Лінкі ўнівэрсальнага доступу

«Камусьці трэба новая нагода ўкусіць?» — прэс-сакратарка Лукашэнкі пра рэакцыю Мядзьведзева на «чужыя войны»


Натальля Эйсмант, прэс-сакратарка прэзыдэнта Аляксандра Лукашэнкі, архіўнае фота

Прэс-сакратарка Аляксандра Лукашэнкі пракамэнтавала рэакцыю расейскага прэм’ера на словы беларускага кіраўніка пра «ня нашыя войны».

Што сказаў Лукашэнка

У інтэрвію казахстанскаму тэлеканалу «Хабар», кажучы пра расейска-францускую вайну 1812 году, Першую і Другую сусьветныя войны, Аляксандар Лукашэнка заявіў:

«... Цяпер мы самі вырашаем свае пытаньні, мы самі распараджаемся сваім лёсам. Але самае галоўнае — Беларусь, ды і Казахстан, яны ж заўсёды былі пад чыімсьці бізуном, вось як я часта кажу. Хтосьці намі панукваў, хтосьці спрабаваў на калені паставіць, асабліва Беларусь. Усе гэтыя войны — ня нашы войны!»

Што заявіў Мядзьведзеў

Расейскі прэм’ер-міністар Дзьмітрый Мядзьведзеў заявіў, што яму дзіўна чуць выказваньні, падобныя заяве Лукашэнкі, бо тое, што «нашы бацькі і дзяды абаранялі сваю зямлю», гэта «ня ўдзел у чужых войнах».

«Мы ні ў якім разе не павінны кідаць хоць нейкі цень на подзьвіг нашых продкаў, якія абаранялі сваю зямлю. Яны жылі на тэрыторыі сучаснай Расеі або Беларусі, але абаранялі сваю зямлю ад захопнікаў», — перадае Інтэрфакс словы Мядзьведзева.

Дзьмітры Мядзьведзеў і Аляксандар Лукашэнка, 2012 год
Дзьмітры Мядзьведзеў і Аляксандар Лукашэнка, 2012 год

Як растлумачыла Эйсмант словы Лукашэнкі

Прэс-сакратарка Лукашэнкі Натальля Эйсмант заявіла РИА Новости, што рэакцыя Мядзьведзева была «вельмі нечаканай», і нечаканасьць заключалася «ў поўным скажэньні сутнасьці». На яе думку, словы Лукашэнкі не патрабавалі дадатковага тлумачэньня.

«Усё гранічна ясна: кажучы пра гэта, прэзыдэнт меў на ўвазе, што наваяваліся — і Беларусь, і Расея — хопіць!»

Яна дадала, што «калі ўжо тэма атрымала разьвіцьцё», то «ня можа не адзначыць некалькі момантаў».

Што Эйсмант нагадала Мядзьведзеву

Эйсмант заявіла, што ў постсавецкі пэрыяд нехта сапраўды адракаўся ад чагосьці, але «рабілася гэта не ў Беларусі, а ў самой Расеі, і не аднойчы». Прыклады яна ня стала прыводзіць, «хоць магла б».

«Яшчэ больш дзіўна для расейскага прэмʼера павінна выглядаць тое, што пасьля столькіх пройдзеных разам выпрабаваньняў сёньня нашыя краіны загразьлі ў бясконцых перамовах па нафце, газе і нават прадуктах харчаваньня», — дадала Эйсмант.

Яна агучыла рытарычнае пытаньне, «каму сёньня трэба падымаць гэтую тэму?», і параіла вырашаць названыя праблемы, а ня згадваць «сівыя часы».

«Проста камусьці трэба, каб гэтая быццам бы гранічна зразумелая тэма раптам загучала, — разважала Эйсмант. — Ці, можа быць, трэба знайсьці новую нагоду ўкусіць?.. Але гэта пытаньне пакуль рытарычнае».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG