Намесьнік прэм’ер-міністра Беларусі Ігар Петрышэнка агучыў пазыцыю Беларусі наконт цэнаў на транзыт газу ў межах ЭАЭС у інтэрвію дзяржаўнай газэце «Звязда».
Паводле Ігара Петрышэнкі, Беларусь чакае ад Расеі ўмовы «нацыянальнага рэжыму доступу» ад расейскіх натуральных манаполіяў — то бок доступ мусіць быць па цэнах «як для сябе», сказаў ён. «Адзіныя падыходы пры фармаваньні тарыфаў на транспартаваньне газу», дадаў Петрышэнка, «істотныя для нас» і мусяць быць зафіксаваныя беларускім і расейскім бокам у праектах дакумэнтаў.
Віцэ-прэм’ер лічыць, што стварэньне адзінага рынку нафты, нафтапрадуктаў і газу «здымуць усе пытаньні». Інакш «уся праца і затрачаныя на яе высілкі для паўнавартаснага функцыянаваньня ЭАЭС будуць марнымі».
Цана на транзыт газу для Беларусі стала прадметам спрэчкі паміж Аляксандрам Лукашэнкам і Ўладзімірам Пуціным на сустрэчы лідэраў краін ЭАЭС летась у сьнежні. Лукашэнка прывёў прыклад — тарыф «Газпрома» на транспартаваньне прыроднага газу для Беларусі складае амаль 3 даляры за 1000 м³ на 100 км, а ўнутраны тарыф у Расеі — каля 1 даляра.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў