Лінкі ўнівэрсальнага доступу

ЗША збудуюць у Менску новую амбасаду, — Макей


Амбасада ЗША ў Менску, архіўнае фота

Міністар замежных справаў Беларусі Ўладзімер Макей расказаў расейскаму выданьню РБК, што мае адбыцца перад прыездам у Беларусь амбасадара Злучаных Штатаў.

Паводле Макея, для прыезду амбасадара ня толькі «павінны адбыцца ўнутраныя працэдуры», але і мусіць зьявіцца новая амбасада.

«ЗША плянуюць таксама пабудаваць новы будынак амбасады ў Беларусі, таму што ранейшы не адпавядае, на іх думку, патрабаваньням бясьпекі, — казаў Макей. — Яны зрабілі больш жорсткімі гэтыя патрабаваньні пасьля вядомага тэракту ў Бэнгазі».

Гаворка ідзе пра атаку на консульства ЗША ў лібійскім Бэнгазі ў 2012 годзе — тады будынак абстралялі з гранатамётаў і стралковай зброі, загінуў амбасадар ЗША і яшчэ трое грамадзян ЗША, была забітая невядомая колькасьць нападнікаў.

Амбасада ЗША пакуль не камэнтавала заяў Макея. Цяпер яна месьціцца ў раёне Старажоўкі, на вуліцы Старавіленскай, 46.

Заявы пра вяртаньне амбасадараў ЗША прадстаўнікі Беларусі і Штатаў зрабілі 17 верасьня. Калі дакладна гэта адбудзецца, яшчэ не зразумела. Краіны застаюцца без амбасадараў 11 гадоў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG