Эстрадны сьпявак Аляксандар Саладуха атрымаў дазвол на правядзеньне канцэрту 1 траўня на менскім стадыёне «Дынама». Раней гэтую пляцоўку не далі арганізатарам сьвяточнага канцэрту на Дзень Волі #БНР101.
«Усе як мае быць, па законе. Усё ўзгадніў, усё зрабіў. Гэта цэлы шлях. Дазвол атрыманы і ад стадыёну, і ад Менгарвыканкаму», — сказаў Свабодзе Аляксандар Саладуха, які плянуе адзначыць канцэртам 60-гадовы юбілей.
Чаму менавіта стадыён «Дынама» Аляксандар Саладуха абраў для канцэрту?
«Бо ўсе астатнія пляцоўкі я ўжо скарыў. Гэта самае вышэйшае. Тым больш што пасьля рэканструкцыі ў яго назва — «Нацыянальны алімпійскі стадыён», — сказаў сьпявак.
Паводле яго, палова квіткоў (кожны за 2 рублі) ужо прададзена.
Раней адміністрацыя стадыёну «Дынама» адмовіла арганізатарам сьвяточнага канцэрту на Дзень Волі, спаслаўшыся на Эўрапейскія гульні. Грамадзкая кампанія #БНР101 падавала заяўку ў Менгарвыканкам на сьвяточны канцэрт на «Дынама» 24 сакавіка.
Чаму так атрымалася, што Аляксандру Саладуху канцэрт дазволілі, а канцэрт на Дзень Волі — не, ні ў Менгарвыканкаме, ні ў адміністрацыі стадыёну «Дынама» карэспандэнту Свабоды не патлумачылі.
Намесьнік генэральнага дырэктара стадыёна Стансілаў Вазьняк сказаў, што «па тэлефоне не дае інтэрвію і нічога ня кажа», і прапанаваў даслаць пісьмовы запыт. Мы даслалі і паведамім, як толькі атрымаем адказ.
