Лінкі ўнівэрсальнага доступу

Гэта вайна. Лукашэнка запатрабаваў ад спартоўцаў не выступаць кепска на Эўрапейскіх гульнях 


Аляксандар Лукашэнка на вучэньнях «Захад-2017»

Мэдалёў павінна быць ня меней, чым на мінулых. Тады беларусы ўзялі 10 залатых, 11 срэбных і 22 бронзавыя мэдалі, у мэдальным заліку Беларусь была сёмая.

На нарадзе выканаўчага камітэту Нацыянальнага алімпійскага камітэту 15 красавіка ягоны прэзыдэнт Аляксандар Лукашэнка выказаў пажаданьні для беларускіх спартоўцаў на II Эўрапейскіх гульнях, якія пройдуць у Беларусі 21–30 чэрвеня.

«У нас няма права выступаць на гэтых гульнях кепска, — перадае словы Лукашэнкі ягоная прэс-служба. — Хацелася б, каб гэтае патрабаваньне было даведзенае да спартоўцаў і трэнэраў. Настройвайце іх на барацьбу, нацэльвайце на перамогу».

Паводле Лукашэнкі, пляны на мэдалі на гульнях не агучваліся публічна, але «задача стаіць канкрэтная»: ня менш мэдалёў, чым было на мінулых гульнях, якія прайшлі ў 2015 годзе ў Баку. Лукашэнка выказаў спадзяваньні на цяжкую атлетыку, але наракаў на кепскія вынікі ў біятлёне, футболе і хакеі, хоць на іх «грошы патрацілі немалыя».

«Спорт сёньня ня проста нейкае забаўляльнае відовішча, — казаў ён. — Гэта бітва, калі хочаце – вайна, толькі не гарачая. Гэта найвышэйшая ідэалёгія, якая падымае дух народу ў любой дзяржаве».

Лукашэнка перакананы, што падчас гульняў да Беларусі «будзе прыкаваная ўвага сусьветнай супольнасьці», таму трэба паказаць, «што на нашай зямлі створаныя камфортныя, і, што важна, бясьпечныя ўмовы для жыцьця і самарэалізацыі чалавека».

Таксама Лукашэнка наракаў, што Нацыянальны алімпійскі камітэт, якім ён кіруе, «збавіў абароты»: не праводзяцца «рэзанансныя мерапрыемствы» ў алімпійскай адукацыі і дзіцяча-юнацкім спорце, «павеяла нейкім халадком у стасунках з фэдэрацыямі».

Эўрапейскія гульні — 2019. Што важна ведаць

Другія Эўрапейскія гульні пройдуць у Менску з 21 па 30 чэрвеня 2019 году.

  • На падрыхтоўку II Эўрапейскіх гульняў Беларусь патраціла 540 мільёнаў рублёў (каля 265 мільёнаў даляраў). Першапачаткова Аляксандар Лукашэнка заяўляў, што Беларусі трэба будзе затраціць ня болей за 50 мільёнаў даляраў плюс дапамогуць эўрапейскія структуры.
  • З квітком на гульні можна было бязь візы трапіць у Беларусь празь любы памежны пункт.
  • На Эўрапейскія гульні ў Менск чакалі 30 тысяч замежных турыстаў, але на 27 чэрвеня памежнікі прапусьцілі 12,2 тысячы замежных грамадзянаў па «спартовым бязьвізе», сярод іх 4 тысячы спартоўцаў і невядомая колькасьць спартовых функцыянэраў. Для параўнаньня, на чэмпіянат сьвету па хакеі ў Менск у 2014 годзе прыехалі 80 тысяч замежных турыстаў.​
  • Нямецкі алімпійскі камітэт прыгразіў байкатаваць Эўрапейскія гульні ў Менску праз затрыманьні беларускіх журналістаў.
  • Падчас гульняў у Беларусі працавалі супрацоўнікі МУС Расеі.
  • Адкрыцьцё гульняў прысьвяцілі гісторыі Беларусі, закрыцьцё — сучаснасьці.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG