Дакладчыца ААН аб правах чалавека ў Беларусі выступіла з заявай, у якой выказала занепакоенасьць вялікімі турэмнымі тэрмінамі для падлеткаў у Беларусі, асуджаных за наркатычныя злачынствы.
«Мяне турбуе, што існы ў Беларусі жорсткі падыход да правапарушальнікаў, зьвязаны зь незаконным абарачэньнем наркотыкаў, распаўсюджваецца і на дзяцей — без уліку іх спэцыфічнай сытуацыі і спэцыфічных патрэбаў», — сказала Анаіс Марэн.
На думку спэцдакладчыцы ААН, непаўналетніх трэба адпраўляць у турму ў крайнім выпадку, а тэрмін іхнага зьняволеньня павінен быць максымальна кароткім, але ў Беларусі «падлеткі атрымліваюць неапраўдана жорсткія прысуды». Анаіс Марэн заклікала беларускія ўлады прывесьці Крымінальны кодэкс у адпаведнасьці з уласнымі абавязаньнямі ў рамках Канвэнцыі аб правах дзіцяці.
Яна выказала занепакоенасьць тым, што ў зьняволеньні падлеткі ўтрымліваюцца ў неадэкватных умовах, абмежаваныя ў зносінах з роднымі, бяз поўнага доступу да мэдыцынскай дапамогі і адукацыі, атрымліваюць жорсткія спагнаньні за дробныя ўчынкі.
Акрамя таго, Марэн зьвярнула ўвагу на тое, што ў Беларусі праблему спажываньня наркотыкаў і наркатычнай залежнасьці разглядаюць у крымінальным кантэксьце, а ня ў якасьці праблемы аховы здароўя.
«Я заклікаю ўрад перагледзець заканадаўства ў галіне наркотыкаў і сыстэму ювэнальнай юстыцыі, у першую чаргу з тым, каб знайсьці альтэрнатывы турэмнаму зьняволеньню», — заявіла Марэн.
Яна вітала абвешчаную сёлета ў Беларусі амністыю, у рамках якой непаўналетнім, асуджаным за нарказлачынствы, скароцяць тэрмін зьняволеньня на два гады, але выказала шкадаваньне, што гэта распаўсюджваецца толькі на тых, хто атрымаў невялікія тэрміны зьняволеньня.
Беларусь з самага пачатку заявіла, што не прызнае мандата спэцыяльнага дакладчыка аб Беларусі. Улады не даюць дазволу Анаіс Марэн, як і яе папярэдніку Міклашу Харасьці, наведаць краіну.
Пакараньне за наркатычныя злачынствы ў Беларусі. Што важна ведаць
- У красавіку-траўні 2018 года актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе.
- Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкула (ад 5 да 25 гадоў пазбаўленьня волі), а таксама зьменаў у заканадаўства.
- «Маці 328» лічаць, што ў некаторых выпадках тэрміны зьняволеньня несувымерныя злачынству, а закон недастаткова ўлічвае асобы злачынцаў, іх узрост ды іншыя акалічнасьці.
- 13 чэрвеня 2019 года Палата Прадстаўнікоў у другім чытаньні прыняла папраўкі ў артыкул 328. Мінімальны тэрмін пазбаўленьня волі за незаконнае абарачэньне наркотыкаў зьменшылі на 2 гады. У ліпені Лукашэнка падпісаў закон аб зьмене КК.
