Лінкі ўнівэрсальнага доступу

Лукашэнка хацеў схадзіць на шклоўскі дрэваапрацоўчы завод, а той збанкрутаваў

абноўлена

Прадпрыемства «Шклоў Форэст Лтд», 24 студзеня

Аляксандар Лукашэнка 24 студзеня наведаў Шклоў. Плянавалі, што ён пабывае толькі на заводзе газэтнай паперы, але на месцы ён вырашыў, што хоча пабываць яшчэ на льнозаводзе, масларобным заводзе і на дрэваапрацоўчым прадпрыемстве «Шклоў Форэст ЛТД».

З апошнім узьнікла праблема. Прэс-служба Лукашэнкі піша: пакуль кіраўнік дзяржавы размаўляў з чыноўнікамі і дырэктарамі заводаў, высьветлілася, што «Шклоў Форэст ЛТД» не працуе.

«Яно моцна закрэдытаванае, і ва ўласьнікаў няма сродкаў вырашаць назапашаныя праблемы, — перадае прэс-служба Лукашэнкі. — Мясцовыя ўлады таксама ня ведаюць, што рабіць з гэтай вытворчасьцю».

«Куды? На „Шклоў Форэст“? Ня можа быць»

У Шклоўскім лясьніцтве, куды Свабода зьвярнулася з просьбай падказаць актуальны адрас прадпрыемства, навіна пра магчымы візыт Лукашэнкі на «Шклоў Форэст ЛТД» выклікала ледзьве ня паніку.

«Куды? На „Шклоў Форэст“? Ня можа быць, — зьдзівіліся ў прыёмнай лясгасу. — Прадпрыемства па дарозе на Александрыю знаходзіцца, за чыгуначным пераездам і запраўкай, мэтраў трыста зь левага боку. Вы дакладна ўпэўненыя, што ён туды паедзе?»

Дзівіцца нашаму пытаньню пра прыезд кіраўніка краіны і ахоўнік аднаго з суседніх з тэрыторыяй «Шклоў Форэст» прадпрыемстваў.

«Ну, гэта вось тут, але яны ж даўно не працуюць, — кажа ён. — Толькі калі ім прывозяць нейкую сыравіну. Але гэта рэдка бывае. Закрытыя яны».

Атрымаць нейкую інфармацыю пра дзейнасьць «Шклоў Форэст ЛТД» і магчымы прыезд туды Аляксандра Лукашэнкі аказваецца немагчымым нават на тэрыторыі прадпрыемства.

«Няма іх тут даўно, — кажа мужчына, які грузіць кардон на аўтапагрузчык у адным з цэхаў, якія некалі лічыліся маёмасьцю „Шклоў Форэст ЛТД“. — Яны тут былі калісьці, вось на ўсёй гэтай тэрыторыі вялікай. Бралі ў арэнду на 50 гадоў, калі я правільна памятаю. Але цяпер тут іншыя прадпрыемствы. Я нават ня ведаю, у каго вам пра „Шклоў Форэст ЛТД“ запытацца».

Пра лёс прадпрыемства Свабодзе расказаў ягоны апошні антыкрызісны кіраўнік Сяргей Грынкевіч.

«Так, я быў прызначаны апошнім кіраўніком гэтага прадпрыемства, — сказаў мэнэджэр у размове са Свабодай. — Але яго больш няма, было ліквідаванае ў 2018 годзе».

«Пакажам той шлях, па якім трэба мадэрнізаваць»

Банкруцтва кампаніі «Шклоў Форэст ЛТД» прадказвалі яшчэ пяць гадоў таму. У 2015 годзе Zautra.by пісаў, што «шлях мадэрнізацыі прывёў у тупік», хоць завод меў стаць узорна-паказальным.

Кампанію заснавалі ў 2002 годзе амэрыканская Command Capital LLC і латвійская Lindeks. На піку за год «Шклоў Форэст ЛТД» прадавала да 200 тысячаў м³ драўніны на 40 млн даляраў.

У 2005 годзе Лукашэнка наведваў завод, патрабаваў «паглыбіць перапрацоўку драўніны». У 2012-м прыяжджаў зноў — казаў пра мадэрнізацыю і глыбейшую перапрацоўку, стварэньне ўзорнага прадпрыемства і пра тое, што тут пакажуць «шлях, па якім трэба мадэрнізаваць прадпрыемствы ніжэйшага ўзроўню».

«Напружвайце, выклікайце ўласьніка-прыватніка гэтага і рабіце ўсё, што трэба, — загадаў тады Лукашэнка. — Калі ён адмовіцца і ня можа — рабіце самі».

Але замежныя кампаніі не палічылі мэтазгодным укладваць грошы ў мадэрнізацыю. Магілёўскаму райвыканкаму тады даручылі знайсьці новых інвэстараў. У выніку вытворчасьць ліквідавалі праз суд у пачатку 2016 году, распрадавалі маёмасьць да лета 2017-га.

Цяпер Лукашэнка даручыў «разабрацца ў сытуацыі і падрабязна дакласьці яму аб сытуацыі, што склалася».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG