На пытаньне журналістаў, ці стане Ўладзімір Пуцін адказваць на ліст сына грамадзянкі Вялікай Брытаніі Дон Стэрджэс, атручанай нэрвова-паралітычным рэчывам «Новичок», адказаў прэс-сакратар кіраўніка Расеі Дзьмітрый Пяскоў.
«Гэта зусім неабавязкова, — перадае «Інтэрфакс» словы Дзьмітрыя Пяскова наконт адказу сыну загінулай ад імя Пуціна. — Рэч у тым, што амбасадар РФ прызначаецца прэзыдэнтам РФ. Уласна ён і ёсьць надзвычайным і паўнамоцным паслом і мае ўсе паўнамоцтвы гаварыць ад імя Расейскай Фэдэрацыі».
Эван Гоўп, 20-гадовы сын загінулай, накіраваў ліст Пуціну 2 сакавіка. Ён прасіў дамагчыся справядлівасьці ў справе аб сьмерці ягонай маці, у тым ліку даць брытанскім паліцыянтам магчымасьць дапытаць падазраваных.
44-гадовая Дон Стэрджэс атрымала сьмяротнае атручэньне 30 чэрвеня 2018 году пасьля таго, як распыліла з флякону з-пад парфумы, знойдзенага на вуліцы, вадкасьць сабе на запясьце. Сьледчыя мяркуюць, што флякон быў з рэчывам «Новичок» і што яго выкінулі ў сакавіку пасьля атручэньня былога расейскага выведніка Сяргея Скрыпаля і ягонай дачкі Юліі.
Маскву падазраюць у спрычыненасьці да гэтых атручэньняў. Брытанскія паліцыянты гатовыя выставіць абвінавачаньне двум расейцам, Аляксандру Пятрову і Руслану Башыраву (паводле расьсьледаваньня Bellingcat, іх сапраўдныя імёны — Анатолій Чапіга і Аляксандар Мішкін), якіх называюць агентамі расейскай выведкі і непасрэднымі выканаўцамі злачынства. Пуцін асабіста адмаўляў гэта.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў