Лінкі ўнівэрсальнага доступу

«Волю народам». У Кіеве пікетавалі расейскую амбасаду супраць інтэграцыі Беларусі і Расеі


У Кіеве беларускія і ўкраінскія актывісты пікетавалі амбасаду Расеі, пратэстуючы супраць паглыбленьня беларуска-расейскай інтэграцыі, якая пагражае незалежнасьці Беларусі.

У акцыі ўдзельнічалі каля трох дзясяткаў прадстаўнікоў украінскіх і беларускіх грамадзкіх арганізацыяў. Яны прыйшлі пад амбасаду з украінскімі і беларускімі сьцягамі і выгукалі споклічы «Жыве Беларусь!», «Слава Ўкраіне!», «Масква забівае».

«Паглынаньне Расеяй Беларусі прывядзе да катастрафічных наступстваў у краінах Балтыі, у Польшчы. Гэта пагражае і Ўкраіне. Думаем, што мае быць рэакцыя ўраду, прэзыдэнта, Вярхоўнай Рады. Калі мы будзем разам змагацца, нас не перамогуць», — заявіў намесьнік кіраўніка Ўсеўкраінскага аб’яднаньня «Свобода» Юрко Сірацюк.

Украінскі палітык заклікаў беларусаў не баяцца і выходзіць на акцыі пратэсту супраць паглыбленай інтэрацыі з Расеяй.

«Мы будзем працягваць змагацца за нашу супольную ідэю. Яна вельмі простая — каб беларусы і ўкраінцы мелі свае нацыянальныя дзяржавы. І ў нас ёсьць супольны вораг, які спрабуе нас зацягнуць у імпэрскае ярмо», — заявіў на акцыі лідэр Добраахвотніцкага руху «ОУН» Мікола Каханіўскі.

Удзельнікі ўхвалілі заяву, у якой патрабавалі ад уладаў Беларусі спыніць рэпрэсіі супраць беларускіх патрыётаў за ўдзел у акцыях пратэсту 7–8 сьнежня і заклікалі ўкраінскія палітычныя партыі і грамадзкія рухі падтрымаць незалежніцкія патрабаваньні беларускага народу.

«Зьвяртаемся да Вярхоўнай Рады з патрабаваньнем прыняць заяву з асуджэньнем спробы анэксіі Беларусі з боку пуцінскай Расеі», — адзначаецца ў заяве.

Лідэры Руху салідарнасьці «Разам» Вячаслаў Сіўчык і Алена Талстая падзякавалі ўкраінскім актывістам за падтрымку і салідарнасьць. Яны сказалі, што ўжо атрымалі паведамленьні аб прыцягеньні іх да адміністрацыйнай адказнасьці за ўдзел у акцыях у Менску 7 і 8 сьнежня.

Пасьля акцыі спалілі дзяжаўны сьцяг Расеі як сымбаль акупацыі
Пасьля акцыі спалілі дзяжаўны сьцяг Расеі як сымбаль акупацыі

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG