыкаў трэба абавязкова сказаць лекару, дзе вы пабывалі.

Паводле Ірыны Глінскай, робяцца ўсе патрэбныя санітарныя захады.

«Вядзецца санітарны кантроль на ўсіх памежных пунктах пропуску ў Беларусь, у тым ліку з дапамогай цеплавізійнага абсталяваньня. Пры неабходнасьці выкарыстаньне гэтых прылад будзе пашырана».

Ці можна цяпер ехаць у Кітай?

Паводле Ірыны Глінскай, УАЗ не давала рэкамэндацый абмежаваць паездкі ў Кітай ды іншыя краіны, дзе зарэгістраваныя хворыя на каранавірусную інфэкцыю.

«Але ў кожнай з гэтых краін свая сытуацыя, і яе трэба ўлічваць і вырашаць самому», — лічыць прадстаўніца Рэспубліканскага цэнтру гігіены, эпідэміялёгіі і грамадзкага здароўя Міністэрства аховы здароўя.

У Беларусі вучацца каля 4 тысяч кітайцаў. Шмат хто зь іх пасьля зімовай сэсіі паедзе на вакацыі дамоў. Як іх зьбіраюцца адсочваць па вяртаньні ў Беларусь?

Паводле Ірыны Глінскай, гэтае пытаньне ўжо вырашанае, у тым ліку зь Міністэрствам адукацыі. Цягам 14 дзён па вяртаньні ў Беларусь, а менавіта столькі працягваецца інкубацыйны пэрыяд захворваньня на каранавірус, кітайскія студэнты будуць пад пільным наглядам мэдыкаў навучальнай установы.

Што такое каранавірус і якія сымптомы хваробы, якую ён выклікае?

Паводле прафэсара, загадчыка катэдры інфэкцыйных хваробаў Беларускага дзяржаўнага мэдычнага ўнівэрсытэту Ігара Карпава, каранавірус быў выяўлены яшчэ на пачатку 60-х гадоў мінулага стагодзьдзя. Да пачатку 2000-х гадоў навукоўцы апісалі тры вірусы гэтай групы.

«Дарэчы, такую назву ён атрымаў з прычыны зьнешняга выгляду — мае „карону“ вакол ядра», — кажа прафэсар.

Паводле Ігара Карпава, 7 студзеня 2020 году быў расшыфраваны геном каранавірусу, і цяпер навукоўцы шукаюць, як вірус пачаў пераходзіць ад жывёл да людзей. Ёсьць верагоднасьць, што вірус зьявіўся ў кажаноў, а да чалавека трапіў празь янотападобных сабак, якіх у Кітаі ўжываюць у ежу.

«Захворваньне суправаджаецца высокай тэмпэратурай, хоць можа быць і безь яе. Але абавязковыя прыкметы рэсьпіраторнай хваробы — кашаль, насмарк, пашкоджаньне сьлізістай. Для вызначэньня вірусу вельмі важна лябараторнае пацьвярджэньне — неабходнымі сродкамі для гэтага нашы лекары валодаюць», — кажа прафэсар Ігар Карпаў.

Паводле прафэсара Карпава, сярод першых 17 чалавек, якія памерлі ў Кітаі ад гэтай хваробы, большасьць былі старэйшыя за 60 гадоў і мелі спадарожныя хваробы.

Як пачуваецца беларуска, якая трапіла ў шпіталь пасьля вяртаньня з Кітаю?

Прафэсар Карпаў кажа, што асабіста аглядаў гэтую пацыентку.

«Яна дагэтуль у інфэкцыйным шпіталі. Дзяўчыну ізалявалі, бо гэтага патрабуюць правілы, мы мусілі рэагаваць на пагрозу. У яе ўзялі аналізы, пнэўманіі няма, учора ў яе дыягнаставалі грып В. Пацыентка атрымлівае лекавы антывірусны прэпарат, іншае неабходнае лячэньне. Стан яе стабільны», — паведаміў прафэсар Ігар Карпаў.

Ці дапаможа не падчапіць каранавірус мэдычная маска?

Паводле дырэктара Цэнтру экспэртыз і выпрабаваньняў у ахове здароўя Сяргея Марчанкі, мэдычныя маскі — адзін з эфэктыўных сродкаў ад рэсьпіраторных захворваньняў.

«У некаторых краінах, як у Кітаі, іх носяць масава, і беларусам гэта таксама можна параіць — ужываць мэдычныя маскі ў месцах масавага збору людзей. Але трэба памятаць, што насіць маску цягам усяго дня нельга. Яе трэба мяняць праз 2 гадзіны, бо зьніжаецца эфэктыўнасьць дыханьня», — сказаў Сяргей Марчанка.

Ці бясьпечна карыстацца пасылкамі, якія прыбываюць з Кітаю?

Натальля Шмялёва, якая працуе загадчыцай лябараторыі грыпу і грыпападобных захворваньняў Цэнтру эпідэміялёгіі і мікрабіялёгіі, адказваючы на гэтае пытаньне, прапанавала зыходзіць з асаблівасьцяў каранавірусу.

«Ня буду нічога рэкамэндаваць, але паколькі вірус вельмі няўстойлівы, магчымасьць падхапіць інфэкцыю праз пасылку, якая дастаўленая поштай, падаецца надзвычай малой».

Што трэба ведаць пра новы каранавірус з Кітаю

  • Невядомы вірус выявілі ў кітайскім горадзе Ўхань у сьнежні 2019 году. Спачатку паведамлялі, што ва Ўхані была зарэгістраваная ўспышка пнэўманіі, аднак мэдыкі высьветлілі, што прычынай хваробы стаў раней невядомы від каранавірусу.
  • Афіцыйнай назвай новага каранавірусу з Кітаю стала COVID19 (Corona Virus Disease).

  • 11 студзеня ў Кітаі зафіксавалі першую сьмерць ад хваробы. Кітайскія ўлады прызналі, што вірус можа перадавацца ад чалавека да чалавека, прычым нават падчас інкубацыйнага пэрыяду.
  • Выпадкі заражэньня каранавірусам па-за межамі Кітаю зафіксавалі ў 27 краінах.
  • Улады Кітаю закрылі ўезд і выезд з 10 гарадоў.
  • Па стане на раніцу 14 лютага, ад новага вірусу па ўсім сьвеце памерлі ўжо 1383 чалавек, афіцыйна пацьвердзілі больш за 64,4 тысячы выпадкаў заражэньня вірусам. За распаўсюдам вірусу можна сачыць тут (дадзеныя абнаўляюцца штодзённа).
  • Сусьветная арганізацыя аховы здароўя рэкамэндуе трымацца далей ад людзей, якія чхаюць і кашляюць, і ня есьці дрэнна апрацаванае (недасмажанае або недаваранае) мяса. Паводле адной з вэрсій, вірус мог перадацца людзям пасьля ўжываньня якога-небудзь зь мясных або морапрадуктаў з рынку ва Ўхані.​
  • Распаўсюджваньне вірусу з Ухані параўноўваюць з другой успышкай каранавірусу ў Кітаі — SARS-CoV або атыповай пнэўманіі — у 2002-2003 гадах. Тады памерлі каля 800 хворых.
  • Улады Кітаю 24 студзеня заявілі, што самая першая пацыентка з новым каранавірусам выздаравела і выпісаная зь лякарні. 56-гадовая жанчына адчула сябе блага 10 студзеня, была шпіталізаваная 15-га.
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Аляксандар Лукашэнка казаў, што беларусам наконт каранавірусу хвалявацца ня варта: «Мыйце рукі, менш абдымайцеся зь незнаёмымі людзьмі на вуліцы, усё астатняе — за Міністэрствам здароўя». Беларускія мэдыкі ж давалі больш дэталёвыя рэкамэндацыі.
  • У сувязі з распаўсюдам каранавірусу ў аэрапортах Беларусі, а таксама іншых краінаў узмацнілі захады бясьпекі: з дапамогай спэцыяльных рамак і іншых прыбораў вымяраюць тэмпэратуру людзей, якія ляцяць з Кітаю і іншых краінаў «групы рызыкі».
  • Вядзецца санітарны кантроль на ўсіх памежных пунктах пропуску ў Беларусь, у тым ліку з дапамогай цеплавізійнага абсталяваньня. Лябараторныя сродкі для выяўленьня 2019-nCoV ужо даставілі ў краіну.
  • Міністэрства аховы здароўя, а таксама міністэрства спорту і турызму параілі беларусам ня езьдзіць у Кітай.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя на многія іншыя рэсьпіратарныя захворваньні, неабходны дадатковы скрынінг.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG