Супрацоўнікаў МУС Туркмэністану, чые блізкія сваякі працуюць за мяжой, пад пагрозай звальненьня абавязалі вярнуць іх у краіну. Пра гэта паведамляе туркмэнская служба Радыё Свабода.
Вяртаньне сваякоў да першага студзеня — адна з умоваў маштабнай пераатэстацыі супрацоўнікаў паліцыі. Акрамя таго на працягу месяца поўныя супрацоўнікі МУС павінны схуднець, таму што новы кіраўнік міністэрства «не любіць тоўстых паліцэйскіх», — паведамляе туркмэнская Свабода.
Новы міністар унутраных справаў Туркмэністану быў прызначаны на пачатку кастрычніка. Папярэдняга кіраўніка ведамства паказальна звольніў падчас нарады прэзыдэнт краіны Гурбангулы Бердымухамедаў. Ён панізіў міністра ў званьні і пазбавіў яго дзяржаўных узнагародаў пасьля дакладу генэральнага пракурора. Некалькі высокапастаўленых супрацоўнікаў паліцыі былі арыштаваныя.
З чым зьвязанае распараджэньне вярнуць у краіну сваякоў паліцэйскіх — не паведамляецца. Туркмэністан — адна з самых закрытых краінаў былога Савецкага Саюза. У чэрвені 2018 году стала вядома, што ўлады не выпускаюць зь яе грамадзян да 40 гадоў (Ашхабад гэта адмаўляе).
Апошнія некалькі гадоў краіна знаходзіцца ў глыбокім эканамічным крызісе нягледзячы на тое, што валодае чацьвёртымі ў сьвеце даказанымі запасамі прыроднага газу.
