22 сакавіка Аляксандар Лукашэнка выступіў перад «актывам» Баранавічаў і Баранавіцкага раёну падчас рабочай паездкі ў Берасьцейскую вобласьць. Свабода прыводзіць ягоныя выказваньні паводле дзяржаўнага агенцтва БелТА.
Пра Баранавічы
- «Баранавічы — горад асаблівы. Трэба мець на ўвазе, што ён знаходзіцца на скрыжаваньні ўсіх дарогаў і шляхоў, у тым ліку галоўнай нашай магістралі, якая ідзе з Кітаю на захад Эўропы. Сёньня ўжо так трэба казаць».
- «Людзі павінны жадаць і мець магчымасьць жыць усюды ў Беларусі, у тым ліку ў Баранавічах».
Пра значнасьць Беларусі
- «Трэба слова сказаць — і адразу пайшла хваля, пачынаючы зь Менску, на Ўсход, на Захад. Усе разглядаюць нас і так, і гэтак. Гэта натуральна, бо Беларусь стала эпіцэнтрам нашага рэгіёну ў сілу таго, што мы з вамі, сьціснуўшы зубы, вытрымалі ўсе нападкі, вытрывалі. Увесь сьвет сёньня глядзіць на Беларусь, пачынаючы з тых краін, якія знаходзяцца ў нашым рэгіёне — Нарвэгія, Швэцыя, Фінляндыя, заканчваючы далёкай дугой, афрыканскай».
- «Усе ведаюць пра Беларусь, і многія разьлічваюць на тое, што Беларусь і тэхналягічна, і „мазгамі“ зможа аказаць ім адпаведную падтрымку. Мы ня супраць, але гэта каштуе грошай, за гэта трэба плаціць».
Пра эканоміку
- «Адзіная небясьпека нашаму разьвіцьцю — ніякая не ідэалёгія, ніякія ня сродкі масавай інфармацыі, ні „прасунутыя“, ні традыцыйныя, ні інтэрнэт, самая вялікая небясьпека — у нас саміх».
- «Ня трэба зацягваць паясы, ужо назацягваліся, досыць. Ня трэба людзей палохаць, трэба проста працаваць, забясьпечваючы сябе і сваю сямʼю, свой рэгіён і сваю дзяржаву».
- «Лён вырабляем, малако... Сёньня няма такой на нафце рэнтабэльнасьці. На беларускай нафце, якую мы трохі прадаем, — найлепшая лёгкая нафта — мы там ня маем такой рэнтабэльнасьці».
- «Мне паказьнікі не патрэбныя. Мне патрэбныя грошы. І ня мне, а вам».
- «Калі нехта думае, што мы будзем плаціць заробкі тым, хто сёньня несур'ёзна працуе і зарабляе там 600-700 рублёў, як пішуць, а мы будзем даплочваць да 1100, то вы павінны разумець, за кошт каго. Мы што, павінны адабраць у кагосьці грошы, хто больш зарабляе, і аддаць тым, хто менш? Гэта няправільна!»
Пра выбарчыя кампаніі
- «У гэтыя два гады мы будзем здаваць іспыт. Людзей крыўдзіць ні ў якім разе нельга, але і пускаць пыл у вочы таксама ім нельга».
- «Будзем працаваць так, каб гэта засталося і пасьля перадвыбарчай кампаніі, каб нас людзі не папракнулі ў тым, што мы напярэдадні нейкіх палітычных падзеяў, перш за ўсё выбараў, нешта такое зрабілі, каб падсаладзіць людзям жыцьцё, а потым пра іх забудзем. Гэтага ніколі не было і ня будзе!»
Пра стан дарог
- «Людзі правільна абураюцца. Пазаўчора зрабілі дарогу — яна развалілася. Гэта ня толькі настрой людзей, гэта іхны матэрыяльны дабрабыт — амаль кожны мае аўтамабіль. Яны ўклалі туды немалыя грошы і хочуць нармальнымі дарогамі праехаць».
- «Увядзіце жалезабэтонную практыку: пабудаваў дарогу, будынак і іншае — гарантыйны тэрмін. Калі што-небудзь здарылася — ідзі і рабі сваім коштам. У нас усюды з гэтым праблема».
Пра аўральнае «навядзеньне парадку» ў горадзе перад ягоным прыездам
- «Гэта натуральна. У сілу асаблівасьцяў майго характару я не цярплю, калі нехта ў госьці прыяжджае і ў хаце не прыбрана. Гэта элемэнтарна. Таму тыя, хто пакутуе і крытычна ставіцца, хай не пакутуе. Яны таксама, калі госьць прыяжджае, прыбіраюць, падмятаюць».
- «А тыя, хто заклікае мяне прыяжджаць сюды хоць бы адзін раз у год — тады тут навядуць парадак — памыляюцца. Пасьля майго прыезду вы самі будзеце наводзіць парадак, будзеце ўтрымліваць горад у такой жа чысьціні, як я ўбачыў сёньня, а вы бачыце ўжо некалькі дзён».
- «Я вельмі баюся, што вы марнуеце на гэта лішнія грошы. Ні ў якім разе нельга марнаваць грошы на гэта — людзі павінны прыбіраць самі. Так, калі вуліцу, асфальт падрамантаваць і іншае — які чалавек гэта будзе рабіць? Гэта ўжо мы, дзяржава, павінны адказваць. Нам людзей папракаць няма за што».
- «Калі мы арганізуем, нашы людзі адгукаюцца з задавальненьнем. Беларусы — гэта ўсё ж такі акуратны народ. Яны ганарацца чысьцінёй свайго гораду, сваёй вёскі, але трэба арганізаваць, трэба папрасіць іх. Трэба іх прыцягнуць да гэтага».
Пра адстаўкі ва ўрадзе ў выніку паездкі ў Воршу
- «У Воршы быў цяжкі досьвед. Там мы страцілі практычна палову ўраду. Не хацелася б, каб гэта здарылася і ў Берасьцейскай вобласьці».
Пра пасяўную
- «Няма сэнсу дакладаць аб гераізме ў часе пасяўной кампаніі. Пасеем. Гэта не пытаньне».
Пра перапрацоўку сьмецьця
- «Я сам калісьці, абдумваючы гэтае пытаньне, прыйшоў да адназначнай высновы: калі б мы рупліва падыходзілі да гэтых рэсурсаў, мы б на 50% былі багацейшымі. Гэта значыць, мы сябе зьбядняем напалову».
