Лінкі ўнівэрсальнага доступу

Пратэстоўцаў у сталіцы Грузіі разагналі вадамётамі


Пратэстоўцы ў Тбілісі, архіўнае фота

Каля 5 гадзінаў раніцы паліцыянты разагналі пратэстоўцаў пад будынкам грузінскага парлямэнту, ужылі вадамёты, піша грузінская служба Свабоды.

Ня менш як тры чалавекі атрымалі траўмы, прынамсі 28 былі затрыманыя за «непадпарадкаваньне праваахоўнікам» і «хуліганства», як сьцьвярджае Міністэрства ўнутраных справаў Грузіі. Адзначаецца, што пратэстоўцы парушылі закон, калі заблякавалі ўваходы ў парлямэнт.

Разгон пачаўся празь некалькі гадзінаў пасьля таго, як тысячы чалавек сабраліся на мітынг у Тбілісі з патрабаваньнем рэформы выбарчай сыстэмы. Дэманстранты, якія стаялі ў чатырох месцах перад уваходамі ў парлямэнт, былі вымушаныя разысьціся, хоць некалькі дзясяткаў чалавек сабраліся ў адным месцы перад будынкам заканадаўчага органу.

Адзін зь лідэраў апазыцыі Гіоргі Вашадзэ заявіў журналістам, што паліцыя затрымала некалькіх чалавек, у тым ліку апазыцыйнага палітыка. На месца прыбылі сотні паліцыянтаў, а дэманстранты задумалі заблякаваць уваходы ў будынак — казалі, што не дазволяць дэпутатам сабрацца на пасяджэньне ў аўторак. Тады ўлады вырашылі ўжыць гвалт.

Пратэсты ў Грузіі трываюць два тыдні. Удзельнікі патрабуюць пераходу да цалкам прапарцыйнай выбарчай сыстэмы (як, напрыклад, у Польшчы, дзе галасуюць за партыі, а не асобных кандыдатаў) зь цяперашняй зьмяшанай мажарытарна-прапарцыйнай (як ва Ўкраіне: палова з партыйных сьпісаў, як у Польшчы, а палова «пайменна» з акругаў, як у Беларусі).

Такія зьмены ўлады плянавалі на 2024 год, але апазыцыя патрабуе правесьці іх раней — кажуць, цяперашняя сыстэма выгадная партыі ўлады «Грузінская мара». Генэральны сакратар партыі ўлады Каха Каладзэ заявіў, што рэфэрэндум у гэтым пытаньні маюць правесьці ў 2020 ці 2021 годзе, але ў часе выбараў (парлямэнцкіх ці мясцовых). Апазыцыя ж хоча, каб сыстэму зьмянілі да бліжэйшых парлямэнцкіх выбараў.

Цяперашняя спроба заблякаваць парлямэнт — ужо ня першая. Так, тыдзень таму каля парлямэнту будавалі барыкады, на браму вешалі замок. Тады пратэст таксама разагналі вадамётамі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG