Лінкі ўнівэрсальнага доступу

Бяздомных прыбяруць зь менскіх вуліц да Эўрапейскіх гульняў


Ілюстрацыйнае фота

З 20 чэрвеня па 4 ліпеня ў Менску пройдзе гарадзкая прафіляктычная акцыя «Сацыяльны патруль». Акцыя пачнецца напярэдадні Эўрапейскіх гульняў.

Паводле тэлеграм-каналу NEXTA, бадзяг і алькаголікаў на час правядзеньня гульняў рашэньнямі судоў зьмяшчаюць у лячэбна-працоўныя прафілякторыі і ізалятары часовага ўтрыманьня. Частка бяздомных трапіць у мэдыцынскія ўстановы.

NEXTA апублікаваў копію дакумэнта, які вельмі нагадвае загад камітэту аховы здароўя Менгарвыканкаму. Згодна зь ім, гарадзкі клінічны наркалягічны дыспансэр і 11-я гарадзкая клінічная лякарня прызначаны «для разьмяшчэньня асобаў зь ліку БОМЖ, якія маюць патрэбу ў аказаньні мэдыцынскай дапамогі».

У камітэце аховы здароўя атрымаць камэнтар карэспандэнту Свабоды не ўдалося.

Паводле намесьніцы старшыні камітэту працы, занятасьці і сацыяльнай абароны Ірыны Дудкі, бадзяжнікаў, якія маюць патрэбу ў лячэньні, будуць зьмяшчаць у мэдыцынскія ўстановы.

Наконт таго, што на рашэньне судоў некаторых зьмяшчаюць у ЛПП і ІЧУ, Ірына Дудка сказала, што «гэта пытаньне не да камітэту». Паводле яе, «Сацыяльны патруль» праводзіцца ня першы год.

Ілюстрацыйнае фота
Ілюстрацыйнае фота

У прэс-службе Менгарвыканкаму Свабодзе паведамілі, што «Сацыяльны патруль» праводзіцца «у мэтах сацыяльнай рэабілітацыі асобаў зь ліку БОМЖ». Акцыя накіравана «на выяўленьне асобаў, якія займаюцца бадзяжніцтвам і жабраваньнем у мэтах аказаньня ім сацыяльнай, мэдыцынскай, гуманітарнай дапамогі і далейшай іх сацыялізацыі ў грамадзтва».

Падчас «Сацыяльнага патрулю» будуць праводзіцца рэйды па месцах дыслякацыі асобаў бяз пэўнага месца жыхарства. Бадзяжнікаў будуць зьмяшчаць у «Дом начнога знаходжаньня для асобаў бяз пэўнага месца жыхарства», прадугледжваецца праца пункту выдачы гарачага харчаваньня.

Эўрапейскія гульні — 2019. Што важна ведаць

Другія Эўрапейскія гульні пройдуць у Менску з 21 па 30 чэрвеня 2019 году.

  • З квітком на гульні можна будзе бязь візы трапіць у Беларусь празь любы памежны пункт.
  • На Эўрапейскія гульні ў Менск чакаюць 30 тысяч замежных турыстаў. Для параўнаньня, на чэмпіянат сьвету па хакеі ў Менск у 2014 годзе прыехалі 80 тысяч замежных турыстаў.​
  • Нямецкі алімпійскі камітэт прыгразіў байкатаваць Эўрапейскія гульні ў Менску праз затрыманьні беларускіх журналістаў.
  • 72 мільёны даляраў будзе каштаваць турнір бюджэту Беларусі.
    Як вырас кошт правядзеньня Эўрапейскіх гульняў
    Як вырас кошт правядзеньня Эўрапейскіх гульняў
  • Падчас гульняў у Беларусі будуць працаваць супрацоўнікі МУС Расеі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG