Лінкі ўнівэрсальнага доступу

«Колькі тон нафты я ўжо аплаціла сваімі штрафамі!» Тацяна Севярынец пра 30 сутак сыну Паўлу Севярынцу


Тацяна Севярынец, архіўнае фота
Тацяна Севярынец, архіўнае фота

Тацяна Севярынец, маці Паўла Севярынца, якога асудзілі на 30 сутак адміністрацыйнага арышту, прысутнічала на працэсах у Савецкім судзе Менску. Сёньня тут разглядаліся справы супраць Паўла Севярынца за ўдзел у мітынгах супраць інтэграцыі 20 і 21 сьнежня.

Тацяна Севярынец адказала на пытаньні Радыё Cвабода.

«Ён мужны чалавек, я ўпэўненая ў ім»

— Вы патэлефанавалі ўжо Паўлу пра вынікі судоў, як ён гэта ўспрыняў?

— Ён паставіўся спакойна, ён чалавек натрэніраваны. Ён сам ведае, якія рабіць захады. Я як маці рэагую эмацыйна, таму што маё сэрца баліць, ён мой сын і я ведаю, у якіх абставінах гэта. Ён мужны чалавек, я ўпэўненая ў ім. Але тым ня менш штораз гэта даволі цяжка«.

«Дзіця перастане пазнаваць бацьку»

— Якія вашыя ўражаньні ад суду над Паўлам па дзьвюх новых справах?

— Цяжкія ўражаньні, бо я бачу людзей, якія страцілі пачуцьцё меры, якія страцілі пачуцьцё сумленьня, годнасьці, пачуцьцё гонару за сваю прафэсію. У судзе сьведчыў адзін хлопчык, які асабіста ведае ці ўжо ў другім паказаньні ня ведае Паўла, але кажа, што Павал — гэта вядомая асоба. Ён кажа, што Павал там быў, заклікаў да чагосьці і крычаў «Жыве Беларусь!». Але як выразна яны фармулююць, за што — «супраць інтэграцыі Беларусі і Расеі».

Разумець, што незалежнасьць — гэта сьвятое, і адначасова асуджаць за гэта людзей, якія выступаюць супраць страты незалежнасьці? У мяне не складаюцца два і два ў галаве.

Двойчы па 15 — столькі сёньня атрымаў мой сын за 20 і 21 сьнежня. Перад гэтым адседзеўшы 15 сутак, сёньня яго адпусьцілі, і толькі ўраньні ён дачапаў дадому пад дажджом. Цяпер чарговыя суткі. Дзіця (сын Паўла Францішак. — РС) перастане пазнаваць бацьку. Як ён сёньня радаваўся, я на гэта не магла глядзець бязь сьлёз. А што будзе яшчэ празь месяц?

«Павал быў у розных умовах, ён іх вытрымае»

— Чаму Павал не прыйшоў на пасяджэньне суду?

— Яго сёньня з Акрэсьціна прывозілі сюды (у суд Савецкага раёну. — РС), пабудзілі ў 6.20, сказалі, што будуць гэтыя суды і ваша справа, прыходзіць ці не. Але калі чалавек прыйшоў з 14-й камэры з турмы на Акрэсьціна, гэта азначае, што ён прыйшоў з насякомымі. Я сёньня выкінула два пакеты бялізны, паліто закінулі ў пральню, каб, ня дай Бог, гэтая зараз не пасялілася ў хаце, там, дзе малому дзіцятку яшчэ няма двух гадкоў. Мы выкінулі штаны, швэдры, абутак на сьметніцу. Гэта, лічыце, яшчэ дадатковы штраф.

Я разумею, якія ёсьць карныя сыстэмы. Калі абстрагавацца ад усяго і вам хочацца чалавека пакараць, пазбавіць яго зносінаў з роднымі, сябрамі, нармальнага працоўнага дня. Але ў месцах зьняволеньня трэба стварыць чалавечыя ўмовы.

Павал быў у розных умовах, ён іх вытрымае. Але ўся сыстэма, гэта антычалавечая, пачварная ўлада паказвае сваю бездапаможнасьць перад моцай чалавечага духа. Павал, Вячаслаў Сіўчык, Яўген Афнагель, Максім Вінярскі, Вольга Кавалькова — супраць іх уся гэтая сыстэма. Але яны нішто, і народ іх хутка раздушыць пазногцем аб гэтую лаву падсудных.

Тацяна Севярынец на судзе над Паўлам Севярынцам 10 сьнежня
Тацяна Севярынец на судзе над Паўлам Севярынцам 10 сьнежня

«Я таксама колькі тон нафты ўжо аплаціла сваімі штрафамі»

— Вы запыталі ў судзьдзі: «А ці трэба браць дазвол, каб бараніць краіну?» Але пытаньне засталося без адказу...

— Гэта ж само сабой разумеецца. Я ж таксама была на плошчы і атрымала штраф. Колькі тон нафты я ўжо аплаціла сваімі штрафамі! Дык вось яны неяк спрабавалі спыніць людзей, відаць, са страху. Потым дазвол быў: «Нікога не чапаць». І цяпер, калі яны наўздагон пачалі ўсе гэтыя судовыя працэсы і гучыць фраза, што не было дазволу Менгарвыканкаму, зноўку два і два не складаецца.

Браць дазвол, каб бараніць незалежнасьць — гэта як? Тым больш правакатар у нас адзін — гэта кіраўнік краіны. Ён справакаваў усе гэтыя шэсьці і мітынгі. І калі ў Беларусі знойдзецца хоць адзін прыстойны чалавек у пагонах, то ён ініцыюе адказнасьць кіраўніка краіны. Калі не, то народ будзе пытацца ў яго. Ён сабе гэтымі судамі і ганебнымі перасьледамі падпісвае вельмі суровы вырак тлустым шрыфтам. Разам з тым, што ён нарабіў за 25 гадоў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG